Godigo Nogi Ugwaba Sabo Tęąbi Po Wabo Buku Dabe 106

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

67

68

69

70

71

72

73

74

75

76

77

78

79

80

81

82

83

84

85

86

87

88

89

90

91

92

93

94

95

96

97

98

99

100

101

102

103

104

105

106

107

108

109

110

111

112

113

114

115

116

117

118

119

120

121

122

123

124

125

126

127

128

129

130

131

132

133

134

135

136

137

138

139

140

141

142

143

144

145

146

147

148

149

150

¹Genuai Bidigo nogi ugwaba sao. Dago agaba usu da waiyąo, magi baso meni agai te wiegi yai kolesaga sesemane ebo dao, tama agai da sesemane bidada peyu, bidada pabo wei mu ebo dao.

²Dego te agai genuai sę dabe yali po pusaibawe? Tama dego agai te wiegi yai kolesaga yalide te agai nogi ugwaba saibawe?

³Te agai po wali peyu, te doloba pai kolesaga ebo bidi dabe augwa te pemene yao.

⁴Genuai Bidi, nago te naga we bidi dabe tau sabo sogo, nago ena me homugo koneao. Tama nago augwali ma sabo sogo, nago te ena me ma sao.

⁵Eno te nago hani bage te bugagia dugulama, tama te wiegi yai nai dabe sabo suabo homu yai, tama eno augwali dali wiegi yai pemene yabo homu yali. Dago te pemene yaibao, magi baso meni, da te nago hani bidibao.

⁶Dago te dwai sę yalio, te polobadu dago wąį nǫų dabego yali tiwai sę yalio. Dago te dwai sę haniani yai.

⁷Te Isipde te wąį nǫų dabego te nago yali genuai sę dabe te bugagia me konesiąwai. Nago augwali hauwa sogo tau sali, te nago augwali wei mu ebo homu te augwaligo koneai. Tiali goli, augwa te homu tagalu, tama augwali te nosa elaluali tamu ąįba sabolali sogo, augwa te nage Tigidali Bomo Elalubo Godiba hagoma yai dao.

⁸Tiali goli, Genuai Bidigo te aga genuai bomo augwaliba ola mawainu yali. Tama tiyu, agai augwali ma selama, tama augwali me dolobeo, te agai augwaliba dąų walali po tiwai gilama yali.

⁹Agai te nosa elaluali tamu ąįba po bomonama obaso, tama tamu ąį te wa pai tǫ tiwai pedelali. Tama agai te we bidi dabe peyu, tama augwa te tamu ąį nogegi pali, te bidi te wa pai tǫdu pabo tiwai ąǫ yai dao.

¹⁰Agai augwali te augwa boi bidi dabego nogode ma sali. Agai augwali tąu selama, tama te boi bidi dabego augwali me dolobeo.

¹¹Tiali goli, te węgo te boi bidi dabe mesega selama, tama augwali isai dao. Tama me deli te bidibo ula me elalubeo.

¹²Genuai Bidigo tama tibaso, tama aga we bidi dabe augwaligo augwa te agai dąų walali poba homu kęą pelama, tama augwa tęąbi wabode te agai nogi ugwaba sabo po walio.

¹³Tiali goli, polo tama mu, te augwaligo Genuai Bidigo yali sę dabede homu kone ebo tagalalio. Tama augwaligo te Godigo po bolo hasia me sabeo. Augwaligo yali sę dabe te augwa homugo digi nigilama yalio.

¹⁴Te masigi tǫ wa pai bulude, augwaligo haliga te tuabo naiba homu hogodalu, tama augwaligo te God usu sai dao.

¹⁵Augwaligo Godiba te nai po hanalubaso, tama agai augwaliba mawai, tiali goli, agai te genuai gasi augwaliba pedalumainu ilalio.

¹⁶Augwali te wa pai bulu pesagede bidalu, tama bidi mebago te Moses de Aron sigo ebo sęde pesa homu yalio, te bidi si te Genuai Bidigo sę yali sę bidi si dao.

¹⁷Tialima, genuai dedage te tǫde pedelama, tama Datan dali, Abiram, me te augwa si hani dabe dali, augwali te dedageba tulaluama, tama te tǫ pania selama, tama augwali mesega sai dao.

¹⁸Tama augwali wali pali bidi dabeba te sia tulaluama, tama te siago te dwai sę yali we bidi dabe ulai dao.

¹⁹Augwali te bulu du Horepde bidalu, tama augwa te bulmakau me deli te golgo nigilama, tama augwa te tibo godiba lotu wai dao.

²⁰Augwaligo te nosa tubo bulmakau piksa selama, tama augwa teba lotu wali. Te kolesagago augwaligo te Godigo genuai nogi aiyaba elalubo sę yali.

²¹Godigo te Isipde bomai sę mu elama, tama te Israel dabe te Isip dabego nogode ma dobola sali. Tiali goli te Israel dabego te tiali sę te homu kone me palubeo.

²²Godigo te genuai polalubo bomai sę dabe te Isipde yali, tama te nosa yai tamu ąįde te agai gasagi yai sę mu yalio, tama te we bidi dabe dwai noma mu sai dao.

²³Tialima, me sogo nosali Godigo te aga we bidi augwali dolaibao po wali. Tiali goli, Moses, te Godigo dąį muani sę bidi, aga te God geduba doligi pelama, tama agai te Israel dabe tau siyu, tama Godigo haliga sębę yali togolama panibaso, tama Godigo augwali me dolobeo.

²⁴Tama nosali augwaligo te wiegi yai tǫ wei isiąwai, magi baso meni, augwaligo te Godigo dąų walali poba homu kęą pabeo.

²⁵Augwali te ugwa bede bidalu, tama Godiba wado po weyu yai, tama augwaligo te Genuai Bidigo po wali me pabeo.

²⁶Tialima, Godigo bomai po augwaliba mayu, tama augwali te tǫ wa pai masigi tǫ bulude isaibao po walio.

²⁷Tama agai te nosali pedalubo wąį nǫų dabe ela gudulama sela sąyu, te augwali gasa hani dabe tomoba bidigi pelama, tama augwali te gasa bulu tǫ pedaide isaibao, te po wai dao.

²⁸Nosali augwaligo te bulu Peorde te tibo god Bal dabeba lotu wai dao, tama augwa te bidibo ula elalusiąbo te god dabeba ofa mabo nai dabe tuai dao.

²⁹Te kolesagade te Genuai Bidigo augwaliba wado yabo sę ilibaso, tama agai te dwai genuai gasi augwaliba tagala palai dao.

³⁰Tiali goli, Finias hogodalu, tama te dwai sę ebo bidi dabeba te dwai dene mobaso, tama te genuai gasi silalio.

³¹Tama megi sogoba usu nagasu dago agai te doloba pai kolesaga yali homu kone palubao, tama nosali nosali me, tigidali we bidigo te tiwai homu emainu ebo dao.

³²Te Israel dabego te Godigo wado te Meriba węde yabo sę ilali, tama Moses te augwaligo yali sęde sęgę salio.

³³Augwaligo te Moses haliga dwai mu yabo sę ebaso, tama te agai te dolo isąbo po wai.

³⁴Te Genuai Bidigo augwalibolo te gasa hani dabe tigidali ela muao po wali. Tiali goli, augwaligo te bage tigidali me ela mubeo. Menio.

³⁵Te Israel dabego te Godigo po odisąwani hani bagede we sali, tama augwaligo ebo dwai kolesaga wali palio.

³⁶Tama augwa te tibo godiba lotu obaso, tama tego te Godigo augwa dolomainu ilai dao.

³⁷Augwaligo te augwa wai ogwa me, wegi me, ela munama, te tibo god dabeba ofa yai dao.

³⁸Augwaligo te augwa ogwa me wegi dabe digi elalio. Te wai dabego te magi dwai sę me isiąwani, tiali goli, augwa te augwali elama, tama augwali te Kenan tibo god dabeba ofa tiwai elama mawai. Tama tialima, augwaligo kanemego te tǫ meda pedelai dao.

³⁹Te kolesagago augwali te God gedude meda yai pedelalio, tama augwaligo te God tudiba munama, tama augwaligo aga wali me pabeo.

⁴⁰Tialima, Genuai Bidigo aga we bidi dabeba te wado mu elama, tama agai augwali wei ma ebeo.

⁴¹Tama agai augwali tagalama, te gasa hanigo augwali tonalumainu yali. Tama tiyu, augwali te boi bidi dabego dologode bidiyu, tama te boi bidi dabego nogode bidai dao.

⁴²Te boi bidi dabego augwaliba sęgę hauwa menama, tama augwali te augwaligo bomo dologode mu bidalio.

⁴³Te hauwa sogo mu Genuai Bidigo te aga hani bage tau sali, tiali goli, augwa digi te augwa homu wali ma peyu, tama augwa hagoma elama, tama agai po sela sąyu, tama augwa te dwai sę ebo kolesaga tomoba mu palio.

⁴⁴Tiali goli, augwa te Genuai Bidiba i weyu, gedu haluasa po wabo sogo, agai te augwaligo gedu haluasa po odolama, tama augwali te dwai bidibo te homu dene yalio.

⁴⁵Agai augwali homu dene mu elama, tama aga dąų walali poba homu kone ma palali. Tama aga homu ma hasegelalio.

⁴⁶Agai te Israel dabe kalabus yali boi bidi dabego homu hodolobaso, tama augwaligo te Israel dabe homu dene yalio.

⁴⁷God, dena Genuai Bidi, nago da te gasa hani dabego nogode ma sao. Tama nago da te dena tǫba ma odasa asao. Tama tiyu, dago nageba homu kone paliyu, te nage tedali wiegi yai mu da, te homu elama, tama dago nago nogi ugwaba siyu, tama nageba te usu da weyu, te wiegi yai pemene dali mabo dao po wagameo.

⁴⁸Dago te Genuai Bidigo nogi ugwaba sao, te da Israel dabego God, megi, me tigidali sogo nosali. Tama tigidali we bidigo te po waiyąo, “Mu dao,” wao. Genuai Bidi nogi ugwaba sao po wao.