Mareko 14

1

2

3

4

5

6

7

8

9

10

11

12

13

14

15

16

¹ꞌAhi madaḡaꞌe, Pasika muiḡa* zuni |iisiti|r oꞌoꞌa |iberedi|rḡa auꞌeteꞌe muiḡa madaḡa*, mada aheu izema mougano. Badiꞌa ḡahunohauꞌeteꞌe neḡa zuhiꞌaḡa boro boro, zuni Mose goro ḡoeꞌa ihozeꞌeteꞌe azaḡa, ze ꞌuꞌuru monede, Iesu obone teadu, manoga ibiḡa vaḡiro.

²Mazaḡa ze raenaꞌa, 'Pasika muiḡa madaḡano mene haḡaiꞌuma. Hena vaze ḡuḡuvaḡaniꞌa utitofiꞌuma.'

³Iesu aniꞌe Betania neḡano, Simona, ibite leferaꞌa meiroteꞌe vazeḡa ne zamaḡano radiro. Ze ehore ogauꞌenogano, roḡae ꞌahoganiꞌa botoroḡeta diuḡiro. Botoro hadi niḡa Alabasita*, zamaḡanoꞌe dehoro, niḡa Narudo, naeḡaꞌeꞌe boro, eꞌe varadadu, Iesu vadini rana ovoe beuꞌiro.

⁴Rehano vaze nu deꞌea bone maḡunadu, ḡadititinaꞌa, 'Nagini uꞌanonoꞌo dehoro manoḡa mode tauḡeꞌohe?

⁵Aꞌe hoitifone, kina sinahu uḡidu (300) vitinifo. Eꞌe |imoni|rḡaꞌe toheḡa oꞌoꞌa azaḡa zinifo.' ꞌOuge rae roniro.

⁶Rehano Iesuꞌa raenaꞌa, 'Ago gararoꞌi! Nougaduni ani aduga hauꞌohe? Aniꞌe haḡai manoḡa eḡe mazao haḡaeha.

⁷Mazaḡa tohe oꞌoꞌa azaḡaniꞌe, zae teite iḡaiḡa radiuꞌohe. Vesuꞌu za faizine, idaḡa. U eꞌe zae teite iḡaiḡa mene radiꞌuma.

⁸Aniꞌe ane edeḡa haḡaiḡa haḡaeha. E ize mene gurogano, aniꞌe, dehoro eḡe ahirio ibite beꞌuneha, vesuꞌu eḡe ahiri guroga veize.

⁹E hubehune ziꞌohe. Haba niduꞌa zamaḡano noꞌe habaꞌano Badiꞌa hari manoḡa haramine, aniꞌa haḡaateꞌe haḡaiḡa hariḡa reꞌuma, ane zamaroga veize.

¹⁰Iuda Isakariota, Iesu mazaonoꞌo edeḡa maꞌeteꞌe vazeḡa ꞌahoga, Badiꞌa ḡahunohauꞌeteꞌe neḡa zuhiꞌaḡa boro boro vaḡe onamiro, Iesu revohanoga veize.

¹¹Ze eꞌe ḡoeꞌa igirotene, matuꞌe rudaro. Ebu '|iMoni|r ḡaniꞌuma' rae niro. Iuda ani, Iesu revohaꞌuma madaḡa manoḡa vaḡiro.

¹²|iIsiti|r oꞌoꞌa |iberedi|rḡa auꞌeteꞌe muiḡa madaḡa ibiꞌano, aꞌe Pasika zamarifine, dibuꞌo mamoeḡa ubuga mauꞌeteꞌe madaḡa, Iesu tahiꞌa tahiꞌaꞌa, Iesu ḡadiniro. 'Noꞌe onamadu, ḡae veize Pasika ogomuḡa haḡae tiꞌuma?'

¹³Ane tahiꞌa aheu tuḡuzeꞌenaꞌa, ꞌahige rae ziro. 'Ierusalema neḡa itoꞌi! Ohoze ꞌahoganiꞌa vu ḡoḡoreḡa ḡuduꞌoga horoniꞌuma. Ebu ani ḡaruna hegotoꞌi!

¹⁴Aneꞌa diuḡiꞌuma neḡano, eꞌe neḡa vazeḡa ḡorenoꞌi. “Ihore vazeḡa ꞌahige raꞌohe. Eḡeꞌa, eḡe tahiꞌa tahiꞌa teite, Pasika muiḡa aꞌuma neḡa zamaḡaꞌe, nouꞌeꞌe?”

¹⁵Aniꞌa hitanao ne boro zamaḡa ꞌahoga ihoziꞌuma. Aneꞌa eḡe Pasika muiḡa veize, ne zamaḡa ruhine teateꞌe horoniꞌuma. Deꞌea haḡae toꞌi.'

¹⁶Ani anine iḡunadu, ne boro itiro. Ebu Iesuꞌa ziroteꞌe horoniro. Ze Pasika muiḡa ruhine tiro.

¹⁷Ḡoravararotene, Iesu ani, ane tahiꞌa tahiꞌa gaubanana aheu fare teite onairo.

¹⁸Ze ehore ogaroteꞌe zamaḡano, Iesuꞌa ꞌahige rae ziro. 'E hubehune ziꞌohe. Za ꞌahoganiꞌa revoniꞌuma. Ani, eḡe teite idaḡa ogauꞌeteꞌe vazeḡa.'

¹⁹Ze zamaze adudaro, ebu ane aneꞌa, 'E mene hehe?' rae niro.

²⁰Iesuꞌa naenaeziꞌenaꞌa, 'Aꞌe zae ꞌahoga, gaubanana aheu fare zamaḡano, |iberedi|r eḡe teite idaḡa siuvao ꞌuꞌune auꞌeteꞌe vazeḡa.

²¹Eḡe, Vaze Ubuganiꞌe, buka zaḡoḡa zamaḡano tiroteꞌe idaḡano onamiꞌuma. Rehano, eḡe, Vaze Ubuga revoniꞌuma vazeḡaꞌe, fase vetuḡaḡa! Aniꞌe mene furerafone, manoḡa.'

²²Ze ogaroteꞌe zamaḡano, Iesuꞌa |iberedi|r madu, Badiꞌa uminiro. Ebu |iberedi|r vahegaduni, ḡahugiro. Ebu raenaꞌa, 'Madu, anoꞌi. ꞌAdi eḡe ahiri.'

²³Hena |ivaini|r vuḡa bioḡa ꞌahoga meiro. Badiꞌa mazao matuꞌohanadu, ziniro. Ebu ze bio tibanonoꞌo tahi tahe gagiro.

²⁴Ebu Iesuꞌa ziro. 'ꞌAdi eḡe ru. Vaze ḡehaḡa uꞌano beꞌuteꞌohe. Eḡe ru hina Goro Iziga tiꞌohe.

²⁵E hubehune ziꞌohe. E |ivaini|r vuḡa mene bare gagiꞌuma, onamo Badiꞌaꞌa ibitohauꞌeteꞌe habaꞌanobuꞌu iziga gagiꞌuma.'

²⁶Ebu ze badahadu, Olive maḡa buau onamiro.

²⁷Iesuꞌa ane tahiꞌa tahiꞌa zinaꞌa, ꞌahige reiro. 'Zae niduꞌa muhihe feraꞌuma. Mazaḡa buka zaḡoḡa zamaḡano ꞌahige tiro. “Badiꞌaꞌa mamoe ḡianeꞌeteꞌe vazeḡa mau runiꞌuma. Ebu mamoeꞌe ferau ḡouriꞌuma.”

²⁸Rehano e rudanadu, runeonoꞌo bare ḡabode iḡuniꞌuma. Eꞌe enogano, e ibite Galilea onaꞌuma, ebu zae teite hidiꞌuma.'

²⁹Peteroꞌa raenaꞌa, 'Vaze niduꞌa muhiꞌe feraꞌuma, rehano eꞌe mene feraꞌuma.'

³⁰Iesuꞌa Petero niro. 'E hubehune ḡaꞌohe. Izidi ohere kokorokuꞌa ḡae aheu ize, izema uganogano, ḡaꞌe ḡae uḡidu eḡe oꞌohiꞌuma.'

³¹Rehano Petero ani ḡoere ḡiharo. 'Naginiꞌa eḡe mazao fureraune, e ḡae teite rudaꞌuma madaḡano zuni, eꞌe ḡa mene rae oꞌoꞌiꞌuma.' Ane tahiꞌa niduꞌa ꞌouge reiro.

³²Iesu ebu ane tahiꞌa tahiꞌaniꞌa, Getesemane habaꞌa onairo. Ebu Iesuꞌa tahiꞌaḡa zinaꞌa, ꞌahige reiro. 'E kurauꞌe bobo, ꞌaha geno ehore radoꞌi!'

³³Ebu Petero, Iakobo ebu Ioane, zeḡe uḡidu zamaze onamiro. Onamirotene, Iesu ani zamaḡa ufeta riharo, zuni zamaḡa adudaro.

³⁴Ebu ꞌahige rae ziro. 'Eꞌe zamahe are rudauꞌohe. ꞌAdao radadu, zaeꞌa zae bare duguzoꞌi!'

³⁵Hena tahiḡa mo bade onamiro. Ebu rahao ḡuḡuradu, kuraro, raenaꞌa, 'Idaḡa roꞌidene, mada aduga ꞌadi mae vaḡinoꞌi!'

³⁶Ebu ꞌahige reiro. 'Eḡe Mama, ḡa gau niduꞌa haḡaoga edeḡa. Eḡe mazaonoꞌo bio ꞌadi, gau aduga ꞌadi mae vaḡinoꞌi! Rehano mene eḡe ura. Aꞌe ḡae ura daꞌo haḡaoꞌi!'

³⁷Hena baradu, ane tahiꞌa uḡidu bazeꞌenogano, horoziro. Ebu Petero ninaꞌa, ꞌahige reiro. 'Simona, ḡa bazeꞌehehe? Mada tiba (1 hour) zu duguꞌogani mene idaranahehe?

³⁸Dugute toꞌi ebu kuranoꞌi, soꞌosoꞌo ḡoeꞌa mene egaduni, haḡai sauꞌa mene haḡaifine! Zamazeꞌe hubehune urateꞌe rehano, ahirizeꞌe zorereꞌohe.'

³⁹Ebu ani bare onamaduni, ibite kuraroteꞌe teige kuraro.

⁴⁰Hena aniꞌa bare onaadu, zeḡe uḡidu bazeꞌenogano horoziro. Mazaḡa ubumazeꞌa ufeta anoziro. Zeꞌe aḡuꞌa nouge nouge Iesu naenaeniꞌuma.

⁴¹Iesuꞌa bare onamadu, kuranadu, ḡae uḡiduḡano bare onairo. Ebu ꞌahige rae ziro. 'Za ize bazeꞌehehe, ebu ahirize ohoneꞌehehe? Eꞌe daꞌo. Madaḡa ꞌai onaeha. Ḡianoꞌi! Eḡe, Vaze Ubuganiꞌe, vaze sauꞌa sauꞌaniꞌa meꞌuma.

⁴²Iḡunoꞌi! Eme haoze onamihi! Ḡianoꞌi! Revoniꞌeteꞌe vazeḡa ꞌai onaeha.'

⁴³Iesu ani ize ḡoereꞌeteꞌe zamaḡano, Iuda, gaubanana aheu fare (12) vazeḡa ꞌahoganiꞌa onairo. Vaze ḡehaḡa zuni kari ebu somori boro madu, ane teite onairo. Zeꞌe Badiꞌa ḡahunohauꞌeteꞌe neḡa zuhiꞌaḡa boro boro zuni, Mose goro ḡoeꞌa ihozeꞌeteꞌe azaḡa ebu, vaze boro boroꞌa, tuḡuziro.

⁴⁴Reva vazeḡaniꞌa, aneꞌa haḡaiꞌuma gauḡa ibite ihoziro, raenaꞌa, 'Eḡeꞌa hidadu, furaꞌiniteꞌe vazeḡaniꞌe, eiꞌeꞌe. Obone toꞌi, ebu faine zamahu onamoꞌi.'

⁴⁵Iudaꞌa feurirotene, Iesu vaḡe onamiro. Ebu 'Ihore vazeḡa boro!' rae ninaꞌa, furaꞌiniro.

⁴⁶Ebu zeꞌa Iesu evoꞌano obone tiro.

⁴⁷Ane teite edau radiroteꞌe vazeḡa ꞌahoganiꞌa, kariḡa ahase bunadu, Badiꞌa ḡahunohauꞌeteꞌe neḡa zuhiꞌaḡa ḡihiꞌa tuḡure vazeḡa agatinirotene, teḡaḡa variꞌe buniro.

⁴⁸Iesuꞌa zinaꞌa, ꞌahige reiro. 'Zaꞌe, ḡonore vazeḡa obone tiꞌeteꞌe teige, kari ebu somori boro madu, eḡe obohe touga veize onaahehe?

⁴⁹Mada niduꞌa eꞌe zae teite Badiꞌa ḡahunohauꞌeteꞌe Neḡa zamaḡano ihozido. Eꞌe zamaḡano zaꞌe mene obohe tido. Rehano ꞌadiꞌe buka zaḡoḡa zamaḡano tiroteꞌe fureraꞌuma haḡaiḡa.'

⁵⁰Ebu tahiꞌaḡa niduꞌa ani muhine feraro.

⁵¹Ohoze tahiꞌaḡa ꞌahoganiꞌe, Iesu ḡarunao hegotiro. Aniꞌe ahiꞌa isoḡa, rehano dabua afaꞌa vidaro. Iesu obone tiroteꞌe azaḡaniꞌa, ane zuni obone tihi reirotene,

⁵²dabuaḡa daꞌo meiro. Ane hugaꞌe firina feraro.

⁵³Badiꞌa ḡahunohauꞌeteꞌe neḡa zuhiꞌaḡa ḡihiꞌa* uꞌa, Iesu zamahu onamiro. Ebu Badiꞌa ḡahunohauꞌeteꞌe neḡa zuhiꞌaḡa boro boro, zuni vaze boro boro, ebu Mose goro ḡoeꞌa ihozeꞌeteꞌe azaḡa niduꞌa nuꞌoraro.

⁵⁴Petero aniꞌe, Iesu hegohegote onamiro. Ebu Badiꞌa ḡahunohauꞌeteꞌe neḡa zuhiꞌaḡa ḡihiꞌa ḡabiri zamaḡano diuḡiro. Ani, ne eꞌea gaueꞌeteꞌe azaḡa teite ehoradu, ireo idiro.

⁵⁵Badiꞌa ḡahunohauꞌeteꞌe neḡa zuhiꞌaḡa boro boro, zuni Iudea kanisoro azaḡa* niduꞌa, Iesu matiteꞌe veize, nouge nouge kotaiꞌuma ḡoeꞌa vaḡiro, rehano mene horoniro.

⁵⁶Mazaḡa vaze ḡehaḡaniꞌa Iesu ḡuriro hariḡa rae fureniro ꞌahine, ḡoereze mene tiba.

⁵⁷Ebu vaze nuꞌe iḡunadu, Iesu ḡuriro hariḡa ꞌahige rae fureniro.

⁵⁸'Emeꞌe aniꞌa ꞌahige reiroteꞌe igiro. “Eꞌe Kuru Neḡa Zaḡoḡa* ꞌadi, vazeꞌa haḡairoteꞌe ḡauḡa fahadu, mada uḡidu zamaḡano, Badiꞌa ne ꞌahoga, vazeꞌa mene haḡaiꞌuma ḡauḡa, ohoniꞌuma.” '

⁵⁹Rehano eꞌe hariḡa zuni mene idararo.

⁶⁰Badiꞌa ḡahunohauꞌeteꞌe neḡa zuhiꞌaḡa ḡihiꞌaꞌa, zeḡe zamao iḡunadu, Iesu ḡadiniro. ꞌAhige reiro. 'Ḡa mene naenaeziꞌehehe? Vaze vaze ꞌahaꞌa ḡoere aduga ḡae rana tiꞌetaꞌaꞌe, ḡa nouge reꞌuma?'

⁶¹Rehano Iesu aniꞌe sifu radiro, mene naenaeniro. Badiꞌa ḡahunohauꞌeteꞌe neḡa zuhiꞌaḡa ḡihiꞌaꞌa bare ḡadiniro. ꞌAhige reiro. 'Ḡa Keriso, emeḡeꞌa mae ḡihineꞌeteꞌe vazeḡa ubuga hehe?'

⁶²Iesuꞌa naenaeniꞌenaꞌa, ꞌahige reiro. 'Oꞌe, eꞌe Keriso. Zaꞌe eḡe, Vaze Ubuganiꞌa, Badiꞌa gigiꞌeta edaꞌe moneo, ehoriteꞌea horohiꞌuma. Ebu adure ḡoze zamaḡano ovaiteꞌea horohiꞌuma.'

⁶³Badiꞌa ḡahunohauꞌeteꞌe neḡa zuhiꞌaḡa ḡihiꞌaꞌa dabuaḡa obonadu, zigiro. Ebu ꞌahige reiro. 'Eiꞌeꞌe. Ani matiteꞌe veize mazaḡa mene vaḡiꞌuma.

⁶⁴Badiꞌa ni sausauneꞌeteꞌe ḡoeꞌa za egeha. Za nouge zamareꞌohe?' Zeḡe niduꞌa ani maune, manoḡa rae reiro.

⁶⁵Ebu vaze nuꞌe soꞌabide vaniro. Ebu hena ubumaḡa aute ꞌuadu, bouniro. Ebu ꞌahige reiro. 'Ḡaꞌe peroveta vazeḡa! Roꞌi! Iniuꞌa bouꞌeha?' Ebu tuḡure vazeḡa nuꞌa hena faꞌoniro.

⁶⁶Petero aniꞌa ne ꞌuꞌuḡano radirotene, Badiꞌa ḡahunohauꞌeteꞌe neḡa zuhiꞌaḡa ḡihiꞌa veize gaueꞌeteꞌe roḡae tahiꞌaḡa ꞌahoganiꞌa onairo.

⁶⁷Ani Peteroꞌa ireo idiroteꞌe horonirotene, ane ḡiane runiro. Ebu ꞌahige rae niro. 'Ḡae zuni Iesu, Nazareta ne vazeḡa teite radiudo.'

⁶⁸Rehano Petero ani eꞌe ḡoeꞌa oꞌoniro, raenaꞌa, 'Ḡaeꞌa nagini raꞌetaꞌaꞌe, eꞌe aḡuꞌa. E mene zamareꞌohe.' Ebu buauꞌeteꞌe ḡabiriḡa ibihetaḡa uꞌa onamiro. Ebu kokorokuꞌa ugaro.

⁶⁹Roḡae tahiꞌaḡa ani horonadu, ani uhiḡano edaroteꞌe azaḡa bare zinaꞌa, ꞌahige reiro. 'Vaze ꞌadiꞌe Iesu mazaonoꞌo edeḡa maꞌeteꞌe vazeḡa ꞌahoga.'

⁷⁰Rehano Peteroꞌa bare rae oꞌoniro. Vesuꞌu ani uhiḡano edaroteꞌe azaḡa, bare Petero ninaꞌa, ꞌahige reiro. 'Hubehune ḡaꞌe ane vaze ꞌahoga. Mazaḡa ḡae zuni Galilea vazeḡa.'

⁷¹Rehano Petero ani, ḡoere huga ḡoeꞌa hina rae fureniro. Ebu hubehune raenaꞌa, ꞌahige reiro. 'Ḡaꞌa raꞌeteꞌe ohozeḡa aꞌaꞌe, e aḡuꞌa.'

⁷²Ebu hena kokorokuꞌa bare ugaro. Ebu Peteroꞌe Iesuꞌa ꞌahige niroteꞌe ḡoeꞌa zamariro. 'Kokorokuꞌa ḡae aheu izema uganogano, ḡaꞌe ḡae uḡidu eḡe oꞌohiꞌuma.' Eꞌe zamarirotene, ani niau rudaro.