1Ousipwe mwareiti ewe Samol mi Lapalap. Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
2Iö a tongeni apworausa än ewe Samol mi Lapalap föför mi manaman? Iö a tongeni anafa an mwareiti i?
3Ra feiöch chokewe mi aleasochisi an kewe allük o föri mine a pwüng fansoun meinisin.
4Ai Samol mi Lapalap, kopwe chechemeniei, lupwen ka pwäri om kirikiröch ngeni noum aramas. Kopwe pwal ochueilong, lupwen ka amanaueer,
5pwe üpwe tongeni küna feiöchün noum kewe mi fil o eti chon mwum lon ar pwapwa, üpwe pwal eti noum aramas kana le mwareituk.
6Äm aia tipis usun chök äm kewe lewo. Äm aia föri föför mi ngau o apwönüetä föför esepwüng.
7Lupwen äm kewe lewo ra nom lon Isip, resap ekieki än Kot kewe föför mi amwarar, resap pwal chechemeni an tong ellet mi lapalap, nge ra ü ngeni Ewe mi Unusen Tekia me arun ewe Setipar.
8Nge Kot a amanaueer fän püsin itan pwe epwe pwärätä an manaman mi pöchökül.
9A allük ngeni ewe Setipar pwe a pwasatä, a emwenirelong epin ewe matau usun lon eu fanüpwas.
10A amanaueer seni chon pälüeniir o angaseer seni chon oputeer.
11Ewe sät a pwölüela ekewe chon ü ngeniir, pwe esap wor eman mi chüen manau.
12Mürin, ra lükü an kewe kapasen pwon o kölün mwareiti i.
13Nge chon Israel ra müttir manlükala an kewe föför, resap awiti an öüröür.
14Ra fokun mwäräkich me lon ewe fanüapö o sotuni Kot lon ewe fanüpwas.
15Iei mine a ngeniir mine ra tüngor, nge a pwal tinato eu mätter mi afeiengau leir.
16Ikenan lon ewe fanüapö ekoch me leir ra lolowo ngeni Moses me Aaron, ätewe ewe Samol mi Lapalap a apini.
17Mürin, ewe pwül a sangfesen o oromala Tatan, a pwal pwölüela Apiram me an we mwich.
18Ekkei a pwal ngetewu me lein chokewe mi etiir o kenala ekewe aramasangau.
19Iwe, ra föri eu uluulun nienifön kow me lon Horep o fel ngeni ewe uluulun anümwäl seni mächä.
20Ra akasiwili ewe lingen Kot ngeni uluulun eman kow mi mongö fetil.
21Ra manlükala Kot ar Chon Amanau mi föri föför mi manaman me lon Isip.
22A föri föför mi amwarar me ikenan, pwal mettoch mi eniwokus me arun ewe Setipar.
23Iei mine Kot a apasa pwe epwe aroserela. Nge Moses nöün we chon angang mi fil a ütä lefiler me Kot, pwe epwe asepa an lingeringer, pwe esap aroserela.
24Mürin, ra oput ewe fanü mi mürina, resap lükü an we pwon.
25Ra ngününgün me lon imwer imw mangaku, nge resap aleasochis ngeni alon ewe Samol mi Lapalap.
26Iei mine Kot a aitietä pöün o pwon fän akapel ngeniir pwe epwe nirela me lon ewe fanüapö,
27epwe atoropasafeili mwirimwirir lein chon ekewe mwü pwe repwe mäla lon ewe fanüen chon ekis.
28Mürin, ra fiti ekewe aramas mi fel ngeni Paal me lon Peor o mongö ekewe föten anü ra eäni asor ngeni ekewe kot ese wor manau lor.
29Ra asonga ewe Samol mi Lapalap ren ar kewe föför, pwe eu mätter a terifetal leir.
30Mürin, Pinehas a ütä o apwüngü ekewe mi tipis, pwe ewe mätter a ükütiu.
31Iwe, ren ei föför Pinehas a küna pwüng me ren Kot seni eu täppin aramas tori eu täppin tori feilfeilachök.
32Iwe, chon Israel ra asonga Kot me arun ekewe kolukun Meripa. Moses a küna riaföü watte pokiter,
33pun ra achouu lelukan pwe a ssela an fos.
34Iwe, chon Israel resap pwal arosala chon ekewe mwü usun ewe Samol mi Lapalap a allük ngeniir.
35Nge ra pwüpwülüfengen me chon ekewe mwü o föri sokun föför usun mine ir ra föri.
36Ra fel ngeni ar kewe uluulun anümwäl, nge ekewe uluulun anümwäl ra wiliti eu likatup ngeniir.
37Ra eäni asor nöür kewe ät me nengin ngeni ekewe anün rochopwak.
38Ra niela nöür kewe ät me nengin esap wor ar tipis, o eäniir asor ngeni ekewe uluulun anümwäl än chon Kanaan. Iwe, ewe fanü a limengau ren ei sokun föför.
39Iei usun ra limengau ren ar föför o kirikiringau ngeni Kot ren ar lapalap usun lapalapen eman fin lisowu.
40Iei mine ewe Samol mi Lapalap a fokun song ngeni nöün aramas, pwe a fokun anioputäsiniir.
41A asechirela fän nemenien chon ekewe mwü, pwe chokewe mi oputeer ra nemeniir.
42Iwe, chon oputeer ra ariaföüür o atolongeer fän ar nemenem.
43Fän chomong Kot a angaserela, nge ra chök sopwela le ü ngeni. Iwe, ra sapwilitiu pokiten ar tipis.
44Iei mwo nge Kot a chök ekieki ar riaföü, lupwen a rongorong ar siö.
45A chechemeni an pwon fän äsengesiir, lon an tong ellet mi lapalap a liamamala ren mine a föri ngeniir.
46A föri pwe chokewe meinisin mi liapeniir o uweerela lon ekewe fanü mi toau repwe tongeer.
47Ai Samol mi Lapalap äm Kot, kopwe amanauakem o achufengenikem seni me lein chon ekewe mwü, pwe aipwe kilisou ngonuk o mwareiti itom mi pin.
48Oupwe mwareiti ewe Samol mi Lapalap, ewe Koten Israel seni fansoun esepop tori fansoun esemüch. Iwe, ekewe aramas meinisin repwe apasa, “Amen.” Ousipwe mwareiti ewe Samol mi Lapalap.
