1Ɩ́ sɑ Tɑcɑɑ, ɩ́ sɛɛ-ɩ. Mpi tɔ, ɩ kɛ́ kʋpɑŋ. Ɩ kʋpɑntʋ wɛ tɑm tɔɔ kɛ́.
2Aweɣelɛ ɩ təmɑ sɔsɔɔnɑ tɔm yɔɣɔtʋlʋ? Nɑ ɩ sɑmtʋ tənɑ kpɑɑllʋ?
3Mpɑ pɑ təŋəɣɩ tɑmpɑnɑ nɑ pɑ́ lɑkɩ kʋsiɣisim kɛ tɑm tɔɣɔlɛ leleŋ nɩɩlɑɑ.
4Tɑcɑɑ tɔɔsɩ mɑ tɔɔ. Mpi tɔ, n sɔɔlɑ nyɑ́ yəlɑɑ. Pɑɑsənɑ-m nyɑ́ wei n wɑɑsəɣɩ tɔ.
5Wɑɑsɩ-m nɑ mɑ́ nɑ́ nyɑ́ ləsəlɑɑ təcɑɣɑnɑʋ. Ɩlɛnɑ mɑ́ nɑ nyɑ́ yəlɑɑ tɑ́ lɑŋɑ hɛɛ. Nɑ mɑ́ nɑ-wɛ tə́ yɔɔlɩ.
6Tə pəntɑɑ kɛ́ ɩsɩɩ tɑ́ cɑɑnɑɑ. Tə lɑpɑ ɩsɑɣɑtʋ, tə lɑpɑ mpi pə tɑ kɛɛsɩ tɔ.
7Tɑ́ cɑɑnɑɑ tɑɑ cɛkənɑ nyɑ́ piti təmɑ kɛ Icipiti. Pɑ tɑ tɔɔsɩ nyɑ́ kʋpɑntʋnɑɑ tuutuumɑ tɔɔ. Hɑlənɑ pɑ́ kʋlɩ nyɑ́ tɔɔ kɛ́ teŋku kʋsɛɛm nɔɣɔ.
8Pɑɑ nɑ mpʋ n yɑpɑ-wɛɣɛ nyɑ́ hətɛ tɔɔ sɩ nyɑ́ toŋ ɩ́ nɑ́.
9Ḿpʋɣʋ n nyɑɑsɑ teŋku kʋsɛɛm nɑ ɩ́lɛ́ ɩ nyɔɔ. N yelɑɑ nɑ nyɑ́ yəlɑɑ tɔ lumɑŋ sɔsɔɔŋ tɑɑ ɩsɩɩ wʋlɑɣɑ tɛtʋ tɑɑ.
10N yɑpɑ tɑ cɑɑnɑɑ kɛ mpɑ pɑɑ cɑɑkɩ-wɛ tɔ pɑ niŋ tɑɑ. N hɛtɑ-wɛɣɛ pɑ kolontu səkpɑŋ tɑɑ.
11Lʋm tɔɣɔ pɑ kolontunɑɑ tənɑɣɑ, pə tɑ sɔɔ pɑɑ kʋlʋm.
12Tənɑɣɑlɛ pɑ tɛmɑ pɑ tɑɑ nɑ nyɑ́ tɔm, nɑ pɑ́ sɑ-ŋ nɑ yontu.
13Amɑ pɑ sɔɔ kpɑkpɑɑ kɛ nyɑ́ təmɑ, pɑ tɑ tɑŋ sɩ pɑ́ nɑ́ ɑ tɛɛsʋɣʋ.
14Ḿpʋɣʋ pɑ nyɩɩlɑ teu sɩ pɑ́ hiki mpi pɑ fɛɩnɑ tɔɣɔ wʋlɑɣɑ tɛtʋ tɑɑ. Ɩlɛnɑ pɑ́ cɑɑ-ŋ tɔm kɛ tɛtʋ pooluŋ nyəntʋ tɑɑ.
15N hɑ-wɛɣɛ pɑ kʋsələməm nɑ pɑ́ tɔɣɔ nɑ pɑ́ hɑɣɑ nɑ pə́ lɩɩ-wɛɣɛ sɔŋ.
16Ḿpʋɣʋ pɑ lɑpɑ Moisi kɛ ɩsɛsɛɛmlɛ kɛ təsikile, nɑ Alɔŋ wei ɩ kɛ́ yʋlʋ nɑŋŋ tʋ tɔ.
17Tənɑɣɑlɛ tɛtʋ hɑɑ nɔɣɔ nɑ tə́ li Tɑtɑŋ nyə́mɑ nɑ tə́ wɑɑsɩ Apilɑm nyə́mɑ tɔɔ.
18Kɔkɔ nyɑɣɑ pɑ kpekəle, kɑ niisɑ ɑsɑɣɑɑ mpɛ.
19Ḿpʋɣʋ pɑ lupɑ nyəɣəlʋɣʋ kɛ nɑule kɛ Holɛpʋ pʋɣʋ tɔɔ, nɑ pɑ́ luŋ nɑ pɑ́ sɛɛ-tɛ.
20Pɑ kpɑɣɑ nɑʋ wei ɩ tɔkɩ nyɩɩtʋ tɔɣɔ, nɑ pɑ́ lɛɛtɩ Ɩsɔ teeli tʋ nyɑ́ nyɑ́ lonte tɑɑ.
21Pɑ sɔɔwɑ pɑ wɑɑsʋlʋ Ɩsɔ nyɑ́ nyɑ́ tɔɔ, pə́cɔ nyɑ́ lɑpənɑ-wɛɣɛ təmɑ sɔsɔɔnɑ,
22kɛ Kɑm nyə́mɑ tɛtʋ tɑɑ, nɑ piti təmɑ kɛ teŋku kʋsɛɛm tɑɑ.
23Ḿpʋɣʋ Tɑcɑɑ nyɑ́ n yɔɣɔtɑ pɑ kpiisuɣu tɔm, Moisi pɑɑsi. Amɑ nyɑ́ kʋləsʋ Moisi tike səŋnɑ nɑ ɩ́ tɛɣɛ-ŋ niŋ nɑ Ɩsɔ kʋ ɩ pɑ́ɑ́nɑ́ kɛ wɑkəlʋɣʋ tɔm tɑɑ.
24Ɩlɛnɑ pɑ́ lɔ tɛtʋ kʋpɑntʋ nti Ɩsɔ nyɑ́ n kɑ hɑ-wɛ tɔ. Pɑ tɑ tʋnɑ Tɑcɑɑ nyɑ́ nyɑ́ nɔɣɔ sɩɩʋ tɔtɔ.
25Ntɛnɑ pɑ́ kʋntɩ pɑ tɛɛsɩ tɑɑ, nɑ pɑ́ kisi Tɑcɑɑ nyɑ́ nyɑ́ nɔɣɔ kɛ nɩɩnɑʋ.
26Tənɑɣɑlɛ n kʋsɑ niŋ nɑ ɩsɔ nɑ ń tuu sɩ n kɑ́ yele nɑ pɑ́ sɩ́ wʋlɑɣɑ tɛtʋ tɑɑ.
27Nɑ ń yɑsɩ pɑ lʋlʋŋ kɛ pɑɑ timpi, nɑ ń yele nɑ pɑ́ sɩ́ mɑ tɑ nyɩ ɩsɔnɑɑ tɛ.
28Ḿpʋɣʋ Ɩsɛɣɛlɩ nyə́mɑ luŋɑ Peyɔɔ nyə́mɑ tʋɣʋ Pɑɑlɩ. Ɩlɛnɑ pɑ́ tɔɣɔ nɑntʋ nti pɑ lɑɑwɑ sətɑɑ tɔ.
29Pɑ kpɑɑsɑ Tɑcɑɑ nyɑ́ pɑ́ɑ́nɑ́ nɑ pɑ kʋlɑpʋtʋ ntɩ. Ɩlɛnɑ nyɑɑ kɔnɑ wɑhɑlɑ kɛ pɑ tɔɔ.
30Ḿpʋɣʋ Pɛnhɑsɩ kʋlɑɑ nɑ ɩ́ tɑɣɑnɩ-tɩ. Ɩlɛnɑ mpusi ɩnɩ ɩ́ hɛɛ.
31Ḿpʋɣʋ Tɑcɑɑ nyɑ́ nyənɑ yɑɑsi ɩnɩ sɩ ɩ wɛ teu kɛ tɑm tɔɔ.
32Mpɛ pɑ kpɑɑsənɑ Tɑcɑɑ nyɑ́ nyɑ́ pɑ́ɑ́nɑ́ kɛ Melipɑ lʋm kiŋ. Ɩlɛnɑ Moisi tɔɣɔ pə sɑləkɑ kɛ pɑ nyʋɣʋ tɔɔ.
33Pɑ nyəŋsɑ ɩ ɩsɛ nɑ ɩ́ kpisi kɑntəlʋɣʋ, ɩlɛnɑ ɩ́ yɔɣɔtɩ tɔm ɩ tɑ mɑɣɑsɩ.
34Ɩsɛɣɛlɩ nyəmɑ tɑ kʋ Kɑnɑɑŋ nyə́mɑ ɩsɩɩ Tɑcɑɑ kɑ heeluɣu-wɛ tɔ.
35Amɑ pɑ kpɛntənɑ piitimnɑɑ lɛlɑɑ kɛ́ nɑ pɑ́ kpɛləmɩ pɛlɛ pɑ kʋlɑpəlɛ.
36Hɑlənɑ pɑ́ luŋ pɑ tɩɩŋ nɑ pɛlɛ pɑ́ nyɩ-wɛɣɛ kɑtɔkɑ nɑ pɑ́ hoti kɑ tɑɑ.
37Nɑ pɑ́ lɑɑ pɑ pəyɑlɑɑ nɑ pɑ pɛɛlɑɑ kɛ pɛlɛ pɑ tɩɩŋ.
38Pɑ kʋwɑ pɑ piyɑ kɛ mʋsʋŋ kɛ Kɑnɑɑŋ tɩɩŋ tɛɛ nɑ pɑ yʋlʋkʋlɛ ntɛ́ tə́ pilisɑ tɛtʋ.
39Pɑ təmɑ lɑpɑ-wɛɣɛ ɑsilimɑ nyə́mɑ nɑ pɑ lɑkɑsɩ pəsɩ-wɛ ɩsɩɩ wɑsɑŋkɑlənɑɑ.
40Ḿpʋɣʋ Tɑcɑɑ nyɑ́ nyɑ́ tɑɑ kpɑnɑ nyɑ́ yəlɑɑ mpɑ pɑ kɛ́ nyɑ́ kpɑncoou tɔ nɑ pɑ́ lɩɩ-ŋ sɔŋ.
41Ɩlɛnɑ ń tʋ-wɛɣɛ piitimnɑɑ niŋ tɑɑ nɑ pɛlɛ pɑ tɑɑ kpɑnɑ-wɛ nɑ pɑ́ ŋmɑkəlɩ-wɛ.
42Nɑ pɑ kolontunɑɑ muɣuli-wɛ nɑ pɑ́ tʋ-wɛɣɛ wɑhɑlɑ.
43Tɔm pɑɣɑlɛ kɛ Tɑcɑɑ n wɑɑsɑ-wɛ. Pɑɑ nɑ mpʋ nɑ pɑ́ kʋləɣɩ nyɑ́ tɔɔ kɛ́ tɑm. Ɩlɛnɑ pɑ́ kɑmɑ nyɔɔŋ kɛ pɑ ɩsɑɣɑtʋ tɑɑ.
44Ḿpʋɣʋ Tɑcɑɑ n nɩɩwɑ pɑ wulɑ nɑ ń nɑ́ pɑ lɑŋpəsəlɛ.
45Ɩlɛnɑ ń hʋʋ nyɑ́ nɑ-wɛ mə nɔɣɔ pɛɛlʋɣʋ tɔm. Nɑ pɑ tɔm lɑ-ŋ pətɔɔtəlɛ kɛ nyɑ́ kʋpɑntʋ sɔsɔɔntʋ tɔɔ.
46Nɑ ń yele nɑ mpɑ pɑɑ kpɑ-wɛɣɛ yomle tɔ pɑ tɔm lɑ-wɛɣɛ ɩsəkilim.
47Tɑcɑɑ tɑ́ Ɩsɔ wɑɑsɩ-tʋ, nɑ ń ləsɩ-tʋɣʋ piitimnɑɑ tɑɑ nɑ ń kpeɣeli-tʋ. Ɩlɛnɑ tə́ sɑ nyɑ́ hətɛ nɑŋŋ nyəntɛ nɑ tə́ pɛɛkɩ teeli kɛ nyɑ́ sɑmtʋ tɑɑ.
48Ɩsɛɣɛlɩ Ɩsɔ Tɑcɑɑ tə sɛɛ-ŋ tɑm tɔɔ. Yəlɑɑ tənɑ ɩ́ tisi sɩ Ɩsɔ ɩ́ kɔnɑ mpʋ. Ɩ́ sɑ Tɑcɑɑ.
