1Kau holohabaa a Lord! Hea na holouto vania a Lord na pukuna te uto, ma nina dolo te kabu kasila.
2A hei ke padai na lei totobo sule te gonighi mai tua? ma hei ke hea na holohaba te manana?
3Kau togotogo nimiu, ighau tau taonighi na lei nina bosa ni keikeri a Lord Ighau tau gonia haia na hava te uto.
4Lord, ko ghanaghanau mai tana bona to hangara kulamu na vure, mo ko volau mai ghua to nera ga gaira.
5Ge ku righia na utodira kulamu na vure, mu ku togotogo kolu na kemamu nia na holohabana na ahamu.
6Ighai tai palugha vaghara na lei kukuamami, tai tangohahi ma Ai dika ghua.
7Na lei kukuamami i Egypt tara mua ghilalai na lei nina lutu sule God, subo na bona tara nia ponolio nina dolo te tatea vanira, mara hughuhughua tana horara sisi.
8Ma gaia te volara so taonia nina baubahu vanira, keri ge tatea vanira nina maana sule.
9Gaia te bosa vania na horara Sisi ge mamaha, me hulira kulana vure mara sogha halavu tana pari mamaha.
10Gaia te volara tadira tara kanahaghinira, me lavi olira tana limadira ghadira kana.
11Ghadira na kana tara lulumi tana beti, me taho tua siki sakai ke ghoi vola i tadira.
12Keri vaho ge ra taluutunighi na lei nina baubahu kulana vure, mara holohaba vania nia na linge.
13Gaira tara nia ponolio so na hava te gonia a Lord, mara mua pitua nina bosa ni tarai.
14Me torora na vitolo tana bona mamaha, mi gaa tara tabotaboa God.
15Ma God te hera na hava tara nongia i tatana, gaia na vahaghi dika te kalera.
16Mi tana bona mamaha te taho na beti mana ghai, tara ghaghana vania Moses ma Aaron, ra nina gehegehe tabu a Lord.
17Tana bona keri te tavoka na pari, Ma Dathan ma Abiram kolura didira ovu, mana balu tara nira pala, tara tumuhaghe lokana na gilu me pari kuvira na pari.
18Ma God te nia vetena mai na lake vanira na vure dika tara taonira, ma gaira te ghani taghalaghinira na lake.
19Mi tana ghotu Sinai tara gonia nia na gold sakai na buluka mane, ma gaira tara holohabaa igaa.
20Gaira tara tughua na rongoraghaana God, nia na titinonina na buluka mane, te vanga buburu.
21Ma ra nia ponolio God te volara nia na lei totobo sule, te gonighi mai tua i Egypt.
22Na lei totobo uto te gonighi igaa, mana lei totobo haeharegha te gonighi ghua tana Horara Sisi.
23Mi tana bona God te bosa ge ke dikalara kulana vure, A Moses, nina mane lutu te vilia, te hughutia God, me hovea ge ke bei dikalara na vure.
24Me mua liodira so na tona tana bona keri, na pukuna tara mua taluutunia nina bosa ni baubahu God.
25Gaira tara kabu vamua loka ni valedira nia na rutu mana ngulungulu, mara hove na rongoviana na bosana a Lord.
26Keri ge diki bosa dila vanira a Lord! Ke matera mughua lokana na bona mamaha.
27Me ke havukaghinira na lei vinavahuhudira ghobudira rana voo, ma kara mate horu tana lei komu keha.
28Ma nina vure God tara holohabaa Baal, na titinoni ni Peor, mara ghanighi na sukaghi tara nei vanira na lei god tara mua loghoa na vola.
29Ma na hava tara gonia te nea a Lord ge rutu, me vuha kalera na vahaghi dika na vure.
30Ma Phinehas te tughuru me nea na hava te gonia, keri ge soko na vahaghi.
31Mana totobo te nea eni, kara ghanaghana olia na so me sara itaeni, maia tana lei vavata ke mai.
32Mi tana lei vuravura ni beti Meribah, na vure tara nea Moses ge rutu, ma gaia i lokana na hava tara nea na vure.
33Ma gaira tara nea Moses ge rutu, me mua taghao utoa tua na liona ge ke kokoe.
34Gaira tara mua matera rana voo, taonia na bosana a Lord,
35Mara sopa lailola koukolu vamua itadira te taulaghi, mara lavighi didira nilabu ghua rana voo.
36A nina vure God tara vuha holohabara tua na lei titinoni, ma gaia keri te nera ge ra vuha dika.
37Gaira tara nira hevei daledira na lei mane mana tahula, na vatei sukaghi vanira na lei titinoni god ni Canaan
38Gaira tara matera na lei gari taho loghadira, mara nea te vaghaa ge ra dikalaa na komudira nia na mate tinoni.
39Gaira heghedira tara nera ge ra meto, nia na lei gehegehedira tara mua taluutunia God.
40Keri ge rutu a Lord vanira nina vure, me ke nia sika nina vure.
41Gaia te sanira tana limadira rana voo, mara kabu sasara tadira ghadira kana.
42Ghadira kana tara veiveira so, mara vahaghitailira ngangata.
43A Lord te lavi olira mai tana vola kulana vure, mara liona so na hughutiana, na pukuna te lata ngasilira tua na palu
44Hauva, mi tana bona tara tangi vania a Lord, gaia te rongovira me arovira so, na pukuna tara kabu tana vahaghitaili.
45Gaia te ghanaghana olia nina baubahu vanira na vure, ma nina dolo te sule vanira ge tughua na liona.
46Gaia te nera gaira tara vahaghitailira, ge ra ghoi arovira so.
47Lord, nimami na God, ko vavolaghai mo ko laviolighai tadira na lei kema, ge kai holoutogho ma kai holohabaa na ahana te tabu.
48Holohabaa a Lord, gaia God ni Israel. Holohabaa itaeni, maia ke va me vaa! Mana mavitu ke bosa, “Amen! Holohabaa a Lord!”
