Evangelio de San Lucas 1:46-79

⁴⁶Tutai Maríashkam: “Wika Apajuinak dekaskenum mina anentaimtagjaí emematjai, tikima senchigtina ibau asamtai.

⁴⁷Shiig aneamu ajutui Apajuí mina uwemtijin asa,

⁴⁸wi imanchauch aigkish niina inake asamtai mina etegtua duwi. Yamai nagkamsag ashí aents mina pachitus chichainakug: Maríak Apajuí etegkamu asa shiig aneas pujusuí, tusag tuké tujutiagtin ainawai.

⁴⁹Apajuí dekas ashí senchigtina nunú minai uminkatnun tujuti duka shiig tumaitsui, niina daajig pegkegmai;

⁵⁰Apajuik aents aidau niina umijuidaunak tuke wait anentsagké atinai.

⁵¹Nigka tikima senchigtina ibau asa junak jutikae; dutikak, emebau aidaunash imanchau emakui.

⁵²Apu inamin aidaunashkam jiikí ajapeak, aents imanchau aidaun apu emakui.

⁵³Aikasag nujantai waituidaunashkam ashí pegkeg aidaunak susauwai, dutikak wiyakuch aidaunak wainak idaisauwai.

⁵⁴Ni inake Israel wegantun ayamjuke, dita wait anentanak kajimatkiche,

⁵⁵jutii muunji Abraham aajakua nuna aatus anagkuauwai, nuigtú ni wegantu akiinak wegagtina nuwish tuke atina nuna.”

⁵⁶María nuna ti, Elisabetan jeenig kampatum nantu tumain pujusuí, nunik wakitkiuwai niina jeen.

⁵⁷Elisabet tsawanji uminkamtai aishmagkun uchigmakui.

⁵⁸Nunikmatai nui ijutkau batsataidau, niina patayí aidaujai Apajuí wait anenjam uchigmakbaun antukaju asag shiig aneasajui.

⁵⁹Uchi akiina ocho tsawan wetai, judío aidauk uchi aishmag akiinaunak tuke pakaji ajapjin asag, jukiajui nuna dutikawagtatus. Nuninak: “Uchik Zacarías atí, apají daajiya nunisag”, tuidau.

⁶⁰Tujash uchí dukují chichaak: —Atsá, uchik Juan atatui, —tau.

⁶¹Tutai: —Ame pataim aina nuwiyag tu daagtinuk atsajama, —tuidau.

⁶²Tutai uchí apajin iwiyas iniidau, ya atí tawaki tusag.

⁶³Nuniagtai, taapna sujustá tusa inakmatai susam: “Uchí daajig Juagkai” tusa agaju. Dutikamtai ashí anentai jegagchaju.

⁶⁴Nuna dutikamuik ataktú chichakú. Nunik Apajuin emematiu.

⁶⁵Nunitai nui ijutkau batsamin aidauk puyatjukaju. Ashí Judea mujajin batsamin aidaushkam nunak ashí dekaawaju.

⁶⁶Ashí aents nuna antuidauk: “¿Ju uchish wajukuk atinaita?” tusag anentaimaidau, Apajuí niina senchijin yayamun dekaidau asag.

⁶⁷Zacarías Wakaní Pegkeji egkemtujam chichaak:

⁶⁸“Emematiagmi Apu, Israelan Apajuijiya nu, ni aentsjin uwemtijatatus tau asamtai.

⁶⁹Dekas senchigtin Uwemtikagtinun awetugmaji, ni inake David aajakua nu wegantun.

⁷⁰Yaunchuk nagkamas Apajuí etsegtin pegkejam aajakaju etsegkajua dutiksag,

⁷¹iina shiwaji aidaun, nuigtú ashí tikich aents kajegtamin aina nunash depetuk uwemtijamjatna nuna.

⁷²Iina muunji aajakajua nuna pegkejan anagkuak: ‘Tuké aminak wait anenjatnaitjame’, tiuwa nunak kajimattsuk betek umiké.

⁷³Iina apajin Abragkan dekas umiktatjai tiuwa duka juuwai:

⁷⁴‘Wi ditá shiwajinash depetukan agkan ematnaitjai, dutikam ishamkagtutsuk minak umigtuinak,

⁷⁵pegkediag batsamas, wi wakegamunak ashí tsawantai takastinme’,” tiuwai.

⁷⁶Nuna ti uchijinashkam: “Amek Apajuí etsegtinai tama atatme; amek Apu takastina nu emtikam umigkattame.

⁷⁷Ni aentsji aidau uwemjatnuji, tudauji tsagkugnagtinchakam pachisam ujaktatme.

⁷⁸Nunak Apajuí shiig wait anenjamu asa nayaimpinmayan Uwemtikagtinun awetugmae, etsa minak tsawantan tsaaptin emama numamtuk wajaktinun.

⁷⁹Tudau takainak, suwenum batsamas wajukmaina numamtuk wajainak, jaak megkaemainnum batsatunash tsaaptinun iwaintuktatui. Dutikak jinta agkan pujutnum ekagtina nui wetinme tusa dekamtijamattawai”, tiuwai.