LUKA 1:46-79

⁴⁶Ndipo Maliya adalewa kuti: Mtima wangu uli kutumbiza Mbuya

⁴⁷ucikondwera Mulungu Mpulumusi wangu.

⁴⁸Thangwe iye adandibvera ntsisi na kubzicesva kwangu ine nyabasa wace! Kuyambira lero mpaka kutsogolo wanthu wentse an'dzandicemera wakusimbidwa.

⁴⁹Thangwe Iye Nyamphambvu wandicitira bzinthu bzikulu kwene-kwene! Na tenepo dzina lace ndakucena.

⁵⁰Ntsisi zace n'zakuyenderera kuna madzindza yentse yomwe yambamulemekeza.

⁵¹Iye adaimisa boko lace la mphambvu, acithotha wanthu wakusamwa mmitima mwawo.

⁵²Adagwesa atongi mmipando yawo acikwizika wakubzicesva.

⁵³Adapasa bzinthu bzabwino anyanjala, acithotha anyakudala cimanja-manja.

⁵⁴Iye adakumbuka ntsisi zace acithandiza Ijirayeri, nyabasa wace,

⁵⁵ninga momwe adauzira azibabathu Abramu na azukulu wace wentse na kuyenderera.

⁵⁶Maliya adakhala naye minyezi mitatu, ndipo adabwerera kumui.

⁵⁷Pomwe zidakwana ntsiku, Zabere adabala mwana wa mwamuna.

⁵⁸Wanthu wa pafupi na abale wace adakondwa pomwe adabva kuti Mbuya adamubvera ntsisi.

⁵⁹Pomwe zidapita ntsiku zisere, wanthu adabwera kumsinda wakucosa mcikuta, ndipo iwo akhafuna kum'pasa dzina la babace, Zakaliya.

⁶⁰Tsono mai wace adatawira aciti: “Ne-ne-ne, bzingacitike lini na pang'onopo. Maka Juwau.”

⁶¹Ndipo iwo adamuuza kuti: “Palibe munthu kudzindza lako omwe ana dzina limweri.”

⁶²Na tenepo iwo adabvundza na manja babace kuti iye akhafuna kum'pasa dzina lanyi.

⁶³Ndipo iye adakumbira katabwa kuti anembe. Ndipo adanemba kuti: “Dzina lace ni Juwau.” Na tenepo wanthu wentse adadabwa.

⁶⁴Panthawe yomweyo, mulomo wace udafunguka na lirime lace licitsudzuka. Ndipo iye adayamba kusimba Mulungu.

⁶⁵Na tenepo wanthu wentse wa pafupi wace adabva mantha. Ndipo nkhaniyo idabveka kumii yentse ya kumapiri ya kuJudeya.

⁶⁶Wanthu wentse omwe akhaibva akhanyamala nayo, acimbalewa kuti: “Kodi mwana omweyu an'dzakhala yani?” N'cadidi kuti boko la Mulungu likhana iye.

⁶⁷Ndipo babace Zakaliya adagwaniridwa na Mzimu Wakucena acikuza Mbuya aciti:

⁶⁸Wakusimbidwa ndiye Mbuya Mulungu wa kuIjirayeri, thangwe iye adabwera kudzawona wanthu wace aciwapulumusa.

⁶⁹Iye watipasa mpulumusi mkulu kudzindza la nyabasa wace Davide,

⁷⁰ninga momwe iye adafotokozera kale-kale na mulomo wa apolofeta wace wakucena.

⁷¹Kuti adzatipulumuse kuna anyamadulanthaka na kuna anyakutinyosa.

⁷²Kuti abvere ntsisi azibabathu, kuti akumbuke pomwe cipangano cace cakucena,

⁷³na kulumbira komwe adacita kuna babathu Abramu.

⁷⁴Kuti iye atipulumuse mmanja mwa anyamadulanthaka wathu, kuti timuphatire basa na kusaya mantha ntsiku zentse za moyo wathu,

⁷⁵wakucena na kulungama kuna iye.

⁷⁶Na iwe kamwanawe, un'dzacemeredwa mpolofeta wa Iye Wakudzulu. Nakuti un'dzabakapita kutsogolo kwa Mbuya kuti ukamukondzere njira zace.

⁷⁷Kuti akadziwise wanthu wace cipulumuso pakulekeredwa bzakuipa bzawo.

⁷⁸Na ntsisi za Mulungu wathu, omwe adadzatiwona kucokera kumabva dzuwa;

⁷⁹kuti abvunike wale omwe ali mumdima na wale omwe ali pafupi na impfa; kuti adzatitsogolere munjira ya mtendere.