Amos 3

1

2

3

4

5

6

7

8

9

¹Dégluleen kàddu gii Aji Sax ji wax ci yeen, bànni Israyil, mu jëm ci seen mboolem xeet wi mu génnee réewum Misra. Mu ne:

²«Yeen doŋŋ laa ràññee ci mboolem askani suuf. Moo tax ma di leen mbugal ndax seen ñaawtéef gépp.»

³Ñaar dina ànd te digewuñub dajee?

⁴Gaynde dina ŋarem ngeer te fàddul? Am gaynde gu ndaw dina xiiroom paxam te jàppul?

⁵Picc dina keppu te fiireesu koo? Am ag fiir dina fettax te jàppul?

⁶Bu liitu xare jibee, waa dëkk ba du tiit a? Am aw ay dina dab ub dëkk te du Aji Sax ji?

⁷Du lenn moos lu Boroom bi Aji Sax ji def, te déeyu ko yonent yiy jaamam.

⁸Bu gaynde yëmmoo, ana ku dul tiit? Ana ku saña baña biral waxyu, bu ko Boroom bi Aji Sax ji waxee?

⁹Yéeneleen ca biir taaxi Asdodd ak ca biir taaxi Misra. Neleen: «Dajeleen ca kaw tundu Samari, ba gis na Samari salfaañoo, ak notaange ga fa nit di daj.

¹⁰Xamuñu sax def njub.» Kàddug Aji Sax jee. «Dañuy jal alalu fitnaak yàqute ci seen biiri taax.»

¹¹Moo tax Boroom bi Aji Sax ji ne: «Ab noon dina gaw seenum réew, néewal leen doole, lël seeni taax.»

¹²Aji Sax ji nee: «Wallub sàmm ak gàtt bu gaynde fàdd weesul ñaari yeel, dogitu nopp. Kuy wallu bànni Israyil ga ca Samareet, xanaa dogu basaŋ, dammitu lal.

¹³Dégluleen te àrtu waa kër Yanqóoba.» Kàddug Boroom bi Aji Sax jee, Yàlla ji ci gàngoori xare yi.

¹⁴«Bés bu may mbugale Israyil ay bàkkaaram, damay tasaale sarxalukaayi Betel. Béjjén yi ci cati sarxalukaay ba dog, rot.

¹⁵Maay màbbaale këru taax ak këru àll; kër yu ñu rafetale bëñu ñay dina yàqu, te kër yu bare dootu taxaw.» Kàddug Aji Sax jee.