Luk 1:46-79

⁴⁶Ma Maria i ri vene: “Lemik i papomnga Toko Pomnga.

⁴⁷Na onik ilemi sivenga nge a God ako ini lek pamimionga.

⁴⁸Eneke ilemi esal tho ini ile umonga vulutnga. Ma i patea ponange na panen naro toko na seng alavusnga, aro o apet tho ini seng ako God i oma senu nge tho.

⁴⁹Eneke God ako i pomnga rintet, ile omaing a tho nge, i aolonga na iion kene i riritet.

⁵⁰Na i kene i themosal toko na seng areko o papomnga i ranga ve nge toko alavusnga ako o mimi nomenga na ponange na panen.

⁵¹Na God i oma omaing aolonga ako i athepu areko olemi i vual nge magoning.

⁵²Ma i paesu nepesre ako ru a ole menongare nge, na i paposnga or. Na i papomnga toko vulutngare.

⁵³Na areko o men mesi, i pavual or nge ur sivesivengare. Na i pakepot toko le urngare ma o es ol alapronga la.

⁵⁴Na nomenga i kin riong tomo nge ar pompomere na ponange i oma ol i lale. Na i opoal mun ile umonga Israelre lale.

⁵⁵Ma ilemi rum ile themosaling nge a Abraham tomo mun nge ititeviere ako aro o velpol panen. Na ile themosaling aken aro ile vusonga avele.”

⁵⁶Na Maria i voth tomo nge a Elisabet i pavurvur nge ngov or me. Lamako i lo werer mun a ile pen la.

⁵⁷Ma ine nang i velpol nge ako aro Elisabet i pop itun ma itun aken ini totomone.

⁵⁸Na ile pen lemiare na ilengare o nongpola ako God ilemi esal i ma i oma omaing sivenga rintetnga nge i, mako or alavusnga olemi sivenga tomo nge i.

⁵⁹Lama nge nang or limmenga o es mo aro o is ile, ma o ri ve o apet iion a Sekaraia mo ini itema iion.

⁶⁰Aveto inina i ri ve, “Avele! Aro iion a Jon.”

⁶¹Na o ria i ve, “Aveto lomnga e avele ako iion venen aken.”

⁶²Ma o oma inga paatealing ako nge omeni a itema nge, ako o nin i ve, i sis ve aro i apeta ol wain aken aro iion ol vava.

⁶³Mako i nong a or nge ur e ako aro i watu i nge. Mako i watu ve, “Iion a Jon.” Ma or alavusnga o kukuk nge.

⁶⁴A ur e avele na Sekaraia iwo i thep werer, nako i palav ol. Na i patea ol nge a God iriseanga.

⁶⁵Ma ile pen lemiare o thepol ur aken i velpol ma o kukuk rintet nge. Ma ur aken i kima a pen elonga ako ru a wop a Judia epee ako ini pen polemire.

⁶⁶Ma tokokoere o nongpol ur aken, ma olemi pelekpol nge, ma o nin pel ve, “Naro wainlanga aken panen aro i velpol aro ini toko le vanga?” Eneke o ate ako ve, Toko Pomnga ile engenging i voth a i nge.

⁶⁷Ina Sekaraia ako ini a Jon itema i vual nge a God Ioni Riringa na i ripot a God ile riong ve,

⁶⁸“Aro te risea Toko Pomnga ako ini Israelre ole God, eneke i es me lale na i el werer ilengare.

⁶⁹Na i sungpot ler pamimionga engenga ako ini ile umonga a Devit itevinga

⁷⁰ranga ve nomenga i ripot i a ile riong elnga riringare owo.

⁷¹Na i sungpot ler pamimionga mo aro i el werer it a ler ngarangre omeni, na nge tokokoe areko oni silal it.

⁷²Mako i oma nunganga ile themosaling a ititeviere nge. Na i oma ile riong kinnga riringa ako i oma tomo i nge or nomenga.

⁷³Na nge ile riong kinnga aken i ri nunganga a titevir a Abraham nge ve,

⁷⁴‘Aro i el werer it a ler ngarangre omeni, mo aro te oma ile umong tomo nge ngangeong avele.’

⁷⁵Maken aro e nang elonga ako aro te mimi nge, aro te voth toko vengvenga na toko riringa a itheki.

⁷⁶Na wong, tuk. Panen aro o apet ong ini a God ako i roro rintet ile riong elnga. Eneke aro wong mukal e a Toko Pomnga mo wong monsi ile sovengalo.

⁷⁷Naro wong ria ile toko na sengre mo olemi mire nge ako aro ilemi simikal ole vothung kerenga naro i pamimi or.

⁷⁸Eneke ler God i vual nge themosaling na i ranga ve ini nang le tolilisong ako i esu a Pen a Urvet me.

⁷⁹Ma i totun it tomo nge areko o voth a mideng na a rinong lemi mo aro i pathengal it nge ler sovengalo ako nge lemi moring.”