1Talotaṉa hola nia Zona sapu lopu huaria e Zihova sa vasileana lavata pa Ninive, ke bugoro si asa.
2Ke varavara guahe si asa, “Zihova, asa mo sapu gunia rau totoso lopu ele taluarae mae rau, sapu kote gua asa si evaṉia Goi. Gua asa ke podeke sisigitia rau pude govete la pa Sipeini! Gilania rau sapu Agoi si na Tamasa tataru, na taleosae. Doduru totoso si aqa va ṉoṉo, meke tataru na vatukana si Goi, meke doduru totoso si hoke va namanama si Goi pude hobea sa Mua binalabala pude lopu va kilakilasa.
3Ke gua asa si Mu va malumau mo Zihova, maqu mate mo. Leana hola koa rau si pude maqu mate mo, hola nia si pude toa,” gua se Zona.
4Meke olaṉa la koasa se Zihova, “Lopu pada bugoro si goi.”
5Meke ene vura la pa vasileana pa kali gasa rimata se Zona meke la habotu. Tavetia sa si keke heriheri huda meke habotu aqoro nana; aqania sa sapu gua kote ta evaṉa koasa vasileana Ninive.
6Beto asa si va toqolia e Zihova Tamasa si keke huda hite sapu ululu hola nia se Zona pude va aqoria si asa. Qetu hola nia Zona sa huda asa.
7Ba pana munumunu vaqavaqasa pa koivugona, si garunia Tamasa si keke nokinoki meke la gani va matea sa huda aqaqoro.
8Ke sipu gasa sa rimata, si garunu mae nia Tamasa si keke givusu maṉinina pa kali gasa rimata, ke namu tata mabubulu mate se Zona koasa maṉinina sa rimata pu ṉada gore mae pa batuna, ke okoro hiva mate nana mo se Zona. “Leana hola si pude mate hola nia si pude toa,” gua si asa.
9Ba zama la koasa sa Tamasa, “Lopu pada pude bugoro nia goi sa huda.” Meke olaṉa se Zona, “Pada hola pude bugoro si rau, meke mate pa binugoro!” gua si asa.
10Meke zama la koasa se Zihova, “Sa huda aqaqoro hie si toa keke boṉi mo meke mate nana mo pa koivugona; loketoṉa tavete nia goi si asa, meke lopu hite agoi va toaia ba talotaṉa nia tu goi!
11Ba sa vasileana Ninive si arileana hola pude talotaṉa nia Rau; sina koa dia vasina si ka keke gogoto hiokona puta tina koburu pu loke dia sinea, meke gua tugo sari na kurukuru ṉame!” gua sa Tamasa.
