Mareko 5

1

2

3

4

5

6

7

8

9

10

11

12

13

14

15

16

¹Iesu ebu ane tahiꞌa tahiꞌaniꞌa, Galilea duꞌuraḡa mone afao feuriro. Haba niḡa Gerasa, eꞌa feuriro.

²Iesu aniꞌa ane tahiꞌa tahiꞌa teite ḡasionoꞌo buarotene, rune habaꞌanonoꞌo onairoteꞌe vazeḡa teite hidiro. Aniꞌe vine sauꞌaniꞌa ragano reiroteꞌe vazeḡa.

³Aniꞌe idu habaꞌano radiudo. Vaze ꞌahoganiꞌa batunoga zuni mene idaḡa.

⁴Ḡae ḡehaḡa ani odaḡa zu evoꞌa batunido, rehamo mene idaraudo. Iḡaiḡa batu riꞌido, ebu odaḡa batuniroteꞌe auriḡa mau riꞌi ḡuzuhido. Vazeꞌa obone toga zuni mene idaraudo.

⁵Madai ebu ohere niduꞌa idu habaꞌano zuni haba maḡano ḡaniḡanau ragavido, ebu ahiꞌa hadi hina ruꞌido.

⁶Aniꞌa faḡanonoꞌo Iesu horonirotene, ane uꞌa dure onairo, ebu ane zamao obena hina tuḡadu ḡuḡuriro.

⁷Ebu vine sauꞌaniꞌa, ane mazaonoꞌo ḡihau hounaꞌe ḡoeriro. ꞌAhige reiro. 'Iesu, Badiꞌa, Niḡa Boro Ubuga, Ḡaꞌe eḡe mazao nagini urateꞌohe? Badiꞌa niḡano e ḡa umiꞌeꞌohe. Aduga ago enoꞌi!'

⁸Mazaḡa Iesuꞌa ibite niro. ꞌAhige reiro. 'Vine sauꞌa, vaze ꞌahi mazaonoꞌo buanoꞌi!'

⁹Ebu Iesuꞌa vaze ꞌahi ḡadiniro. 'Ḡa niḡo iniu?' Ebu raenaꞌa, 'E niꞌe “Legioni”, mazaḡa emeꞌe ḡehaḡa ꞌahine.'

¹⁰Ebu Iesu bare bare uminiro, eꞌe habaꞌanonoꞌo mene tuḡuze buzoga.

¹¹U maḡa kobeḡa ꞌahogano, aba ḡehaḡaniꞌa ogau radiro.

¹²Eꞌanoꞌo vine sauꞌa sauꞌaniꞌa Iesu uminiro. 'Eme tuḡufoꞌi aba mazao, emeḡe zeḡe ragano rouga.'

¹³Iesuꞌa tuḡuziro. Ebu vine sauꞌa sauꞌaniꞌa vaze eꞌe mazaonoꞌo buanadu, aba ragano reꞌ onamiro. Eꞌebone aba niduꞌa, daha aheu (2000)ꞌa maḡa duduḡa tauḡionoꞌo dure dure ovoadu, duꞌura boroo rafatadu, hunuhuniro.

¹⁴Aba taufeꞌeteꞌe azaḡaniꞌa feraro, ebu ne boro zu ne kobeḡa kobeḡa azaḡa mazao hariḡa haire ḡehaniro. Ebu vaze vazeꞌa naginiꞌa fureraroteꞌe ḡianoga radu, onamiro.

¹⁵Ebu zeꞌa Iesu vaḡe onairotene, vine sauꞌa ḡehaḡaniꞌa ragano reiroteꞌe vazeḡaniꞌa, ehore radiuꞌenogano horoniro. Aniꞌe dabua haḡairo. Zamaḡaniꞌe idaḡa horonirotene, ze riharo.

¹⁶Eꞌe horoniroteꞌe azaḡaniꞌa meꞌodo ziniro. Vine sauꞌaniꞌa ragano reiroteꞌe vazeḡa, zu abaꞌa nougiroteꞌe meꞌodo ziniro.

¹⁷Ebu Iesu mazao umidiro, Iesuꞌa zeḡe habaonoꞌo vaḡinoga.

¹⁸Iesuꞌa ḡasio diuḡeꞌenogano, vine sauꞌaꞌa ragano reiroteꞌe vazeḡa ani uminiro, raenaꞌa, 'Eḡe zuni ḡae teite amihi.'

¹⁹Rehano Iesuꞌa ani gararenaꞌa, ꞌahige rae niro. 'Nabugo vaḡe onamoꞌi! Ebu Zuhiꞌaꞌa ḡae veize haḡao ḡanateꞌe haḡaiḡa boro niduꞌa meꞌodo zenoꞌi! Ebu zuhiꞌaꞌa ḡa nouge nouge vetuḡaḡadateꞌe meꞌodo zenoꞌi!'

²⁰Ebu ani baradu, eꞌe habaꞌa, neḡa gaubanana onamiro, ebu Iesuꞌa ani ranao nagini haḡairoteꞌe hariḡa rae fureniro. Eꞌe igiroteꞌe azaḡa niduꞌa zaguzagaro.

²¹Iesu ebu ane tahiꞌa tahiꞌaniꞌa, duꞌura boro mone afa fare onamirotene, eꞌea bone duꞌura genaḡano, vaze ḡehaḡaniꞌa ane mazao nuꞌoraro.

²²Iuda kuru neḡa ḡianeꞌeteꞌe vazeḡa* ꞌahoga, niḡaꞌe Iairoꞌa onairo. Iesu horonirotene, odaḡa babaḡano ḡuḡuradu,

²³zamaḡa niduꞌa hina Iesu uminiro, raenaꞌa, 'Aboehe komeꞌaꞌe ugi boroꞌa madu, ꞌariga rudauꞌohe. Eꞌanoꞌo e umiꞌeꞌohe. Aroꞌi ebu evoꞌo ani ranao toꞌi, ane manoradu ḡabodoga.'

²⁴Ebu Iesuꞌa ane teite onamiro. Vaze ḡehaḡa bagaḡa zuni ḡiriu onamiro ꞌahine, naenaeonoꞌo bibine onamiro.

²⁵Bato ugiḡaniꞌa madu, muri gaubanana aheu fare (12) zamaḡano, iḡaiḡa ruau radiroteꞌe roḡaeḡa eꞌea.

²⁶Gohe vazeḡa ḡehaḡaniꞌa ḡianiro, rehano adudu radiro. Toheḡa niduꞌa mode hauḡiro, rehano ufeta hune sautaro.

²⁷Ani Iesu hariḡa igirotene, vaze ḡehaḡa ḡunuḡano diuḡiro Iesu ḡarunio, ebu dabuaḡa oboniro.

²⁸Mazaḡa aniꞌe ꞌahige zamariro. 'Eꞌa dabuaḡa tahiḡa obonine zuni, manoriꞌuma.'

²⁹Ebu ḡarihe hune ruaroteꞌe ai hauḡiro. Roḡae aneꞌa, ane ahiri zamaḡano, ane ugi ai hauḡiroteꞌe ederiro.

³⁰Ebu Iesu ani, ane mazaonoꞌo gigiꞌa inaraḡaniꞌa buaroteꞌe ederiro. Eꞌanoꞌo vaze ḡehaḡa ḡunuḡano ḡarihe tehiro. Ebu vaze vaze ḡadiziro. 'E dabua iniuꞌa oboneha?'

³¹Ebu Iesu tahiꞌa tahiꞌaniꞌa naenaeniro. 'Ḡae eꞌe horoneꞌohe, vaze ḡehaḡaniꞌa bibiꞌeꞌeteꞌe. Ḡa nougadu ꞌahige raꞌohe, “Iniuꞌa eḡe dabua oboneha?” '

³²Rehano tehe vaḡo vaḡiro. Iniuꞌa oboneha radu, vaḡiro.

³³Roḡae eꞌeꞌa, naginiꞌa ane mazao fureraroteꞌe ederiro ꞌahine, ḡiḡaroneꞌenaꞌa, rereranadu onairo. Ebu ane zamao ḡuḡuriro. Ebu ane hari huga niduꞌa Iesu niro.

³⁴Iesuꞌa roḡae niro. 'Aboe, Ḡaeꞌ a eḡe mazao fiateꞌ e uꞌ ano ugiḡoꞌ a manoreha. Matuꞌuḡota onamoꞌi, ebu ahiꞌo ugiḡa oꞌoꞌa radoꞌi!'

³⁵Iesu ani ize, ꞌadige rae ḡoereꞌeteꞌe zamaḡano, tuḡure azaḡa, Iuda kuru neḡa ḡianeꞌeteꞌe vazeḡa neonoꞌo onairo, ebu Iairo ninaꞌa, 'Ḡa aboḡo ai rudaneha. Ḡa nougaduni ihore vazeḡa mazao ize umideꞌohe?'

³⁶Iesuꞌa ze hari ꞌomo igirotene, ani reꞌoreꞌiro, ebu kuru neḡa ḡianeꞌeteꞌe vazeḡa ninaꞌa, 'Zamaḡo ago adufoꞌi! Eḡe mazao zamaḡo tiba hanadu, inaroꞌi!'

³⁷Ebu ani vaze ḡuḡuvaḡa ane teite onamoga garariro, rehano Petero, Iakobo, ebu Iakobo negoḡa, Ioane, zeḡe daꞌo tutuze onamiro.

³⁸Ze, kuru neḡa ḡianeꞌeteꞌe vazeḡa neo feurirotene, vaze ḡehaḡaniꞌa harae ḡunuḡuniroteꞌe horoniro. Ze niau ḡaniḡanau radiro.

³⁹Ani diuḡadu, ꞌahige rae ziro. 'Za nougadu ufeta niau ḡunuḡuneꞌohe? Roḡae kobeꞌa ani mene rudaneha. Ani bazeꞌohe.'

⁴⁰Ze eḡofoharo. Rehano zeḡe niduꞌa enona tuḡuze buziro. Roḡae kobeꞌa viꞌa moga ebu ane teite onairoteꞌe azaḡa uḡidu daꞌo tutuze diuḡiro, roḡae kobeꞌaꞌa bazeꞌeteꞌe habaꞌano.

⁴¹Ebu Iesuꞌa evoꞌa maduni, ꞌahige rae niro. 'Tarita kumi' Ḡoere eꞌe huganiꞌe 'Roḡae kobeꞌa, eḡeꞌa ḡaꞌohe. Iḡunoꞌi!'

⁴²Ebu roḡae kobeꞌaꞌa ḡarihe hune iḡunadu, edau ragaviro. Ani muriꞌe gaubanana aheu fare (12). Ze eꞌe horonirotene, zaguzagaro.

⁴³Iesuꞌe ḡoere riḡa hina iraduguziro. 'Roḡae kobeꞌa ꞌadi ḡabonateꞌe hariḡa ago rae ḡehanoꞌi!' Ebu zinaꞌa, 'Roḡae kobeꞌa ꞌadi ogomu nu hanoꞌi!'