Text copied!
CopyCompare
Kâte Bible - Waha Rara

Waha Rara 39

Help us?
Click on verse(s) to share them!
1Eme qoruc keŋkeŋne â âmuc âmucne â bâbâroŋ izi tirificko gie bapare ŋaqi ba akic ehuc ɋâtâmbiŋ, ŋaqi i Wofuŋzi Mose mutâcnecnewec irec sâcko Aroŋte biŋe bambiŋ hâcne.
2Ehuc qoqonaŋ ŋaqi i gol â qoruc furi sâko keŋkeŋne â âmuc âmucne â bâbâroŋ â fâfâsâc izi bambiŋ.
3Erâ gol hejacnerâ bâtâcnepie muc eme izi qoruc keŋkeŋne â âmuc âmucne â bâbâroŋ â fâfâsâc qâreŋnehec bambiŋ.
4Â qoqonaŋ ŋaqire masecne barâ tofanao ʒuhucke itic embiŋ.
5Eme ŋaqio basanaŋkezore bâmbândeŋ‐ticne i wiac izia bakicne, gol â qoruc furi sâko keŋkeŋne â âmuc âmucne â bâbâroŋ â fâfâsâc izi basarickekicne hâcne, ine Wofuŋzi Mose mutâcnecnewec irec sâko bakicne.
6Eme qânâ furi sâko ba akic erâ râqâc kâwinao râepie huwec, eme qânâ furi sâko ira Israe ŋicguru 12 jaŋere ʒâŋe heutuckehuc qâreŋkembiŋ.
7Eme qânâ jajahec i ɋawe ŋifec â ŋifec qoqonaŋ ŋaqi masecne ʒuʒuhuc‐jekicko basanaŋkembiŋ, erâ i Israe ŋic manasuc‐jopahuc juniŋte iŋuc embiŋ; ine Wofuŋzi Mose mutâcnecnewec irec sâcko hâcne.
8Eme amecte qâ i qoqonaŋ ŋaqi iŋucne gol â qoruc furi sâko keŋkeŋne â âmuc âmucne â bâbâroŋ â qoruc fâfâsâc izi ba akic ehuc bambiŋ.
9Ʒoricne â otecne sâcjekic mocjaha, erâ sâcticne i 9 inses bahuc maine â râpene bâturec‐jofarâ bacjofambiŋ.
10Erâ qâ faio qânâ birine 4 birickembiŋ. Biri namba wâŋ ira qânâ furi sâko ʒiŋuc birickepie forawec: Saradiu i qânâ bâbâroŋ, Topazi i qânâ âmuc âmucne,
11Karapuŋke i qânâ ârâŋ ɋâri. Biri namba 2 ira ine qânâ furi sâko kecʒiŋuc râembiŋ: Emerali i qânâ ârâŋ ɋâɋâri, Safiri i qânâ keŋkeŋne â Daemaŋ i qânâ ɋaɋac taeŋne kiruŋ tinac.
12Biri namba 3 ira qânâ furi sâko ʒiŋuc birickembiŋ: Jaʒiŋti i qânâ bâbâroŋ soc tinac bâbâroŋ, Akata i qânâ buge iŋucne â Ametisi i qânâ qondaŋ horiki tinac.
13Biri namba 4 ira ine qânâ ʒiŋuc birickembiŋ: Berili i qânâ bâbâŋeŋ, Onisi i qânâ bâbâroŋ fuŋmoc, erâ Jasipe i qânâ birâ birâ. Erâ qânâ i sasawa râqâc golzi bakicne ira râepie fowec.
14Eme qânâ furi sâko 12 jaŋe ʒâŋe‐jeŋichec sasawa, ʒâŋe i ine Israe ɋâricfâc‐ticne jaŋere sâcko heutuckehuc qâreŋkepie fowec.
15Eme amecte qâ ira gol ɋaɋacnezi muc kâpâcwâru hawari mizekicne i basanaŋkembiŋ.
16Erâ babasanaŋ jajahec â hoŋeŋeŋ jajahec golzi barâ hoŋeŋeŋ i qâ qaŋeŋ jahecnao basanaŋkembiŋ.
17Erâ golzi muc jajahec qâ qaŋeŋnao hoŋeŋeŋ jajahec basanaŋ‐jofakicnao esoriembiŋ.
18Erâ muc tofa jahecne i heheawic jajahec ira basanaŋkembiŋ wâc, ehuc qoqonaŋ ŋaqire masecne mamai fowec ira basanaŋkembiŋ.

19Izi hoŋeŋeŋ jajahec golzia barâ qâ maŋnere qaŋeŋne ŋifec â ŋifec qoqonaŋ ŋaqi heririŋnao basanaŋkembiŋ.
20Erâ gol hoŋeŋeŋ jahec â moc barâ qoqonaŋ ŋaqi ʒuʒuhuc‐ticne juwicpec mamai fowec erâ bâmbândeŋ ba akic ekicne izi basanaŋ‐jofawecko râembiŋ.
21Iŋuc ehuc qâ i qoruc muc keŋkeŋnezi qoqonaŋte hoŋeŋeŋko basanaŋkepie qoqonaŋte bâmbândeŋko fosanaŋkewec. I qâzi qoqonaŋ ŋaqionec ŋetarazacte iŋuc embiŋ. Wiac i Wofuŋzi Mose mutâcnecnewec irec sâcko embiŋ hâcne.
22Eme qoqonaŋ ŋaqi irec juwicnao ŋaqi ʒoricne moc qoruc furi sâko keŋkeŋnezi fumbiŋ.
23Ehuc faic momori jaŋere aeŋ ŋaqi hawecnehec bajumbieŋ iŋuc jaha hawecnehec bambiŋ, erâ tâcnezacte hawecne râreckehuc qaŋeŋne ɋâtâmbiŋ.
24Ŋaqi qaŋeŋne juwicne ira ine jâchândâŋ qâqâtâc qoruc keŋkeŋne â âmuc âmucne â bâbâroŋ izi ba akic ehuc basanaŋkembiŋ.
25Erâ goŋgoŋ gol ɋaɋacnezi bambiŋ. Erâ goŋgoŋ mecne jâchândâŋ qâqâtâc mecne i ŋondeŋko huhuc ɋetickepie ŋaqi qaŋeŋnao rârec rârec waha doma rawec.
26Goŋgoŋ moc â jâchândâŋ qâqâtâc moc, iŋuczi iŋuc ocŋondeŋ taha giere ŋaqi qaŋeŋnao râe rambiŋ, i Wofuŋzi Mose mutâcnecnewec irec sâcko embiŋ hâcne.
27Erâ Aroŋ ŋokâfâcne jaŋere ŋaqi i qoruc fâfâsâc fukicnezi bambiŋ wâc.
28Ehuc maikura â dujeŋic i qoruc fâfâsâczia bambiŋ, â kike ŋaqi‐jeŋic ine qoruc âmuc âmucne fâfâsâczi ɋâtâmbiŋ.
29Umbika ine qoruc fâfâsâc â qoruc furi sâko keŋkeŋne â âmuc âmucne â bâbâroŋ izi ba eric embiŋ; i Wofuŋzi Mose mutâcnecnewec irec sâcko embiŋ hâcne.
30Erâ tiri masapu i gol ɋaɋacnezi barâ irec fainao dâŋ ʒiŋuc heutuckehuc qâreŋkembiŋ: “Wofuŋte erâ bâtirikicne”.
31Erâ masapu i muc keŋkeŋnezi bândeŋnerâ maikura fainao basanaŋkembiŋ, i Wofuŋzi Mose mutâcnecnewec irec sâcko embiŋ hâcne.
32Iŋuc epie tiri bozere gie sasawa tarawec. Ehame Israe ŋic ŋokac jaŋe Wofuŋzi Mose dâŋ âzâcne mutâc ewec sâc i mana rereŋ efârehuc iŋuc hâcne embiŋ.
33Tarame tiri boze Moserao bafisimbiŋ. Wiac kecʒiŋuc bafisimbiŋ hâcne: Qoruc boze â wâcwiac‐ticne sasawa, heheawic‐ticne, katapa‐ticne, babasanaŋ‐ticne, wâtuŋ‐ticne, râqâc‐ticne,
34bupure qoruc lama â noniŋ sahaczi bakicne â peŋzi rikekicne, erâ ââketâc qoruc i mâmâc.
35Qorac tapa katapa â reŋticne erâ tapane,
36tebo â wâcwiac‐ticne erâ poroŋ furu mukicne;

37erâ lambe dodoma gol ɋaɋacnezi bakicne sohocne â râqâc kâwinehec, â wâcwiac‐ticne sasawa erâ tatamacte wokemaŋ.
38Alata golzi bakicne i â rurua wokemaŋ erâ wiac âsu biaŋ, erâ qoruc boze motâcte qoruc.
39Alata aeŋ bâbâroŋzi bakicne â sapa‐ticne aeŋ bâbâroŋzia bakicne, reŋticne â gie bapare wiac sasawa, wiac ʒuʒure râqâc sâko â kikene mâmâc.
40Hae ʒoŋa sâpere qoruc â katapa â râqâc‐ticne â hae ʒoŋa motâcte qoruc, erâ muc â fâzâ wiac‐ticne, erâ tiri boze, tutumaŋ qoruc boze hâcne irec maŋnao gie bapare wâcwiac sasawa.
41Tirificko gie bapare ŋaqi ba akic ehuc ɋâtâkicne, taha bapa Aroŋ ere tiri ŋaqi â ŋokâfâcne jaŋere taha giere ŋaqi hâcne.
42Wofuŋzi Mose dâŋ mutâcnecnewec irec sâcko Israe ŋic ŋokac jaŋe gie iŋuc hâcne bafârembiŋ.
43Eme Mose e wiac ebac embiŋ i sasawa hone‐fârerâ ʒiŋuc hâcne mana tarawec: Wofuŋzi muwec irec sâcko jâmbâŋ efârekicne. Iŋuc manarâ jambuŋ‐jopawec.