Luk 1:46-79

⁴⁶Ana Maria dungwa, “Na kuiyana mina Yaglkande dembiyesi mitna imbo endinga.

⁴⁷Na spiritna gunyei God tongwa, sraglpre, ye na akeple dungwa.

⁴⁸Sraglpre, ye na pre pir moglkwa, na mogl-atne ende Yaglkande kongunmo erika. Yeglpre erme ya okuwo imbor yomba prapra na God ere wakai ere tome dinaglkwa.

⁴⁹Sraglpre, God yombuglo pond pangwa taragl kande kaima na pre ere narkwa, ye kangiye holi pangwa.

⁵⁰Yomba ye wedi kunduglmo geglkwa i ye mitno gogl tongwa. Yeglpre, okuna kowano mina pai ende wu erme ya okuwo gawano mina panambuka.

⁵¹Ye ongo kande duglosi kongun giglendi ere ana yomba no kanaglmedi erikwa yomba i si perepere endungwa.

⁵²Ye yomba kande king botno mina ake atne endungwa, ba yomba yene pre pir yangingwa yomba i ye akepledi mitna endungwa.

⁵³Kindan gogl meglkwa yomba ye taragl wakai merkinde tongo kau sungwa, ba taragl merkinde pai tongwa yomba ta tekre yoko diendungo endeingwa.

⁵⁴Ye kongunmo yomba Israel akeple dindre, okuna dumere mere ere mitno gogl tenambuka.

⁵⁵Ye nono yagl awano ditomere yegl: Abraham ya ye epiglmo mina mitno goglkwa i aimande pai enambuka.”

⁵⁶Maria ba suwota Elisabet bogl mogltre ana ende ikine yungumugl ongwa.

⁵⁷Elisabet gak kurambuka engemo ungo ana ye wam ta kugl yongwa.

⁵⁸Ye yene yombamo ya te yomba mangigl keipaingwa, Yaglkande ye Elisabet miriye kande gogl ombuno ditongwa i pirtre, ana ye Elisabet bogl gun yeingwa.

⁵⁹Ande enge 8 mina ye undre gak nangiye punduno bogltre ana ye nem kangiye yeite Sekaraia we dinamune dingwa.

⁶⁰Ba gak mam dungwa, “Taman, ye kangiye Jon we dinamga.”

⁶¹Ana ye eremogl Elisabet diteingwa, “Ba ene yombano mina yomba kangiye yegl ta paikrukwa.”

⁶²Ana ye onguno keunde ariye ere nem Sekaraia krapogl teingwa. Ye gak kangiye ira we dinambuka i kana pre erikwa.

⁶³Sekaraia taragl ta narimbi muno boragledi pre ariye ere, ana gak kangiye muno boglkwa, “Gak kangiye Jon.” Ana yomba prapra kinano gundingwa.

⁶⁴Oglandi kaima Sekaraia dra ka dinambuka undungo te drambiye pirka sungwa ana ye ka aglke mambuno ere dindre ana ye God dembiye sungwa.

⁶⁵Yomba mangigl keipaingwa prapra kundugl geglkwa, Judia kamun muglo meglkwa yomba prapra kamo i diwai dingwa.

⁶⁶Yomba prapra ka i pirtre kinano yongo ana krapeglkwa, “Okuwo gak i sraglmere morambe?” I Yaglkande ongo ya yombuglomo i ye mina yongwa.

⁶⁷Jon nem Sekaraia Holi Spirit kau sitongo ana God kamo pai inambuka pre dungwa:

⁶⁸“Nono Yaglkande dembiyesi mitna imbo endinamga. Israel Godno, ye undre ana yene yombamo akepledi toposi ikine endinambuka.

⁶⁹Ye kongunmo yomba Devit yungumo ombuno mina. Yaglkande giglekui dungwa ta, Ye nono ere-inambuka pre i-pene endungwa.

⁷⁰Ye propetmo holi okuna koimbo ka ditomere orkwa.

⁷¹Ye nono kundano ikine ya kinde pir norikwa yomba prapra onguno mina nono ere-inambuka.

⁷²I nono kowano wagle mitno goglkwa ombuno dindre. Ana ye lo holi eragle dungwa kontrak i aimande pir moglkwa.

⁷³Ye ka di giglendi nono yagl awano Abraham tongwa.

⁷⁴Ye nono kundano ikine onguno mina i-yeglke ende, ana ake wakai ere norkwa pre, nono kundugl goglkre, ye kongunmo eramunga.

⁷⁵Yeglpre nono tandaglme ta paikran ana God mambuglo mina mambuno du-yene pamere engenge eramga.

⁷⁶Ana ene na wana, ene kangin yei God Mogl Mitna Imbo endungwa, propetmo we dinaglkwa, sraglpre, ene Yaglkande konbaunamo akekun ere yeitenatnga.

⁷⁷Ye yombamo tandaglmeno kindekondo tendre ana nomano wakai tendre ere-inambuka.

⁷⁸Sraglpre, nono Godno mitno goglko windadi dindre ikine endinambuka pre, ana heven imbo ande koragle sumere yeglmere ende nono mina unambuka.

⁷⁹Ana yomba mim ormara suna meglkwa, ya te gounga mambuno kuiyamo atnekra meglkwa i ambuglangesi tendre, ana nono katno sugl mogl. Ana deno munduno winda dungwa konbo mina auro i suna enambuka.”