1Aleluya! À Dii sáabu kɛ, zaakɛ à maa, à gbɛ̃kɛɛ yãana vĩro.
2Dé bé eé fↄ̃ à Dii yãbitakɛnanↄ oo? Dé bé eé fↄ̃ à à táaki lɛ́ píngii?
3Aubarikadeenↄn gbɛ̃ kɛ̀ aↄ̃è yã kɛ a zɛ́anↄ ũ, kɛ̀ aↄ̃è yã maaa kɛ gurↄ píngi.
4Tó nɛ́ɛ à nnaa kɛɛ n gbɛ̃nↄnɛ, ǹ tó ma yã gↄ̃ dↄngu, Dii, tó nɛ́ɛ ń mì sii, ǹ ma wɛ́ɛ gwa,
5lɛ ma baka e àgↄ̃ kú n gbɛ̃nↄ nnamanan, mà pↄnnaa kɛ kↄ̃n borii kɛ̀ n ń sɛ́nↄ, lɛ mɛ́ n táaki lɛ́ n gbɛ̃ pìnↄ tɛ́.
6Wa durun kɛ̀ lán wa dezinↄ bà, wa taari kɛ̀ wa yã zaaa kɛ̀.
7Kɛ̀ wa dezinↄ kú Igipiti, aↄ̃ↄe Dii dabuyãkɛnanↄ yã daro, gbɛ̃kɛyã parii kɛ̀ à kɛ̀ńnɛnↄ sã̀ńgu, ben aↄ̃ swãgbãaa kɛ̀ Isia Tɛ̃aa saɛ.
8Baa kↄ̃n beeeo à ń mì sì a tↄ́ yãnzi, lɛ à à gbãa bíta ↄdↄa.
9À kpã̀kɛ̃ Isia Tɛ̃aazi, ben gukori bↄ̀, à gɛ̃̀ńyo à wɛ̀ɛn, aↄ̃ bikũ̀ lán wà be gbáan bà.
10À ń bↄ́ ń ibɛɛnↄ ↄzĩ, à ń sí ń zangurinↄ gbãaaa.
11Í dà ń wɛdɛrinↄla, baa aↄ̃ gbɛ̃ mɛ̀n do èe bↄro.
12Ben aↄ̃ à yã kɛ̀ à ò sì, aↄ̃ à táaki lɛ̀.
13Mↄde à yãkɛnanↄ sã̀ńgu gↄ̃ↄ, ben aↄ̃ↄe zɛ lɛ à lɛ́ daḿmaro.
14Aↄ̃ pↄ́ble pãnde ni dɛ̀ gbáan, ben aↄ̃ Dii yↄ̃̀ wà gwà sɛ̃̀tɛ gwe.
15À pↄ́ kɛ̀ aↄ̃ wɛ́ɛ kɛ̀a kpàḿma, ben à mɛ̀'ibabagyãa zĩ̀ḿma.
16Aↄ̃ nↄ̀sɛgↄ̃aanↄ kpà kↄ̃n Musao bùran kↄ̃n Aruna kɛ̀ kú adona Diinɛo.
17Tↄↄtɛ pàra à Datani mↄ̀, à sìkↄ̃rɛ Abiramua kↄ̃n a gbɛ̃nↄ.
18Tɛ́ fɛ̀ɛ aↄ̃ ìbanↄ tɛ́, tɛ́nɛnɛ gbɛ̃ zaaanↄ blè.
19Aↄ̃ mↄ̀ pì zaa Orɛbu lán zùswaree bà, aↄ̃ dↄnzi kɛ̀ ń tãa kɛ̀ aↄ̃ↄ pìnɛ.
20Aↄ̃ Luda Gakuide lendee kpà kↄ̃n zù sɛ̃̀sori takao.
21Aↄ̃ sã̀ Luda ń mìsiri yãn, kɛ̀ à yã bítanↄ kɛ̀ńnɛ zaa Igipiti,
22kɛ̀ à dabuyãnↄ kɛ̀ Hamu boriinↄ bùsun, kɛ̀ à naasiyãnↄ kɛ̀ Isia Tɛ̃aazi.
23Beee yãnzin à bè é a gbɛ̃nↄ kaatɛ, ben Musa kɛ̀ à à sɛ̀ kpànɛ, à tò à pↄↄ kpàɛ, èe gàa à ń kaatɛro.
24Aↄ̃ kya kà bùsu nidee mↄ̀n, aↄ̃ gì Dii yã náanɛ kɛzi.
25Aↄ̃ yãbuu tã̀ ń bisakutaanↄ guu, aↄ̃ↄe dↄ Dii yãziro.
26Ben à ↄ dↄ̀ à la dàńnɛ à bè, é tó aↄ̃ gaga gbáan,
27é tó aↄ̃ boriinↄ gaga boriinↄ tɛ́, é ń fãakↄ̃a bùsunↄ guu.
28Aↄ̃ dↄ̀ Peo tãazi, aↄ̃ pↄ́ kɛ̀ wà saa òo pↄ́gɛnↄa blè.
29Aↄ̃ yãkɛnanↄ Dii pↄↄ fɛ̃̀, ben gagyãa sìńgu.
30Finɛasi fɛ̀ɛ à yã pì mì zↄ̃̀, ben gyãa pì zɛ̀.
31Ben Dii tò yã bↄ̀o nna, à bà kúo ai à boriia.
32Aↄ̃ Dii pↄↄ fɛ̃̀ Mɛriba í kiia, ben yã bↄ̀ Musao zaa aↄ̃ yãnzi.
33Zaakɛ aↄ̃ à nↄ̀sɛ yàka, ben à yã ò laasuulɛna sai.
34Aↄ̃ↄe bùsu pì deenↄ kaatɛ lán Dii dìɛńnɛ nàro.
35Aↄ̃ yã̀kↄ̃tɛ kↄ̃n borii pìnↄ, aↄ̃ ń fɛɛakaara zɛ́kpaɛ sɛ̀.
36Aↄ̃ dↄ̀ ń tãanↄzi, ben yã pì gↄ̃̀ńnɛ takutɛɛ ũ.
37Aↄ̃ ń nɛ́gↄ̃gbɛ̃nↄ kɛ̀ sa'opↄ ũ, aↄ̃ saa ò tãanↄa kↄ̃n ń nɛ́nↄgbɛ̃nↄo.
38Aↄ̃ taarisaideenↄ kòto kpàkpa, aↄ̃ nɛ́gↄ̃gbɛ̃nↄ kↄ̃n ń nɛ́nↄgbɛ̃ pìnↄ. Aↄ̃ saa òńyo Kanaa bùsu tãanↄa, ben aↄ̃ bùsu pì gbãsĩ kɛ̀.
39Aↄ̃ gbãsĩ lɛ̀ ń yãkɛnanↄ yãnzi, aↄ̃ gↄ̃̀ náanɛsaideenↄ ũ ń yãkɛnanↄa.
40Ben Dii pↄfɛ̃ fɛ̀ɛńzi, à ye gbɛ̃ kɛ̀ à ń sɛ́nↄ kãzi dↄro.
41À ń ná boriinↄnɛ ń ↄzĩ, ben aↄ̃ zangurinↄ kí blè ń musu.
42Aↄ̃ ibɛɛnↄ gbãaa mↄ̀ńnɛ, aↄ̃ ↄ tↄ̃̀ḿma.
43Ègↄ̃ ń bↄↄ gɛ̃̀n baaagↄ̃, mↄde aↄ̃ zɛ̀ kↄ̃n ń swãgbãakɛnao, ben aↄ̃ sↄ̃̀ɛ ń durun yãnzi.
44Baa kↄ̃n beeeo tó à ń wiii mà, è ń nawɛ̃akɛna yã da.
45Aↄ̃ yãnzi è dↄ a bà kuunańyo yãn, è a nↄ̀sɛ liɛ a gbɛ̃kɛ bíta yãnzi.
46À tò gbɛ̃ kɛ̀ aↄ̃ ń kũkũ zĩ̀zↄ ũunↄ ń wɛ̃nda gwà.
47Dii wa Luda, ǹ wa mì sí! Ǹ wa bↄɛ boriinↄ tɛ́ ǹ wa kakↄ̃a, lɛ wà n tↄ́ kɛ̀ kú adona bↄ wà ĩa dã kↄ̃n n táakilɛnao.
48Aubarikade Dii, Isarailinↄ Luda zaa káaku ai gurↄ píngi! Gbɛ̃ píngi be aami! Aleluya!
