Luka 1:46-79

⁴⁶U Mariamu akaligitya, nkolo ane ikumulumbiilya u Mukulu,

⁴⁷nu ng'wau nuane imiloeeye Itunda, Muguni nuane.

⁴⁸Kunsoko uugozile u unyeku nua mutugwa nuakwe. Kundogoelyo, goza, pumiila itungili ulelwa wihi akunintanga mukendepwa.

⁴⁹Kunsoko munyangulu wantendeela makulu, ni lina nilakwe inge inyelu.

⁵⁰Nu ukende nuakwe wikiee ulelwa ga nu ulelwa ku awo ni umukulyaa.

⁵¹Uzipilye ngulu ku mukono nuakwe; uasapatiiye niakete ulugoha mu masigo a nkolo ni ao.

⁵²Uagwisilye i akulu mu matuntu ao na ukulu ni anyeku uanankiiye.

⁵³Anya nzala uikutilye ukende, ni anya nsao uahegilye mikono mitili.

⁵⁴Umiiaiiye u Israeli munyamulimo nuakwe, iti wikimbukiilye u ukende nuakwe

⁵⁵(anga nai uatambuie i atata itu) u Abrahamu nu ulelwa nuakwa ga ikali na kali.”

⁵⁶Mariamu akikie nu Elizabeti mieli itaatu uu gwa ikatulika akasuka kito.

⁵⁷Matungo nai apika u Elizabeti akitunguila ng'wana mgoha.

⁵⁸Ianya kisali akwe nialuna akwe naigule umukulu uza.

⁵⁹Naiapikile mahiku munana aiazila kumtala kukidamu umung'enya akamitanga lina lakwe Zakaria kushatilya ilina lang'wi he.

⁶⁰Ingigwa unyinya akwe akasusha akalunga aa ukitangwa Yohana.

⁶¹Kamuila kutile hata nung'wi kua luna ako nuitangwa ilina nilanso.

⁶²Akatula kilinga silyo ihe itangwe nyinyu.

⁶³Ihe akalowa ahole ikibao andike “Ilina lakwe Yohana.” Ihi ika ambwa ikuilywa kua ili.

⁶⁴Itungo umulomo wakwe ukaluguka nulimi lakwe likaligitya nukumukulya Itunda.

⁶⁵Uoa ukaizila wihi naiakolipakupi nung'wenso. Makani ikasambaila mihi ihi mulugulu mung'wa Yudea ayo.

⁶⁶Ihi ayo naigule ikamaika munkolo yao akalunga ung'wana uyu wiuli? Kunsoko umukano wang'wa tata ukoli palung'wi nung'wenso.

⁶⁷Ihe akwe u Zakaria ung'wang'welu munya kidagu akalunga,

⁶⁸“Akuligwe Itunda mukulu wa Israeli, kunsoko auiye kuleta uguniki kuantu akwe.

⁶⁹Wakimikiye lupembe nu uhuili wa nyumba nai mitumi akwe u Daudi,

⁷⁰Anga na ulungile mulomo wakinya kidagu naiakoli matungo ao na kale.

⁷¹Ukakuguna muabi itu kupuma mumikono akwe nia kubipiwe.

⁷²Ukende uu kulagilya uza wang'wa tata itu, kilingasilyo lakwe ni za,

⁷³ilago nautambue kung'wa Abrahamu tata witu.

⁷⁴Uine kigeleka uhumile kutuma bila woa, kekahuma kugunwa kupuma muabi itu.

⁷⁵Kuite uza nitai kuntongela itu imahiku ihi.

⁷⁶Uu nu ewe munya kidagu nukole migulya kunsoko ukulongoleka kunsoko amukulu kumunonelya inzila kuwanonelya iantu kunsoko aupembelyo wakwe.

⁷⁷Kualingasa iantu akwe kugunwa imilandu ao.

⁷⁸Ulu lutuile kinyauwai wang'wi Itunda witu kunsoko ilyoa lukupuma hange.

⁷⁹Kelya kuantu nikie mkiti nao niikie mumulule wa nsha ukituma iti kumitongeela imigulu itu munzila aupolo.