1¡Gaca ba lá'azxa Xránadxu Dios! ¡Le xe̱ Xránadxu Dios: “Xcalenu'!” Caní dxal-la' gunle lawe' da naque̱' xrlátaje, ne lawe' da tu chí'izqueze dxexache lazre̱' dxi'u.
2¿Núzraqueze seque' gulé'ene̱' ca naca xel-la' waca zrente̱ ca' da nune̱' Xránadxu? ¿Núzraqueze seque' güe lá'ane̱' Le̱' ca dxal-la' gundxu?
3Ba neza zrente̱ naca na chee̱ benne' ca' dxelune̱' da xrlátaje, benne' ca' tu dxelúnzqueze̱' da naca xrlátaje.
4Bsa lazre' chia', Xrana' Dios, gate dxunu' da chawe' chee̱ bénneache chiu'.
5Gudá bselá neda' chee̱ gaca le'eda' da chawe' gunu' chee̱ benne' ca' ba guca'u Lue', ne chee̱ beda' gate xelezrá' bénneache chiu' lu da ba neza, ne chee̱ béle̱na' bénneache chiu'.
6Ba be̱ntu' dul-la cáqueze belún xra xrtáuntu' ca'. Be̱ntu' da cale̱la, ne be̱ntu' da zrinnaj.
7Gate gulezrá' xra xrtáuntu' lu xe̱zr la xu Egipto, quebe bululaba lazre̱' ca naca xel-la' waca ca' chee̱ xabáa da be̱nu'. Quebe xeajlesá lazre̱' ca bexache lázrele̱'u le̱'. Guledábague̱' Lue' dxu'a nísadau' da nazí le na Xrna.
8Le̱' bselé̱' benne' ca' chee̱ gaca ba lá'ana La Le̱', ne chee̱ gulé'e lau ca naca xel-la' waca chee̱'.
9Gudil-le̱' nísadau' Xrna na', na' bebizre na, na' guledé bénneache chee̱' laduj nísadau' na' lu xu bizre.
10Bselé̱' benne' ca' lu na' benne' guledábague̱' Le̱', ne bebéaje̱' le̱' lu na' benne' ca' bulusaca zi'e̱ le̱'.
11Nadxa nísadau' na' bgacu na benne' ca' guledábague̱' le̱'. Netú benne' ca' quebe nu begá'ana.
12Nadxa benne' chee̱' ca' guléajle̱'e̱ dizra' chee̱', ne belul-le̱' da belúe lá'ane̱' Le̱'.
13Chadí gulal-la lazre̱' ca da be̱ne̱'. Quebe gulebeze̱' ca la' dizra' chee̱ Dios.
14Gulezá lazre̱' tu da cale̱la le̱'e̱ xixre' lawe' lataj na', na' buluché̱'e̱ Dios le̱'e̱ xixre' na'.
15Gudé na' bnezruj Dios ca da gulenabe̱', san gusel-le̱' ládujla le̱' tu da gute na bal-la benne' ca'.
16Gulaque̱' xa lazre' chee̱ Moisés naga zaj zre̱'e̱, ne chee̱ Aarón, Bénnea' gucá'a Xránadxu Dios.
17Nadxa bzra xe̱zr la xu na', ne gude̱be na Datán, ne bgacu na benne' ca' zaj de̱'e̱ Abiram.
18Nadxa guxalaj xi' naga zaj nazraga benne' ca', na' bzezxe na benne' ca' dxelune̱' da cale̱la.
19Belune̱' tu bedáu' be̱zre da naca na oro lu xi'a Horeb, na' buluzú zribe̱' lau bedáu' oro na'.
20Caní bulucá'ane̱' Dios, Benne' xabáa, chee̱ xulucá'ana szrene̱' tu bedáu' be̱zre, da naca na ca tu be̱zre dxáguba' xixre'.
21Gulal-la lazre̱' Dios, Bénnea' bselé̱' le̱', Bénnea' be̱ne̱' xel-la' waca zrente̱ ca' lu xe̱zr la xu Egipto,
22ne be̱ne̱' xel-la' waca ca' chee̱ xabáa lu xe̱zr la xu chee̱ zri'ine zre sua Cam, ne da ca' buluchebe na dxi'u dxu'a Nísadau' Xrna.
23Nadxa guca lazre' Dios guzría xi'e̱ bénneache chee̱', san Moisés, bénnea' gucá'a Dios, bzua cuine̱' lau Dios chee̱ guzúa zrie̱' xel-la' dxezrá'a chee̱ Dios, na' be̱ne̱' quebe guzría xi' Dios benne' ca'.
24Buluzúe̱' chalá'ala xe̱zr la xu xrtante̱ da gunezruj Dios le̱', ne quebe guléajle̱'e̱ dizra' chee̱'.
25Tu gulenné̱zqueze̱' chee̱ Dios lu xu'u xide chee̱' ca', ne quebe buluzé̱ nague̱' da gunná Xránadxu Dios.
26Chee̱ le̱ na' bzetaj cuine̱' gunné̱' ca da gune̱' chee̱ benne' ca'. Gunné̱' gune̱' xelate benne' ca' le̱'e̱ xixre' lawe' lataj na',
27ne gusi'e̱ bénneache chee̱' lu xel-la' stu' lau benne' xe̱zr la xu ca', ne guse dínnaje̱' le̱' ládujla benne' xe̱zr la xu ca'.
28Nadxa belune̱' tuze benne' ca' dxulucá'ana szrene̱' bedáu' xia nazí le na Baal-peor, ne gulawe̱' béadu ca' belútie̱' lau dios gate ca'.
29Buluche̱'e̱ Dios ne̱ chee̱ da belune̱', na' guxalaj tu xízrawe̱' zren da be̱te na benne' zan benne' ca'.
30Nadxa guxasa Finees, ne be̱tie̱' bénnea' be̱ne̱' dul-la, na' guleza xízrawe̱' zren na'.
31Da na' be̱n Finees guzí' Dios ca tu da dxucá'ana xrlátaje na bénnea', da gulé'e lawe na lau xúgute̱ cuen bénneache ca'.
32Cá'anqueze buluché̱'e̱ Dios dxu'a beaj nisa nazí le na Meriba, na' guca da cale̱la chee̱ Moisés ne̱ chee̱ benne' ca',
33lawe' da ne̱ chee̱ da belune̱' guca Moisés xichaj zra'a, na' bexúbete̱ Moisés da gunné̱'.
34Gate gulu'e̱ lu xe̱zr la xu nigá quebe buluzría xi'e̱ bénneache zaj nite̱' ga na'. Caní guca, quebe belune̱' ca da guzre Dios le̱' xelune̱'.
35Gulaque̱' tuze benne' xe̱zr la xu ca', ne bulusé̱die̱' benne' Israel ca' xelune̱' ca dxelún benne' ca',
36na' bulucá'ana szrene̱' bedáu' xia xaga ca' chee̱ benne' ca', da na' be̱n na bxrinnaj Dios bénneache chee̱'.
37Belútie̱' zrí'ine̱' bi biu, ne bi nu'ula chee̱' lau bedáu' chee̱ da xriwe̱' ca',
38ne bululálaje̱' dxen chee̱ bi dxé'enedu ca', bi quebe zaj nunbe' dul-la, da naca na dxen chee̱ zrí'ine̱' bi biu, ne bi nu'ula, bi ca' belútie̱' lau bedáu' xia xaga ca' chee̱ bénneache Canaán, na' guca sban xe̱zr la xu na' ne̱ chee̱ dxen chee̱ bidu ca'.
39Da ca' belune̱' be̱n na le̱' sban, na' gulebéaj xíchaje̱' Dios lu da belune̱'.
40Chee̱ le̱ na' bzrá'ale̱'e̱ Dios bénneache chee̱', na' gucuídene̱' benne' ca' zaj naca chee̱'.
41Nadxa bdee̱' benne' ca' lu na' benne' xe̱zr la xu ca', na' benne' ca' dxelecuide bénneache chee̱ Dios gulenná bé'ene̱' le̱'.
42Benne' ca' guledábague̱' le̱' bulusaca zi'e̱ bénneache chee̱ Dios, ne buluxrínnaje̱' le̱' lu xel-la' dxenná bea chee̱'.
43Zánete̱ lasa Dios bselé̱' bénneache chee̱' ca', san guledábague̱' ca da bsízrene̱' le̱', na' gulape̱' xel-la' stu' lawe' da belune̱' da cale̱la.
44Lácala caní belune̱', gate gulezré̱'e̱ lu da ste̱be, Dios gunné̱'e̱ ca da dxelezaque̱', ne benne̱' ca da bululáwizre̱' Le̱',
45na' xeajsá lazre̱' xel-la' wezría da bé̱nle̱ne̱' benne' ca', na' bexíaje lazre̱' chee̱ xel-la' dxezrá'a chee̱' lawe' da nácale̱'e̱ benne' dxexache lazre'.
46Cá'anqueze be̱ne̱' belexache lazre' benne' ca' benne' ca' guleché̱'e̱ le̱' ca benne' zaj nada'u.
47¡Bselá netu', Xránantu', nacu' Dios chee̱ntu'! ¡Becá'a netu' ládujla benne' xe̱zr la xu ca', chee̱ güe lá'anantu' Lau' lá'azxa, ne chee̱ béle̱'e̱ntu' lu da dxúl-lantu' chiu'!
48Cháwedau' naca Xránadxu, Bénnea' naque̱' Dios chee̱ benne' Israel ca' nédxudaute̱, ne chadía chacanna. Xúgute̱ bénneache dxal-la' xelenné̱': ¡Ca'an gaca na! ¡Gaca ba lá'azxa Xránadxu Dios!
