MAREK 13

1

2

3

4

5

6

7

8

9

10

11

12

13

14

15

16

¹Sar avelas o Ježiš avri andral o chramos, phenďa leske jekh le učeňikendar: “Dikh, Rajeja, save bara the save stavbi!”

²O Ježiš leske odphenďa: “Dikhes kala bare stavbi? Na ačhela kade bar pre bareste; sa ela tele čhido.”

³Sar bešelas pre Olivovo brehos, khatar dičhol o chramos, avle ke leste korkore o Peter, o Jakob, o Jan the o Andrej a phučle lestar:

⁴“Phen amenge, kana oda avela? Pal soste prindžaraha, hoj oda imar hin pašes?”

⁵O Ježiš lenge chudľa te vakerel: “Merkinen, hoj tumen vareko te na klaminel!

⁶Bo ena but ajse, save avena andre miro nav a phenena: ‘Me som o Kristus!’ a cirdena pro falošno drom but dženen.

⁷Sar šunena pal o maribena a hoj pes maren o narodi, ma predaran, bo oda mušinel te avel, ale mek na ela o koňec.

⁸Bo o narodos džala pro narodos a o kraľišagos pro kraľišagos. Pre varesave thana e phuv razisaľola a ela bari bokh. Oda ela o anglune dukha le svetoskere andro trapišagos.

⁹Ale tumen pre peste merkinen! Vaš ma tumen lena pro sudi; andro sinagogi tumen dena te marel a vaš ma ačhena anglo bare raja the anglo kraľa, hoj lenge te svedčinel.

¹⁰Ale angloda ešeb (peršo) musaj te avel vakerdo o evaňjelium savore narodenge.

¹¹Sar tumen ľidžana, hoj tumen te phanden andre, ma starinen tumen pal oda, so vakerena. Ale vakeren oda, so tumenge odi ora ela dino te phenel, bo na tumen vakerena, ale o Sentno Duchos.

¹²Phral phrales dela andre, hoj les te murdarel, a o dad peskere čhas. O čhave džana pre daj the pro dad a murdarena len.

¹³Vaš miro nav tumen savoredžene našťi avri ačhena. Ale oda, ko ľikerela avri andro pačaben dži o agor, ela spasimen.”

¹⁴“Sar dikhena oda baro džungipen, so meľarel andre o chramos, pre oda than, kaj na majinel te el – oda, ko genel, mi achaľol – akor ola, save ena andre Judsko, mi denašen upre pro verchi.

¹⁵Oda, ko ela pre strecha, te na avel tele, hoj peske vareso te lel andral o kher.

¹⁶Oda, ko ela pre maľa, te na visaľol pale khere vaš o gada.

¹⁷No andre ola dživesa ela igen phares le khabňenge the ole džuvľenge, save den te pijel le čhavoren.

¹⁸Modľinen tumen, hoj pes oda te na ačhel jevende!

¹⁹Bo ola dživesa ena ajse phare, sar mek šoha (ňikda) na sas, kanastar o Del stvorinďa o svetos, a imar šoha buter na ela.

²⁰A te o Raj na kerďahas frimeder ola dživesa, na uľahas zachraňimen ňisavo manuš. Ale vaš o manuša, saven peske kidňa avri, kerďa ola dživesa frimeder.

²¹Te tumenge akor vareko phenďahas: ‘Dikh, kade hin o Kristus!’ abo: ‘Kode hino!’ – ma pačan.

²²Bo avena but falošna mesijaša, save phenena pal peste, hoj hine o Kristus, the but falošna proroka a kerena bare znameňja the zazraki, hoj te cirden pro falošno drom – te pes diňahas – the olen, kas peske o Del kidňa avri.

²³Tumen pre peste merkinen! Savoro tumenge phenďom anglal.”

²⁴“Andre ola dživesa, pal oda pharipen, o kham kaľola a o čhonoro imar na labola.

²⁵O čercheňa perena andral o ňebos a o ňeboskere zora pes čhalavena.

²⁶Akor dikhena le Čhas le Manušeskeres te avel pro ňeboskere chmari andre zor the andre bari slava.

²⁷Ov bičhavela peskere aňjelen, hoj te skiden upre leskere avrikidle manušen pal savore štar seri le svetoske – andral jekh agor pre phuv dži andre aver.”

²⁸“Le figovňikostar peske len o podobenstvo: Sar leskere konara hine imar kovle a o prajti aven avri, džanen, hoj o ňilaj hino pašes.

²⁹Avke the tumen, sar dikhena, hoj pes oda savoro ačhel, džanen, hoj oda hino pašes paš o vudar.

³⁰Čačipen phenav tumenge, hoj na predžala kada pokoleňje, medik pes kada savoro na ačhela.

³¹O ňebos the e phuv našľona, ale mire lava šoha na našľona.”

³²“Ale ole dživesestar the ola oratar na džanel ňiko, aňi o ňeboskere aňjela, aňi o Čhavo, ča jekh o Dad.

³³Merkinen pre tumende, ma zasoven! Bo na džanen, kana avela odi ora.

³⁴O Čhavo le Manušeskero hino ajso sar jekh manuš, savo omukľa peskero kher a geľa het. Le sluhenge diňa pes pal oda te starinel. Phenďa dojekheske, so te kerel, a le vartašiske (stražňikoske) prikazinďa, hoj te merkinel a te na zasovel.

³⁵Vašoda merkinen a ma zasoven, bo na džanen, kana avela o raj le khereskero: Či rači, vaj pal jepaš rat, či akor, sar o kohutos giľavel, vaj tosara.

³⁶Hoj te na avel akor, sar les na užarena, a arakhela tumen te sovel.

³⁷So tumenge phenav, savorenge phenav: ‘Ma zasoven!’ ”