1عِسَ تٌ عَ قْشِرَبِرّ قُ نُن قِرِنيِيٍ مَلَن، عَ نَشَ سّنبّ نُن نْي قِ عٍ مَ عَلَكٌ عٍ شَ نْ حِننّيٍ كٍرِدٍ مِشِيٍ قْشْ رَ، عٍ مَن شَ نْ قُرٍ مَ مْولِ بِرِن نَيَلَندٍ.
2عَ نَشَ عٍ شّي مِشِيٍ كَوَندِدٍ عَلَ شَ مَنفّيَ نِينِ شَ مَسٍنيِ رَ، عٍ مَن شَ قُرٍ مَيٍ رَيَلَن.
3عَ نَشَ عَ مَسٍن عٍ بّ، «وٌ نّ بِيَاسِمَ، وٌ نَشَ سٍسٍ شَنِن وٌ شُن مَ، عَلْ شُلِ، فبْنقْي، تَامِ، كْبِرِ، شَ نَ مُ عَ رَ دٌنمَ قِرِن ندٍ.
4وٌ نَ سٌ بَنشِ نَشَن كُي، وٌ شَ يِفِيَ مّننِ نّ هَن وٌ سَ سِفَمَ تَا فبّتّ تّمُي نَشّ.
5شَ نَ تَاكَيٍ مُ وٌ رَ سّنّ، وٌ شَ كٍلِ نَا. وٌ شَ مّننِ بّندّ رَكْنكْن وٌ سَنيِيٍ رَ، عَ شَ قِندِ سٍيدٍحْشْيَ رَ عٍ بّ، وٌ بَرَ عٍ رَبٌلٌ.»
6نَ كُي، عِسَ قْشِرَبِرّيٍ نَشَ سِفَ، عٍ سَ تَايٍ بِرِن عِسَ. عٍ نُ مِشِيٍ كَوَندِ مَ عَلَ شَ شِبَارُ قَنيِ رَ، عٍ نُ قُرٍ مَيٍ رَيَلَن يِرٍ بِرِن.
7فَلِلٍ مَنفّ هٍرٌدٍ تٌ قٍ بِرِن مّ نَشٍيٍ نُ رَبَقٍ عَ شَ بْشِ مَ، عَ نَشَ عِقُ عِسَ شَ قٍ رَ، بَرِ مَ ندٍيٍ نُ عَ قَلَمَ عَ يَيَ شُنشَ نَن كٍلِشِ قَشّ مَ،
8ندٍيٍ عَ قَلَ عَ عَننَبِ عٍلِيَ نَن فبِلٍنشِ، ندٍيٍ عَ قَلَ عَ نَمِحْنمّ فبّتّ نَشَن نُ نَ دُنِحّ تّمُي دَنفِشِ، نَ نَن مَن كٍلِشِ.
9هٍرٌدٍ نَشَ عَ قَلَ، «يَيَ تَن، ﭑ بَرَ نَ شُنيِ بٌلٌن عَ دّ عِ. كْنْ ندٍ قَ يِ تَن نَ، ﭑ نَشَن شَ قٍ مّمَ يِ كِ؟» نَ كُي، عَ نَشَ سٌ كَتَقٍ عَ شَ عِسَ تٌ.
10شّيرَيٍ تٌ فبِلٍن، عٍ قٍ نَشٍيٍ رَبَشِ، عٍ نَشَ عَ بِرِن دّنتّفّ سَ عِسَ بّ. عَ قَن نَشَ عٍ شَنِن بٍتٍسَيِدَ عٍ شَ لُ عٍ شَتِ مَ يِرٍ كٍرٍن.
11كْنْ حَمَ تٌ عَ كٌلٌن، عٍ نَشَ بِرَ عِسَ قْشْ رَ. عَ قَن نَشَ عٍ رَلَن، عَ وْيّن عٍ بّ عَلَ شَ مَنفّيَ نِينِ شَ قٍ رَ، عَ قُرٍ مَيٍ رَيَلَن.
12نُنمَرٍ تٌ سٌ قْلْ، عِسَ قْشِرَبِرّ قُ نُن قِرِنيِيٍ نَشَ عٍ مَسٌ عَ رَ، عٍ عَ قَلَ عَ بّ، «حَمَ رَيٍنسٍن عَلَكٌ عٍ شَ سَ سٌ تَايٍ نُن دَاشَيٍ نَشٍيٍ نَ بٍ رَبِلِنيِ، عٍ شَ سَ يِفِيَدٍيٍ نُن دٌنسٍيٍ قٍن، بَرِ مَ وٌن نَ وُلَ نّ يِ كِ.»
13عِسَ نَشَ عَ قَلَ عٍ بّ، «وٌ تَن نَن شَ دٌنسٍ قِ عٍ مَ.» عَ قْشِرَبِرّيٍ نَشَ عَ يَابِ، «سٍسٍ مُ نَ مُشُ يِ بَقٍ تَامِ سُولِ نُن يّشّ قِرِن نَ. كَ مُشُ تَن نَن شَ سِفَ دٌنسٍ سَرَدٍ يِ حَمَ بِرِن بّ؟»
14مِشِيٍ نَشٍيٍ نُ نَ نَا، شّمّيٍ كْنتِ نَشَ سِفَ هَن وُلُ سُولِ حْندْن. عِسَ نَشَ عَ قَلَ عَ قْشِرَبِرّيٍ بّ، «وٌ عَ قَلَ مِشِيٍ بّ عٍ شَ دْشْ عٍ تٌنفٌ سُولِ سُولِ مَ.»
15عٍ قَن نَشَ عَ رَبَ نَ كِ، عٍ مِشِ بِرِن نَدْشْ.
16عِسَ نَشَ نَ تَامِ سُولِ نُن نَ يّشّ قِرِن تٌنفٌ، عَ عَ يَ رَتٍ كٌورٍ مَ، عَ قَ عَلَ نُوَلِ سَ. عَ نَشَ تَامِيٍ عِفِرَ، عَ قَ عٍ سٌ عَ قْشِرَبِرّيٍ يِ رَ، عَلَكٌ عٍ شَ عٍ عِتَشُن حَمَ مَ.
17حَمَ بِرِن نَشَ عٍ دّفٍ هَن عٍ وَ سَ. دٌنسٍ دْنشْي شُنتُنيِيٍ تٌ مَتٌنفٌ، دٍبٍ قُ نُن قِرِن نَن نَقٍ.
18لْشْ ندٍ عِسَ نُ نَ عَلَ مَشَندِقٍ عَ شَتِ مَ. عَ قْشِرَبِرّيٍ قَن نُ نَ نَا. عَ نَشَ عٍ مَشْرِن، عَ نَشّ، «مِشِيٍ مُنسٍ قَلَمَ ﭑ مَ قٍ رَ؟ ندٍ لَنشِ ﭑ مَ؟»
19عٍ نَشَ عَ يَابِ، «ندٍيٍ عَ قَلَمَ، عَننَبِ يَيَ شُنشَ. ندٍيٍ عَ قَلَمَ، عَننَبِ عٍلِيَ. ندٍيٍ عَ قَلَمَ، نَمِحْنمّ فبّتّ نَشَن قَشَ وَشَتِ دَنفِشِ، نَ نَن مَن كٍلِشِ.»
20عِسَ مَن نَشَ عٍ مَشْرِن، «كْنْ وٌ تَن نَشّ دِ؟ ندٍ ﭑ نَ؟» ثِيّرِ نَشَ عَ يَابِ، «عَلَ شَ مِشِ سُفَندِشِ نَن نَ عِ رَ.»
21عِسَ نَشَ عَ مَتِنتِن عٍ رَ، عَ عٍ يَمَرِ، عٍ نَشَ عَ شَ قٍ قَلَ مِشِ يٌ بّ.
22عَ مَن نَشَ عَ مَسٍن عٍ بّ، «قٌ عَدَ مَ شَ دِ شَ تْورّ فبٍفبٍ سْتْ. يُوِقِيٍ شَ قٌرِيٍ، سّرّشّدُبّ كُنتِفِيٍ، نُن سّرِيّ كَرَ مْشْيٍ مُ قَمَ لَدٍ عَ رَ، عٍ عَ قَشَمَ نّ، كْنْ عَ مَن شَ كٍلِ قَشّ مَ عَ شِ سَشَن ندٍ.»
23عِسَ نَشَ عَ مَسٍن بِرِن بّ، «شَ مِشِ وَ بِرَقٍ ﭑ قْشْ رَ، عَ شَ تٌندِ عَ يّتّ مَ، عَ شَ تِن تْورّ نُن قَشّ رَ لْشْي بِرِن، عَ بِرَ ﭑ قْشْ رَ.
24مِشِ نَشَن وَ مَ عَ يّتّ رَكِسِقٍ، نَ كَنيِ لْيمَ نّ. نَشَن عَ يّتّ رَلْيمَ ﭑ تَن مَ قٍ رَ، نَ كَنيِ كِسِمَ نّ.
25دُنِحَ بِرِن سْتْي مُنسٍ قَنمَ مِشِ مَ، شَ عَ سِفَمَ يَهَننَمَ؟
26نَشَن يٌ يَافِمَ ﭑ تَن نُن ﭑ مَ وْيّنيِ شَ قٍ رَ، ﭑ تَن عَدَ مَ شَ دِ قَمَ عَ نْرّ كُي تّمُي نَشّ نُن عَ بَبَ عَلَ نُن عَ شَ مَلٍكّ سّنِيّنشِيٍ شَ نْرّ، ﭑ قَن يَافِمَ نّ نَ كَنيِ شَ قٍ رَ.
27ﭑ شَ نْندِ قَلَ وٌ بّ، مِشِ ندٍيٍ تِشِ وٌ يَ مَ بٍ، نَشٍيٍ مُ قَشَمَ قٌ عٍ عَلَ شَ مَنفّيَ نِينِ تٌ.»
28يِ مَسٍنيِ دَنفِ شَنبِ شِ سٌلٌمَسَشَن حْندْن، عِسَ نَشَ ثِيّرِ، يَيَ، نُن يَكِ شَنِن فٍيَ قَرِ عَلَ مَشَندِدٍ.
29عِسَ تٌ نُ عَلَ مَشَندِقٍ، عَ يَتَفِ نَشَ مَسَرَ. عَ شَ دُفِيٍ قَن نَشَ قِيشّ عَلْ نَءِيَلَنيِ.
30نَ تّمُي، عَننَبِ مُنسَ نُن عَننَبِ عٍلِيَ نَشَ مِنِ عٍ مَ، عٍ نُن عِسَ نَشَ وْيّن.
31عٍ مِنِ نْرّ شُنفبٍ نَن كُي، عٍ نُ وْيّنقٍ عِسَ بّ عَ شَ قَشّ شَ قٍ مَ، نَشَن نُ قَقٍ كَمَلِدٍ دَرِ سَلَمُ.
32شِ شْلِ نُ بَرَ نْ ثِيّرِ نُن عَ بٌورٍيٍ رَ، كْنْ عٍ تٌ شُنُ، عٍ نَشَ عِسَ شَ نْرّ تٌ، عَ نُن نَ شّمّ قِرِن نَشٍيٍ نُ نَ عَ قّ مَ.
33نَ شّمّ قِرِنيِيٍ تٌ نُ كٍلِقٍ عِسَ شُن، ثِيّرِ نَشَ عَ قَلَ عَ بّ، «مَرِفِ، قٍ قَنيِ نَ عَ رَ مُشُ تٌ نَ بٍ يِ كِ. مُشُ شَ لِنفِرَ سَشَن يَءِلَن، كٍرٍن عِ فبٍ، كٍرٍن عَننَبِ مُنسَ فبٍ، كٍرٍن عَننَبِ عٍلِيَ فبٍ.» ثِيّرِ مُ نُ عَ كٌلٌنشِ عَ نُ سٍسٍ نَشَن قَلَقٍ.
34عَ تٌ نُ نَ وْيّنقٍ، نُشُي نَشَ فٌرٌ عٍ مَ. ثِيّرِ نُن عَ بٌورٍيٍ نَشَ فَاشُ عٍ تٌ عَ تٌ نُشُي بَرَ دِن عٍ مَ.
35شُي ندٍ نَشَ مِنِ نُشُي كُي، عَ عَ مَسٍن، «ﭑ مَ دِ نَن يَ، ﭑ مَ مِشِ سُفَندِشِ. وٌ وٌ تُلِ مَتِ عَ رَ.»
36نَ شُي تٌ فّ وْيّندٍ، عٍ نَشَ عِسَ تٌ عَ كٍرٍن. عَ قْشِرَبِرّيٍ قٍ نَشَن تٌشِ عٍ يَ رَ، عٍ نَشَ دُندُ عَ قٍ مَ، عٍ مُ عَ قَلَ مِشِ يٌ بّ نَ وَشَتِ.
37نَ كُيٍ عِبَ، عِسَ نُن عَ قْشِرَبِرّيٍ نَشَ فٌرٌ فٍيَ قَرِ، حَمَ فبٍفبٍ نَشَ قَ عَ رَلَندٍ.
38نَ تّمُي، شّمّ ندٍ نَشَ عَ شُي عِتٍ حَمَ تَفِ عِسَ مَيَندِقٍ رَ، «كَرَ مْشْ، يَندِ، قَ ﭑ مَ دِ شّمّ مَتٌ، بَرِ مَ يِ دِ كٍرٍنيِ نَن نَ ﭑ بّ!
39عَ مَتٌ، حِننّ نَن نَ عَ قْشْ رَ. عَ نَ كٍلِ عَ رَ، عَ سْنشْمَ نّ، عَ عَ رَكٍتُن عَ رَ، ﭑ مَ دِ دّشُنقّ نُ قَ مِنِ. عَ مُ عَ بّحِنمَ مَقُرٍن، قٌ عَ فّ عَ رَهَلَكِدٍ.
40ﭑ بَرَ عِ قْشِرَبِرّيٍ مَيَندِ عٍ شَ يِ حِننّ كٍرِ عَ قْشْ رَ، كْنْ عٍ مُ نْشِ.»
41عِسَ نَشَ عٍ يَابِ، «وٌ تَن بْنسْي دَنشَنِيَتَرٍ، وٌ كٌبِ. ﭑ شَ لُ وٌ سّيتِ مَ هَن مُن تّمُي؟ ﭑ شَ تِ وٌ بُن مَ هَن مُن لْشْي؟ وٌ قَ نَ دِ رَ ﭑ شْن.»
42عَ حَن مُ نُ عِسَ يِرٍ لِ سِندٍن، حِننّ نَشَ دِ رَبِرَ بْشِ مَ، عَ عَ رَكٍتُن عَ رَ. كْنْ عِسَ تٌ حِننّ يَمَرِ، دِ نَشَ يَلَن، عِسَ قَ عَ رَفبِلٍن عَ بَبَ مَ.
43حَمَ بِرِن نَشَ كَابَ عَلَ شَ سّنبّ مَ. بِرِن تٌ نُ كَابَشِ عِسَ وَلِ قْشِ بِرِن مَ، عَ نَشَ عَ قَلَ عَ قْشِرَبِرّيٍ بّ،
44«وٌ تَن شَ يِ مَسٍنيِ نَن نَمّ عَ قَنيِ رَ؛ عَدَ مَ شَ دِ سَمَ نّ مِشِيٍ بّلّشّ.»
45كْنْ عٍ مُ نَ وْيّنيِ قَهَامُ، بَرِ مَ عَ نُ بَرَ نْشُن عٍ مَ عَلَكٌ عٍ نَشَ عَ كٌلٌن. عٍ مَن مُ سُو سَ عِسَ مَشْرِندٍ عَ مَ.
46عِسَ قْشِرَبِرّيٍ نَشَ سٌ وْيّنيِ كُي، عٍ شَ عَ كٌلٌن نَشَن تِدٍ فبٌ عٍ يَ مَ.
47كْنْ عِسَ تٌ نُ عٍ بْحّ مَ قٍ كٌلٌن، عَ نَشَ دِ مّدِ ندٍ تٌنفٌ، عَ عَ تِ عَ قّ مَ.
48عَ نَشَ عَ مَسٍن عٍ بّ، «مِشِ يٌ نَشَن يِ دِ مّدِ مْولِ رَ سّنّمَ ﭑ شِلِ رَ، نَ كَنيِ بَرَ ﭑ تَن يّتّ يَتِ رَ سّنّ. مِشِ يٌ نَشَن ﭑ تَن نَسّنّ، نَ كَنيِ بَرَ ﭑ شّيمَ قَن نَسّنّ. نَشَن قِندِشِ مِشِ شُرِ رَ وٌ بِرِن يَ مَ، عَ تَن نَن تِدٍ فبٌ.»
49يَيَ نَشَ عَ يَابِ، «كَرَ مْشْ، مُشُ بَرَ شّمّ ندٍ تٌ عَ حِننّ كٍرِ مَ مِشِ قْشْ رَ عِ شِلِ سَابُي رَ. مُشُ بَرَ كَتَ عَ شَ بَ نَ مَ، بَرِ مَ عَ مُ بِرَشِ وٌن قْشْ رَ.»
50عِسَ نَشَ عٍ يَمَرِ، «وٌ نَشَ عَ رَتْن، بَرِ مَ شَ نَشَن مُ كٍلِشِ وٌ شِلِ مَ، نَ تَن نَ وٌ تَن نَ بّ.»
51وَشَتِ تٌ نُ بَرَ مَكْرّ عِسَ شَ تٍ كٌورٍ، عَ نَشَ نَتّ تٌنفٌ عَ شَ دَرِ سَلَمُ كِرَ سُشُ.
52عَ نَشَ مِشِ ندٍيٍ شّي عَ يَ رَ. عٍ تٌ سِفَ، عٍ نَشَ سٌ سَمَرِ تَا ندٍ عٍ شَ سَ يِفِيَ ندٍ قٍن عَ بّ.
53كْنْ نَاكَيٍ مُ تِن عَ رَ سّنّدٍ بَرِ مَ عَ نُ سِفَقٍ دَرِ سَلَمُ نّ.
54عَ قْشِرَبِرّيٍ يَيَ نُن يَكِ تٌ نَ قٍ تٌ، عٍ نَشَ عَ قَلَ عَ بّ، «مَرِفِ، مُشُ شَ يَامَرِ قِ تّ شَ فٌرٌ كٍلِ كٌورٍ، عَ شَ عٍ رَتْن؟»
55كْنْ عِسَ نَشَ عَ يَ رَقِندِ عٍ مَ، عَ وْيّن شْرْشْي قَلَ عٍ بّ.
56نَ تّمُي، عٍ نَشَ سِفَ تَا فبّتّ.
57عٍ تٌ نُ كِرَ شْن مَ، شّمّ ندٍ نَشَ قَ عَ قَلَ عِسَ بّ، «عِ سِفَ دّدّ، ﭑ نَ عِ قْشْ رَ.»
58عِسَ نَشَ عَ يَابِ، «شُلُمَسٍ شِمَ يِلِ كُي. شْنِ شِمَ عَ تّي كُي. كْنْ دّدّ مُ نَ عَدَ مَ شَ دِ بّ عَ عَ شُنيِ سَمَ دّننَشّ.»
59عِسَ مَن نَشَ عَ مَسٍن مِشِ فبّتّ ندٍ بّ، «بِرَ ﭑ قْشْ رَ.» كْنْ عَ كَنيِ نَشَ عَ يَابِ، «مَرِفِ، عَ لُ ﭑ شَ سِفَ، ﭑ شَ سَ ﭑ بَبَ رَفَتَ سِندٍن.»
60عِسَ نَشَ عَ يَابِ، «عَ لُ قَشَمِشِيٍ نَن شَ عٍ شَ قَشَمِشِيٍ رَفَتَ. عِ تَن شَ سِفَ، عِ شَ سَ مِشِيٍ كَوَندِ عَلَ شَ مَنفّيَ نِينِ رَ.»
61مِشِ فبّتّ قَن نَشَ عَ قَلَ عَ بّ، «مَرِفِ، ﭑ بِرَ مَ نّ عِ قْشْ رَ، كْنْ عَ لُ ﭑ شَ سِفَ ﭑ شْنيِ، ﭑ شَ سَ ﭑ حُنفُ ﭑ مَ مِشِيٍ مَ.»
62كْنْ عِسَ نَشَ عَ يَابِ، «مِشِ يٌ نَشَن سَارِ سُشُمَ عَ نُ قَ عَ شَنبِ مَتٌ، عَ كَنيِ مُ دَشَ عَ شَ وَلِ سُشُ عَلَ شَ مَنفّيَ نِينِ بّ.»
