Amɔsu 3

1

2

3

4

5

6

7

8

9

¹I swɑɑ dɑkio i nɔ ye nɛ, Yinni Gusunɔ nɑ gerumɔ, bɛɛ Isirelibɑ kpuron sɔ̃, bɛɛ be nɑ yɑrɑmɑ Egibitin di.

²Hɑnduniɑn bwesenu kpuro sɔɔ, bɛɛ tɔnɑwɑ nɑ gɔsɑ. Yen sɔ̃nɑ kon bɛɛ sɛɛyɑsiɑ bɛɛn durum ye i kuɑ kpuron sɔ̃.

³Tɔmbu yiru bɑ koo swɑɑ wɔri sɑnnu bɑ kun ginɑ nɔɔsinɛ?

⁴Gbee sunɔ gɑ rɑ gbɑ̃re yɑkɑsɔ gɑ kun yɑɑ mwɛ ro? Gbee sunɔ buu gɑ rɑ kukiri gen kpin yerun di gɑ kun yɑɑ wɑ gɑ dimɔ?

⁵Gunɔ gɑ koo tɑɑ mwɑɑrɑ temɔ bɑ kun ye bɛri? Tɑɑ yɑ koo se wɔllɔ gɑ̃ɑnu kun ye kɛsie?

⁶Bɑ rɑ tɑbun kɔbɑ so wuuɔ wuugibu bɑ kun nɑnde? Kɛ̃siru gɑru tɑ rɑ koore wuuɔ n kun nɛn min di?

⁷Aɑwo, nɑ ku rɑ gɑ̃ɑnu gɑnu ko nɑ kun yè nɛn sɔmɔ sɔ̃ɔwɑ.

⁸Gbee sunɔ gɑ̀ n gbɑ̃rɑ, wɑrɑ ku rɑ nɑnde. Nɛ, Yinni Gusunɔ nɑ̀ n gɑri geruɑ, nɛn sɔmɔ wɑrɑ kun yi kpɑrɑmɔ.

⁹I Asidɔdu kɑ Egibitin tem sinɑ kpɑɑnugibu nɔɔgiru sueyo i nɛɛ, bu mɛnnɑmɑ Sɑmɑrin guunɔ, kpɑ bu wɑ dɑɑ bɛrɛtɛkɛ kɑ dɑm dɔrenɑɑ ye yɑ wɑ̃ɑ ben suunu sɔɔ.

¹⁰Bɑ ku rɑ kɑ̃ bu geɑ ko. Mɑ bɑ ɑrumɑni gurɑmɔ kɑ dɑm kɑ tɑki, bɑ tɑɑsimɔ ben sinɑ kpɑɑnɔ.

¹¹Yen sɔ̃nɑ kon de yibɛrɛbɑ bu nɑ bu tem mɛ tɑrusi, bu ben dɑm kpeerɑsiɑ. Kpɑ bu ben sinɑ kpɑɑnu kɔsuku. Nɛ, Yinni Gusunɔwɑ nɑ yeni geruɑ.

¹²Wee ye nɑ mɑɑ geruɑ. Nɑ nɛɛ, nge mɛ yɑ̃ɑ kpɑro u rɑ win sɑbenun sukum wɔre gbee sunɔn nɔɔn di, nge mɛyɑ kon bɛɛ Isirelibɑ wɔrɑ bɛɛ be i nɑ i sɔ̃ Sɑmɑriɔ kpin yee burɑnu sɔɔ.

¹³I swɑɑ dɑkio i nɔ kpɑ i Yɑkɔbun bweseru kirɔ ko i bu sɔ̃ ye nɛ Gusunɔ wɔllu kɑ tem Yinni nɑ geruɑ.

¹⁴Nɑ nɛɛ, sɑnɑm mɛ sɔɔ, kon Isirelibɑ sɛɛyɑsiɑ ben durum sɔ̃. Kon Betɛlin yɑ̃ku turɑnu kɔsuku, kpɑ nin kɑ̃ɑnu nu bɔɔkirɑ nu wɔruku.

¹⁵Kon bɛɛn diɑ mi i rɑ n wɑ̃ɑ yɑm susurun sɑɑ kɑ purɑn sɑɑ kɔsuku. Kpɑ n bɛɛn sinɑ kpɑɑnu kɑm koosiɑ ni, ni bɑ burɑru koosi kɑ suunu donnu, kɑ sere dii gee ni nu tie. Nɛ, Yinni Gusunɔwɑ nɑ yeni geruɑ.