Emosi 3

1

2

3

4

5

6

7

8

9

¹Mi avoso mae! Hiera sa zinama te Zihova sapu ta zutuni gamu, kei gamu tinoni pa Izireli, gamu doduru pa butubutu Izireli sapu turaṉa vurani gamu Arau pa Izipi:

²“Gamu mo sapu ele vizata gamu Arau koari doduru butubutu pa popoa pepeso; gua ke kote va kilasa gamu Arau koari doduru mia sinea.”

³Boka ene varigara sari karua tie sapu lopu variqetuedi pude ene varigara?

⁴Boka kurumu pa nana bae sa laione sipu lopu ele ari gana ginani?

⁵Boka saputu vagi kurukuru sa sipata totoso loke kurukuru si koa?

⁶Pana ta avoso sa buki pa vasileana lavata, si vea, lopu hoke neneqara sari tie? Pana kamo si keke tinasuna pa vasileana lavata, si vea lopu e Zihova tu va gevuria sia?

⁷Hinokara sapu e Zihova Baṉara si lopu hoke tavetia si keketoṉa be lopu ele vivinei vurani Sa sari Nana hiniva koari Nana nabulu, sari poropita.

⁸Ele kurumu sa laione. Esei si lopu kote matagutu? E Zihova Baṉara si ele zama. Esei si lopu boka zama nia sa kinorokorotae?

⁹Zama vura la koari na vasileana ta gobadi pa Asidodi meke koari vasileana ta gobadi pa Izipi; “Mi la varigara si gamu koari na toqere pa Sameria; mi dogoria sa kinolura pa korapana sa meke sa ṉinovaṉovala pa vari korapadia ari tie.”

¹⁰“Lopu tumae tavete va toṉoto si arini,” zama vura gua se Zihova, “arini si va naqiti tinagotago ta saputu vagidi meke ta hikodi koari dia vasileana ta gobadi.”

¹¹Gua ke hiera gua si zama nia e Zihova Baṉara: “Na kana kote mae vari likohae nia sa mia popoa; kote daku goreni sa sari mia vasidi ṉiṉiradi meke hiko koari mia vasileana ta gobadi.”

¹²Hiera gua si zama nia e Zihova: “Gua sapu harupu vagia sepati pa ṉuzuna sa laione sari karua susuri nene babe vasi kali taliṉa, si kote ta harupu gua tugo asa sari pa Izireli, arini sapu habotu pa Sameria pa hukihukiri dia teqe meke pa dia habohabotuana arilaedi pa Damasikasi.”

¹³“Mi avosia si hie, mamu zama vura la nia koasa butubutu te Zekopi,” zama vura gua sa Baṉara, se Zihova sa Tamasa Tadi na Qeto Minate.

¹⁴“Koasa rane sapu va kilasia Rau se Izireli koari nana sinea, si kote huara pani Rau sari hope pa Betolo; sari kikihodi ri na hope si kote ta seke palae meke hoqa la pa pepeso.

¹⁵Kote huara pani Rau sari dia vetu tana totoso ibu meke gua tugo sari vetu tana totoso maṉini; sari vetu sapu tava sari koari na livo elopaniti si kote ta huara meke sari na vetu nomadi na arilaedi si kote ta daku gore,”