1Madaydayaw din Apo! Man-iyaman kayon Diyos tan siged sisya, magay pap-eng din adi manbalbaliw ay layad na.
2Ay wada aya di makaibaga amin sin nakaskasdaaw ay inam-amag na? Sino ngata di mabalin ay mandayaw ay kosto en sisya?
3Nagasat din mantongpal sin bilina ay kanayon ay din kosto di amagena.
4Nemnemem komas sak-en, Apo, sin pamadangam si ipogaw mo. Omitapi ka koma sin pangisalakanam en daida
5ta ilaek din somigedan di biyag da ya makiragsakak sin peteg ay ragsak da gapo ta ipogaw mos daida.
6Nanbasol kami ay kaman din aam-a mi, lawa kayman di inam-amag mi.
7Sin kawadan di aam-a mi ed Egipto, adi da inawatan din nakaskasdaaw ay inam-amag mo. Nilinglingan da din namin ado ay nangipailaam en daida si layad mo. Sik-a ay Kangatoan yan kinontra da sin Baybay ay Mandalangdang ay kanan da.
8Ngem olay siya di, insalakanas daida ta ipaila na din kaeegyat ay panakabalina ta say madaydayaw din ngadana.
9Binilina din Baybay ay Mandalangdang et namgaan tet-ewa. Inpango na ay manbalasat din ipogaw na et namgaan di nandad-anan da.
10Insalakanas daida sin panakabalin di kalaban da.
11Ngem din kalaban da et nalned da, magay olay esa ay nabay-an en daida.
12Pag patien din ipogaw na din inbaga na et nankanta da ay nangidayaw en sisya.
13Ngem nilinglingan da ay dagos din inamag na, adi da anosan ay sed-en din plano na.
14Sin lugar ay magay omili, palalo di aklong da et si Diyos yan pinadas da.
15Et indawat na din kindaw da, ngem inpawada na abe di kaeegyat ay sakit da.
16Idi inapalan di odom da Moses en Aaron ay pinili na,
17nan-ekang din lota et inokmona da Datan en Abiram ya din gagait da.
18Nawaday apoy ay binmaba sin pasolot da, et pinooana nan managbasol ay nay da.
19Nan-amag dad Sinai si balitok ay sinan baka et say dinaydayaw da.
20Nanlaslasinen da mo din kinadiyos na din ladawan di baka ay logam di kankanena.
21Nilinglingan da si Diyos ay nangisalakan en daida, ed Egipto yan nakaskasdaaw di inam-amag na.
22Nakaskasdaaw din inamag na sin sana ay ilin Ham ya sin Baybay ay Mandalangdang.
23Idi kanan Diyos en dosaena din ipogaw na, nakikali si Moses en sisya ta adi na itoloy ay dosaen daida gapo sin bonget na.
24Nilalasoy da din maymayat ay daga, tan adi da nantalek sin kari na.
25Nanmaymayotmot da sin kampo da, adi dan pinatpati din kali na.
26Isonga insapata na ay dosaenas daida ta sin lugar ay magay omili et say kateyan da
27ya pansisianena sin kailiili din poli da.
28Idi siya di, ed Peor yan nakidaydayaw da en Baal ya nangan da si naidaton si didiyosen ay magay biyag na.
29Inpabonget das Diyos gapo sin inam-amag da, et nawada di kaeegyat ay sakit en daida.
30Ngem pinmika si Finehas et dinosa na din binmasol en daida, pag somaldeng din sakit ay sana.
31Et maibilang di ay kinalinteg na engganas tapin di agew ay magay pap-eng na.
32Inpabonget das Diyos sin kad-an di obbog ed Meriba et nadosas Moses gapo en daida.
33Tan si Moses et palalo ay inpabonget da et adi nan inannadan din kinali na.
34Adi da pinse din nanasyon ay inbilin Diyos ay peslen da,
35ngem nakiasawa da et en daida et tinadon da din am-amagen da.
36Dinayaw da din didiyosen da et kaman tagdey ay say nadadaelan da.
37Sin dimonyo yan indaton da din lallalaki ya babbabai ay an-ak da.
38Pinse da san aan-ak da ay magay basol da, et kinmadodogis din daga begew sin basol da ay sana.
39Kinmadodogis da begew sin inamag da, kaiarigan da di manakikamalala.
40Isonga binmonget si Diyos sin ipogaw na ya kalkaliget nas daida.
41Binaybay-ana ay abaken di odom ay nasyon daida ya inturayan din kalaban da.
42Pinalpaligat din kalaban da, dadlon dan inturayan daida.
43Namin ado ay insalakanas daida, ngem paagposen da din komontraan dan sisya et nadadael din biyag da gapo sin basol da.
44Ngem olay siya di, dinnge na din adawag da et inila na din ligat da.
45Gapo en daida, ninemnem na din intolag na, et ginedngana din ligat da gapo sin dakdake ya adi manbalbaliw ay layad na.
46Inturong na ay seg-angan din am-in ay akin balod en daida.
47Yahweh ay Diyos mi, isalakan mo kod dakami ya taoliem dakami ay mapo sin kailiili ta man-iyaman kamin sik-a ay nasantoan di ngadana ya maragsakan kami ay mangidayaw en sik-a.
48Madaydayaw ka si eng-enggana, Yahweh ay Diyos di Israelita. Amin koma ay ipogaw yan “Amen,” kanan da. Madaydayaw din Apo.
