Lucas 1:46-79

⁴⁶Jatian María neskata iki: “Nokon shinanyaxonbira non Ibo en rabiai,

⁴⁷jan ea kishpinmaa Dioskira nokon shinan meran ea raroai,

⁴⁸ea jawen yonoti ikax, rabíti shinanhoma iken, ekiakin shinanna kopí. Jaskáakinra, jonibaon rama peoxon jatíbitian Diossenra mia raroshaman imake akin ea anoxikanai.

⁴⁹Ja jatíbi atipana koshia Diossen, ani jawékibo emeranxon aká kopí. ¡Jakon riki jawen jane!

⁵⁰Diossenra já rabiaibo jatíbitian, jato noibai.

⁵¹Jawen atipana koshinra ani jawékibo aká iki: Ja rabitai jonibaon anoxon shinankana jawékibora, jato ras akanaana iki.

⁵²Ja apobo jaton teeainoa pikoxonra, ja rabítinin shinanhomabo ani jonibo jato imaa iki.

⁵³Ja jawékiakasaibora icha jawékiati jato menia iki, jatian ja jatíbi jawékia jonibora, jawebiomabo jato banémaa iki.

⁵⁴Ja jawen yonoti Israel jonibo jato akinxonra, jawen noibamisti shinanmanribi jato akintinin shinanbenoyamaa iki.

⁵⁵Jaskáakin jato akintibo ja non rekenbo jato yoini iketian; jainxon ja Abraham itan jawen chiní rarebo iki kaiboribi jato yoini iketian”, iki.

⁵⁶Jaskatax María ja Elizabetkan xobonpari kimisha oxe ikax, moa jawen xobon karibaa iki.

⁵⁷Jatian jaskara iiti moa bakenti oxe senenketianra, benbo bake Elizabet bakena iki.

⁵⁸Jatianra ja patax ikáboyabi jawen rarebobo ja rarokinni bokana iki, non Ibon jakonhakin akinna onanax.

⁵⁹Jatian ja bake pikota moa posaka neteya iketian boxon, jawen jakina rebichi xatexonkana iki, jainxon ja bake jawen papan janenbi Zacarías akin janekaskana iki.

⁶⁰Ikaxbi jawen titan jato yoia iki: —Jawen janen ayamakanwe, jawen janera iti jake Juan —akin.

⁶¹Jato jaskáaketian yoikana iki: —Min rarebora ja janeya yamake —akin.

⁶²Jainxon ja baken papa yoyo iamai iken, mekemanres metokin yokákana iki, janbiribiki jawen bake jawe janekasai ixon.

⁶³Jaskáakana jawen papan jan wishati tablashoko bexonkanti jato yokata iki, jaskáakin bexonkanketian, neskati iká wishaa iki: “Jawen jane riki Juan”, iki iká, jatianra jonibo jatikaxbi ratékana iki.

⁶⁴Jaskákanaitianribi Zacarías moa jakiribi yoyo ika iki, jainxonra Dios rabikin peoa iki;

⁶⁵Jaskara oinnaxa ja patax ikana jonibo ratékana iki, jainoax ja Judea main iká mananbaon jakana joniboribi, jaskara winotabo jato yoiaketankana iki.

⁶⁶Jatian jaskara ikábo ninkata jonibo jatonbinix neskatibo yokakaakana iki: “¿Jawekeskamein nato bake aniax ikí kanoxiki?” ikibo. Jawen atipana koshin ja Ibon akinnai ointaanan.

⁶⁷Jatian ja baken papa Zacarías ikonbiresi Diossen Shinan bochóya ikax, ja Diossen imaa joibores yoyo iki neskata iki:

⁶⁸“¡Israel jonibaon Dios, rabinon akanwe, kopíaxon jawen jonibo jato xabáai joá iken!

⁶⁹Jawen yonoti ipaoni Davidkan rareboboainoara, noa jan kishpinmai westíora joni atipana koshiya noa raanxona iki.

⁷⁰Jaskara itibora moatianbi janbi imaa *profetabo meranxon Diossen jato yoimaa iká iki;

⁷¹Ja non rawíboibakea, itan ja noa omisai joniboibakea pikoanan noa jan xabáati.

⁷²Jainxon ja non reken papashokobo jato onísaxon jato akintiribi yoia iki, jainoax ja senenhabekonti joi akátoninribi shinanbenotima.

⁷³Ja non reken papashoko Abraham akonkin jato yoini joi riki neskara:

⁷⁴Jawen keena keskatires noa ikanon ixonra, non rawíboibakea noa jan xabáa iki;

⁷⁵jainoax nato neten já bebon jaax, ponté shinanya itan ochaoma keskáboribi noa jatíbitian ikanti kopí.

⁷⁶Baké jatian miara Ani Diossen *profeta akin anoxikanai. Minpari rekenxon, ja non Ibo joti iketian benxokaanon ixon jato yoiaitian.

⁷⁷Jaskáaxon Diossen jaton ochabo moa shinanxonyamataanan jato kishpinmai joi, jawen jonibo min jato onanmati kopí.

⁷⁸Ja non Diossenra jawen ani akinmisti shinanya ixon, jan noa kishpinmati noa raanxona iki, ja netetiibi jakonshamankin noa bari pikómaxonai keskáakin.

⁷⁹Jaskáaxon ja kikin yamé keska meran jakanabo, jato tenai keskáakin jato anon ixon, jainxon jakoni jakanon ixonribi noa onanmati”, iki.