Text copied!
CopyCompare
GALA Sɛʋɛi - Ɛgezɔde

Ɛgezɔde 39

Help us?
Click on verse(s) to share them!
1Gezei niiti ti loai ga ma ɓiinii, ta ma ɓɔigi, ta ma ɓɔi sɔsɔgi, naa ɠa ti kpɛtɛni ga zalaɠa ɠula wotii ɠɛ zeɠeiti ada ɲadegai ma vaa ma. Ti ti ɓɛtɛni ga zalaɠa ɠula zeɠe ɲadegaiti Aalɔn ʋɛ, eɠɛʋelei Ɠɔoɠɔ GALAGI ma levei veeni la Moize ya.
2Ti zalaɠa ɠula zeɠei ɓɛtɛni ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai. Ti suʋuni ga zanu galui.
3Ti zanugi ma sɛpɛgiti sumaaleni, ti teʋeleʋe eɠɛ galui, ti gezei zuʋu ga zanu galui, geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai.
4Ti kpakiga zeɠeiti kpɛtɛni ba, ti zeini zalaɠa ɠula zeɠei ɠaaɓelasu felegɔiti da.
5Ti zalaɠa ɠula zeɠei ma lokoi ɓɛtɛni ga ma zii nɔ, eɠɛʋelei Ɠɔoɠɔ GALAGI ma levei veeni la Moize ya. É ɠɛni ga zanugi, ta geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai. Ti ɠɛni ga ani ɠila ta zalaɠa ɠula zeɠei.
6Ti kɔtu zɔngɔ ɓaa felegɔiti kpatani ti-lɔɔzuʋɛti ba, ti ga zanugi, kɔtui nii daaseigi ga wɔnikese, niiti Izelayɛle ná-doun zunuiti daaseigiti ti zɛʋɛni ti ma, eɠɛʋelei nu a ɗa kɔtui zaɠa la, eɠɛ zeeʋozɛba anii.
7Ti ti ɠilini zalaɠa ɠula zeɠei ma ɓakiga zeɠe felegɔiti ba, ti ɠɛ ga Izelayɛle ná-doun zunuiti ta-ɠizɛsui, eɠɛʋelei Ɠɔoɠɔ GALAGI ma levei veeni la Moize ya.
8Ti kakazu zeɠei ɓɛtɛni ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai. Ti suʋuni ga zanu galui, ga zalaɠa ɠula zeɠei ɠɛʋelei.
9Kakazu zeɠei ʋɛɛni su fele, é ɠɛ ga seki naanigi. Sakpai ɠɛni ga zeelo gila, kogi ɠɛ ga zeelo gila.
10Ti kɔtu zɔngɔ ɓaagiti ɲɛkpɛni ba, ma ɲɛkpɛ naanigɔi zu: ma ɲɛkpɛ mɔungi zu, saaledoane gila, tɔpaze gila, ta emelode gila,
11ma ɲɛkpɛi velesiɛi zu, gelenate gila, safiil gila, ta diama ɠila,
12ma ɲɛkpɛi zaʋasiɛi zu, wɔpale gila, agate gila, ta ameetisete gila,
13ma ɲɛkpɛi naanisiɛi zu, kelizɔlite gila, wɔnikese gila, ta zasepe gila. Niima ɠɔtu zɔngɔ ɓaagiti ti ɓatani ti-lɔɔzuʋɛti ba, ti ga zanugi.
14Ti Izelayɛle ná-doun zunuiti daaseigiti sɛʋɛni kɔtu puugɔ maazu felegɔiti (12) ma, eɠɛʋelei nu a ɗa kɔtui zaɠa la, eɠɛ zeeʋozɛba aniiti. Boloda puugɔ maazu felegɔiti (12) daaseigiti ti ɠɛni ti ma, kɔtu ɠila, gila daasei, kɔtu ɠila, gila daasei.
15Ti zanu galu felegɔiti toni kakazu zeɠei ʋa, ti vɛlɛai ga zanu kitei.
16Ti zanu dɔɔzuʋɛ felegɔiti kpɛtɛni ta zanu balaɠae felegɔiti. Ti balaɠae felegɔiti toni kakazu zeɠei woizu felegɔiti ba.
17Ti zanu galu felegɔiti toni balaɠae felegɔiti ba, kakazu zeɠei woizu felegɔiti.
18Ti zanu galu felegɔiti sokpaiti toni dɔɔzuʋɛti felegɔ ʋa, niiti ti ɠiliai zalaɠa ɠula zeɠei ma ɓakiga zeɠe felegɔiti ba, nii a kɛ kakazu zeɠei yɛ ʋelelaʋɛ.

19Ti zanu balaɠae felegɔi ɓɛtɛni mɔnɔ, ti ti lo kakazu zeɠei woizu felegɔi zɔiti ba, koozu ʋelei, ná ʋɛɛzu zalaɠa ɠula zeɠei ma.
20Ti zanu balaɠae felegɔ ɠili kpɛtɛni, ti ti lo zalaɠa ɠula zeɠei ma ɓakiga zeɠe felegɔiti ba, buuʋɛ, ʋelela ʋelei, ti-lodazuʋɛ ɠobaʋɛ, zalaɠa ɠula zeɠei ma lokoi maazu.
21Ti kakazu zeɠei ná-balaɠaegiti gilini zalaɠa ɠula zeɠei ná-balaɠaegiti ba, ga galu ɓiinii, naa ɠa a kɛ kakazu zeɠei ɠɛ zalaɠa ɠula zeɠei ma lokoi maazu, ti yeeɠaa mina ɠwɛ ta zalaɠa ɠula zeɠei. É ɠɛɛni, eɠɛʋelei Ɠɔoɠɔ GALAGI ma levei veeni la Moize ya.
22Ti zalaɠa ɠula zeɠei ma lookɔba wolai ɓɛtɛni, fɛlɛai ɲɛgɛlɛin nɔ ga geze ɓiinii.
23Tookɔba wolai naa ɠɔ teʋezuʋɛ ɠɛni saamaʋɛ, daaɠaleai é ɠaku ma ga seɠei taɠili, naa ɠa a kɛ é mina ʋali ga.
24Gului nii daa ga gelenadegi, naama waai ma votoi ɠa ti gilini tookɔba wolai laamaʋɛ, ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai.
25Ti zanu kitei ma lala koiti kpɛtɛni, ti ti ɠili gelenadegiti zɔɠɔzuʋɛti, é ɠaku tookɔba wolai laamaʋɛ, gelenadegiti zɔɠɔzuʋɛti,
26tala ko ɠila, gelenade gila, tala ko ɠila, gelenade gila, é ɠaku tookɔba wolai laamaʋɛ ma, botii ma vaa zu, eɠɛʋelei Ɠɔoɠɔ GALAGI ma levei veeni la Moize ya.
27Ti seɠewuzeɠeiti kpɛtɛni Aalɔn ta ná-doun zunuiti bɛ, ga geze ʋagɔi,
28ta bɔɔlɔgiti ga geze ʋagɔi, ta ʋɛlɛ kpuɠagiti ga geze ʋagɔi kpaliai,
29ta saamaɠiligiti ga geze ʋagɔi kpaliai, é ga geze ɓiinii, ta ma ɓɔigi, ta ma ɓɔi sɔsɔgi, suʋuai. Ti naa pɛ kpɛtɛni, eɠɛʋelei Ɠɔoɠɔ GALAGI ma levei veeni la Moize ya.
30Ti zanu kitei ma zɛʋɛ goi ɓɛtɛni masa bɔɔlɔ ɲadegai ʋa, ti sɛʋɛni ga: «Feai Ɠɔoɠɔ GALAGI ʋɛ.» Sɛʋɛai eɠɛʋelei nu a ɗa zeeʋozɛba anii maazaɠa la.
31Ti galu ɓiinii lo ba, nii a kɛ ti gili bɔɔlɔgi ʋa, maazuʋɛ, eɠɛʋelei Ɠɔoɠɔ GALAGI ma levei veeni la Moize ya.
32Ʋele ɠana seɠe ʋɛlɛ ɲadegai ma wotii kpein ge ɓeni la, GALA daaɠomi seɠe ʋɛlɛi. Izelayɛle nuiti ti naa kpein kɛɛni, nii Ɠɔoɠɔ GALAGI ma levei veeni Moize ya, ti kɛɛni ɠana nɔ.
33Ti ʋaani ga seɠe ʋɛlɛ ɲadegai Moize ʋɔ: ná-seɠe ʋɛlɛi, ta ná-sɔɔlaiti kpein, kalagiti, kpɛdɛgiti, gulu zɔkpɔiti, tɔkpalaiti, ta dabuiti,
34ta baala sinɛ ɠɔlɔi ma ʋɛɛmazeɠei toai ga ma ɓɔigi, ta nuni ɠɔlɔiti ma ʋɛɛmazeɠei, ta seɠe zuɠooza golai,
35ta zeele woo ɠesui ta ná-gulu zɔkpɔiti, ta dakulugi,
36ta taɓalii, ta ná-sɔɔlaiti kpein, ta ɓuluiti ti veai GALA bɛ,

37ta fitina zei anii é ga zanu kitei, ta ná-fitinaiti, ta ná-sɔɔlaiti kpein, ta fitinai ná-gulɔi,
38ta zalaɠa ɠulazuʋɛ nii zanugi ziɛni maaʋɛ, ta siɛma wulɔ ɲadegai, ta ani maku nɛɛnɛgi, ta seɠe zuɠooza golai é nu lɛɛzuʋɛ seɠe ʋɛlɛi wu,
39ta zalaɠa ɠulazuʋɛ é ga kɔlu ɓɔigi, ta kɔlu vɛlɛai é ga kɔlu ɓɔigi, ta ná-gulu zɔkpɔiti, ta ná-sɔɔlaiti kpein, ta maagba aniɲakai ta ná-seiga anii,
40ta koii ma zasai ma zeɠeiti, ta ma lɔkpalaiti, ta ma labuiti, ta sasai laaʋɛ ma zeɠe zuɠooza golai, ta ná-galuiti, ta ná-suzo kɔluiti, ta seɠe ʋɛlɛ ɲadegai wu wotiɠɛ zɔɔlaiti kpein, GALA daaɠomi seɠe ʋɛlɛi vaa zu,
41ta zalaɠa ɠula zeɠeiti ada ɲadegai vaa ma, zalaɠa ɠula nui Aalɔn ná-seɠeiti, ta ná-doun zunuiti ta-zeɠeiti zalaɠa ɠulazuʋɛ ma wotiiti faa zu.
42Izelayɛle nuiti ti naama wotiiti kpein kɛɛni, é zoloo ma, eɠɛʋelei Ɠɔoɠɔ GALAGI ma levei veeni la Moize ya.
43Moize botii kpein fɛɠɛlɛfɛɠɛlɛni. É kaani ga ti kɛɛʋɛ, eɠɛʋelei Ɠɔoɠɔ GALAGI deveni la. Názu ɠa Moize tuya looni la ti ʋɛ.