MAREK 2

1

2

3

4

5

6

7

8

9

10

11

12

13

14

15

16

¹Pal varesave dživesa geľa o Ježiš pale andro foros Kafarnaum a but džene pes dodžanle, hoj hino khere.

²Takoj pes zgele ajci manuša, hoj na sas kaj te ačhel, aňi paš o vudar. A vakerelas lenge pal o evaňjelium.

³Akor štar murša ľidžanas jekhe banges ko Ježiš,

⁴ale vaš oda, hoj ode sas but manuša, on pes našťi dochudle le nasvaleha ke leste. Avke otkerde e strecha a mukle le banges tele le haďoha ode, kaj sas o Ježiš.

⁵Sar dikhľa o Ježiš lengero pačaben, phenďa le bangeske: “Čhavo miro, odmukle tuke hin o bini.”

⁶No bešenas ode the varesave zakoňika a andro jile peske gondoľinenas:

⁷“Sar kada manuš kavke šaj vakerel? Ruhinel pes! Ňiko našťi odmukel o bini, ča jekh o Del!”

⁸O Ježiš prindžarďa andro duchos, hoj on pal leste kavke gondoľinen, a phenďa lenge: “So oda gondoľinen andre tumare jile?

⁹So hin lokeder? Te phenel le bangeske: ‘Odmukle tuke hin o bini’, či te phenel: ‘Ušťi, le tiro haďos a dža’?

¹⁰Ale vaš oda, hoj te džanen, hoj le Čhas le Manušeskeres hin pravos the zor te odmukel pre phuv o bini” – phenďa le bangeske:

¹¹“Phenav tuke: Ušťi, le tiro haďos a dža khere!”

¹²Ov takoj ušťiľa a savore dikhle, sar iľa peskero haďos a geľa het. Savore pes čudaľinenas, lašarenas le Devles a phenenas: “Mek šoha (ňikda) kajso vareso na dikhľam!”

¹³Geľa pale paš o moros. But manuša džanas pal leste a ov len sikavelas.

¹⁴Sar džalas, dikhľa le Levi, le Alfeoskere čhas, sar bešelas pre colňica, a phenďa leske: “Av pal mande!” A ov ušťiľa a geľa pal leste.

¹⁵Sar o Ježiš bešelas ke leste andro kher pašal o skamind, but colňika the binošne bešenas leha the leskere učeňikenca, bo but ajse manuša pal leste džanas.

¹⁶Ale sar les dikhle o zakoňika the o Farizeja te chal le colňikenca the le binošnenca, phučle leskere učeňikendar: “Sar oda, hoj pijel the chal le colňikenca the le binošnenca?”

¹⁷Sar ada šunďa o Ježiš, phenďa lenge: “Le sastenge na kampel le doktoris, ale le nasvalenge. Me na avľom te vičinel le čačipnaskeren, ale le binošnen!”

¹⁸Le Janoskere učeňika the o Farizeja pes poscinen. Varesave avle a phučle le Ježišostar: “Soske pes le Janoskere the le Farizejengere učeňika poscinen, ale tire na poscinen?”

¹⁹A o Ježiš lenge phenďa: “Či šaj poscinen o hosci pro bijav, medik hino lenca o terno? Medik hino lenca o terno, našťi pes poscinen!

²⁰Ale avena ajse dživesa, hoj o terno na ela lenca, a andre ola dživesa pes poscinena.

²¹Se ňiko na zasivel le neve pochtaneha e chev pro purane gada, bo paľis o nevo pochtan šaj odčhinel kotor le puranestar a kerela pes mek bareder chev.

²²A ňiko aňi na čhivel e nevi mol andro purane cipune gone, bo e nevi mol čhingerela e cipa a čuľola avri a o gone čhinďona. Ale e nevi mol pes čhivel andro neve gone.”

²³Jekh Šabbat (sombat), sar o Ježiš džalas pašal e maľa, kaj sas sadzimen, leskere učeňika chudle te čhingerel o klasi.

²⁴O Farizeja leske phende: “Dikh, keren oda, so našťi keren pro Šabbat!”

²⁵Ov lenge phenďa: “Mek šoha na genďan, so kerďa o David, sar les na sas so te chal a sas bokhalo ov the leskere manuša?

²⁶Akor, sar sas nekbareder rašaj o Ebjatar, geľa andro kher le Devleskero a chalas o sentna mare, so šaj chan ča o rašaja a ňiko aver – a diňa the peskere manušen.”

²⁷Phenďa lenge: “O Šabbat hino kerdo prekal o manuš a na o manuš prekal o Šabbat!

²⁸O Čhavo le Manušeskero hino Raj the upral o Šabbat.”