1Wofuŋ mumbiaŋkeniŋ! Wofuŋ daŋge âzâcneniŋ, e uruc jauŋ‐ticnehec, â aki anonoc‐ticne fofo sanaŋ foocmu.
2Mozi Wofuŋte eebapa tâpirinehec i sâcne mutaniŋkeocmu, me ʒâŋe biŋe‐ticne mutaniŋkeme sâckeocmu?
3Tiŋnere hata âteeŋgopieŋ jaŋere manape ʒerine ekac, dameŋ sâc wiac etiŋnehuc eeŋgopieŋ jaŋere hâcne.
4O Wofuŋ, go ŋicfâcge âgo ejarecmuo nore manasuzemec, jaŋe batarac‐jopacmuo no wâc baficnuzemec.
5Eme no bâwosâecfâcge mâriri‐jeŋic hone aŋac ezepac, ehuc ŋicfâcge bubiaŋ manapie ʒeri ezepac, â merâfâcfâcge jaŋehec mu ʒeri ezepac.
6Mimiŋnefâc‐nâŋec jaŋe sâqocne bambiŋ nâŋe ijaha embeŋ, nâŋe bahac bâfuambeŋ, erâ wâc sindaŋ embeŋ.
7Mimiŋnefâc‐nâŋec jaŋe Aigita mâreŋko jumbiŋ, ira Anuture mâsi bapa hone qâoma embiŋ, â fehuc ehâmo‐jarewec irec mi manasumbiŋ, erâ Hâwec Bâbâroŋko Femicne sâko pepec ecnembiŋ.
8Eme e sifu ʒâŋe biŋe‐ticnere erâ bafic‐jopawec, ehuc tâpiri sâko‐ticnere fuŋne bataniŋkewec.
9E Hâwec Bâbâroŋ haneckeme kereŋkewec, eme ʒâkâŋko, mâreŋ burocnao tinac jowac‐jopawec.
10Iŋuc ehuc râsi jaŋere ŋezic‐jopawec, â kisâfâc‐jeŋic jaŋere meonec batarac‐jopawec.
11Eme hâweczi râsifâc‐jeŋic qofac‐jopawec, jaŋeraonec moczi tiwâne mi juwec.
12Iŋuc fuame dâŋticne mana ʒakiembiŋ, â mumumbiaŋ gae hecnembiŋ.
13Erâ ine gie bawec irec biac nikec‐jopawec, â mumutâc dâŋticnere woŋec mi jumbiŋ.
14Jaŋe mâreŋ tuhuo andac sâko ehuc, Anutu mâreŋ sawao esâickembiŋ.
15Eme wiac numucnembiŋ i jarewec, erâ ine huc ima‐ticnehec mume fisi jopawec.
16Eme guru‐jeŋickonec gâcnezi Mose iiŋguuŋ ecnepie, â Wofuŋte tiriŋic Aroŋ mana sâqorecnepie,
17mâreŋzi micne aŋkerâ Dataŋ ɋâckewec, erâ wâc Abiram qâjâpecfâcne hemac‐jopawec.
18Erâ ʒoczi ŋondeŋ‐jeŋicko bâruŋkerâ, ŋic sindaŋ hârindaŋne ʒâseŋ‐jopawec.
19Jaŋe Horebe tikifuŋko bulimakao motec barâ, ɋâŋ qâqâtâc mai‐ticnao dunduŋ humbiŋ;
20jaŋe Anuture eri tatamac qikiŋnehuc, bulimakao kecɋaŋ nânâ ere hawari sâsembiŋ.
21Jaŋe Anutu bâbâpiaŋ‐jeŋicte nikec‐jopawec, e Aigita mâreŋko gie sâko bawec irec manapie wahawec;
22e Hamte mâreŋko â Hâwec Bâbâroŋko, mâsi bipinehec bawec i mana suambiŋ.
23Eme bâsirowec‐jopaocte mume, Mose, bâwosâec‐ticne, eki sacfozic ejarerâ oso bahuc, kimbeŋ‐ticne bâmâteŋkeme furu jumbiŋ.
24Eme jaŋe mâreŋ biaŋ i qikiŋnembiŋ, ehuc mumupaŋ dâŋticne mi mana ʒakiembiŋ;
25qoruc boze‐jeŋicko kâroŋ qahuc fombiŋ, â Wofuŋte marac fânâŋte hazec mi râembiŋ.
26Eme mâreŋ tuhuo sipiric‐jopaocte, mene bâfeŋnehuc mupaŋke‐jarewec.
27Ehuc ɋâricfâc‐jeŋic qâpuc ŋondeŋko bâtâtiec‐jopahuc, mâreŋne mâreŋne râec‐jopa raocte muwec.
28Eme jaŋe Baali Peoro nemu erao qohotambiŋ, â hâmokicne tiwâ bâzi ejarekicne i nâhuc jumbiŋ.
29Iŋuc ehuc Wofuŋ maŋticne bâiŋnembiŋ; eme ŋondeŋ‐jeŋicko hucukic sâqocne moc fuawec.
30Eme Pinehasizi fahare sacfozic ejareme, huc hâmoc qaʒue wahawec.
31E iŋuc ewecte mimiŋzi ɋâric, tatara tâmiric manacnepie biaŋkewec.
32Izi Meriba opâo kimbeŋ‐ticne bâiŋnepie, jaŋere erâ Mosezi wiac eme sâqorewec.
33Jaŋe Mâro‐ticne râŋgeŋkecnembiŋte, Mosezi dâŋ fâfâcnehec muwec.
34Jaŋe Wofuŋte mumutâc dâŋ qatarahuc, qâpuc guru mi bâsirowec‐jopambiŋ.
35Mâcne, jaŋe jaŋehec sisifuc epie, eebapa‐jeŋic qazu‐jarepie ijaha embiŋ.
36Ehuc nemuɋâŋfâc‐jeŋic kiŋaŋ qajarembiŋ; eme izi bitiŋ ejarewec.
37Jaŋe otâ ŋokâfâc‐jeŋic demoŋ bâzi rike‐jarembiŋ.
38Iŋuc ehuc soc bahacmâc hoŋkembiŋ, otâ ŋokâfâc‐jeŋic jaŋere soc hâcne. I Kanaaŋ mâreŋte nemu bâzi rike‐jarembiŋ, eme irec socte kiŋzi mâreŋ sâweckewec.
39Wiac i ehuc wâwânâŋ sâko bâfuambiŋ, â ʒâʒâfic ekicne i hetâcnembiŋ.
40Eme Wofuŋte kimbeŋzi ŋicfâcne bâruŋke‐jarewec, â fuŋfuŋfâcne jaŋere mamakâckewec.
41Irec qâpuc jaŋere meo râec‐jopame, qaisoc‐jopambiŋzi ŋicwofuŋ ejarembiŋ.
42Râsifâc‐jeŋic jaŋe hâcne ro waha âte ejarekupie, rurumaŋ‐jeŋicko huacbucne erâ jumbiŋ.
43Eki gâbâ batarac‐jopa jujec; ehame jaŋe ine pepec ecne jumbieŋ; ekupie hehesic‐jeŋiczi qa bâutuc ejarewec.
44Eme kio owa‐jeŋiczi ra bâfuame sâc, sifu fific guguriŋkonec hone bafic ejare jujec.
45E jaŋere erâ ʒâʒâfic‐ticnere manasu jujec, â buuruc sâko‐ticnere sâcko busâqoc mana‐jare jujec.
46Ehuc niŋgiŋko bacjopa jumbiŋ jaŋe ejareme, iŋuc jaha busâqoc mana‐jare jumbieŋ.
47O Wofuŋ Anutu‐nâŋec, go bafic‐nâpoc, â qâpuc jaŋeraonec henusuc‐nâpoc; eme nâŋe tiri ʒâŋege daŋge âzâcnenʒepeneŋ, â mumbiaŋguhuc mu ʒeri enʒepeneŋ.
48Wofuŋ, Israere Anutu, e muteŋkezo. Dameŋ tâmirickonec ewarekicne, i foraku dameŋ tâmirickoa tarazejec. Ŋic ʒeŋgoma munʒepieŋ, “Jâmbomac.” Wofuŋ mumbiaŋkeniŋ!
