MAREK 3

1

2

3

4

5

6

7

8

9

10

11

12

13

14

15

16

¹Sar geľa pale andre sinagoga, sas ode jekh manuš, saves sas ňevladno vast.

²A kamenas te džanel či les sasťarela avri pro Šabbat (sombatone), hoj les te den andre.

³O Ježiš phenďa ole manušeske, saves sas ňevladno vast: “Ačh kade maškaral!”

⁴A phučľa lendar: “Či šaj pro Šabbat mištes te kerel, vaj na? O dživipen te zachraňinel, či te murdarel?” Ale on sas čhit.

⁵Dikhľa pro manuša pašal peste choľaha ale the pharipnaha, bo sas ajse bijileskere. Phenďa le manušeske: “Nacirde o vast!” Sar nacirdľa, sasťiľa leske avri a sas ajso sar o dujto vast.

⁶O Farizeja pes takoj gele te dovakerel le Herodijanenca, sar te murdarel le Ježiš.

⁷O Ježiš peskere učeňikenca geľa paš o moros. Džanas pal leste but manuša andral e Galileja, Judsko,

⁸Jeruzalem, Idumea the Zajordansko. Džanas pal leste the but nipi andral o Tir the Sidon, bo šunde pal oda, so kerel.

⁹Le učeňikenge phenďa: “Pririchtinen mange e loďka, hoj pes pre ma te na ispiden.”

¹⁰Bo but dženen sasťarďa a savore nasvale pes pre leste ispidenas, bo kamenas pes lestar te chudel.

¹¹Sar o nalačhe duchi les dikhenas, perenas anglal leste a vriskinenas: “Tu sal o Čhavo le Devleskero!”

¹²Ale o Ježiš lenge zakazinďa, hoj ňikaske ada te na phenen avri.

¹³Paloda o Ježiš geľa pro brehos a vičinďa paš peste olen, saven kamľa, hoj te džan leha. Sar gele ke leste,

¹⁴kidňa peske avri dešudujen, hoj te aven leha a te bičhavel len te vakerel o evaňjelium. Vičinelas len apoštola.

¹⁵A diňa len autorita te tradel avri le demonen.

¹⁶Kala hine ola dešuduj (12): O Šimon (saveske diňa nav Peter),

¹⁷o Jakob the leskero phral o Jan, le Zebedeoskere čhave (savenge diňa nav Boanerges, so hin prethodo: Le Perumoskere Čhave),

¹⁸o Andrej, o Filip, o Bartolomej, o Matuš, o Tomaš, o Jakob le Alfeoskero čhavo, o Tadeus, o Šimon Kanaansko

¹⁹the o Judaš Iškarijotsko, savo les paľis zradzinďa.

²⁰Avle andro kher a pale pes zgele igen but manuša. Vašoda len na sas kana mek aňi maro te chal.

²¹Sar ada šunde le Ježišoskeri famelija, avle, hoj les te len het, bo phende pre leste, hoj našaďa e goďi.

²²O zakoňika, save avle andral o Jeruzalem, phende pre leste, hoj andre leste hin o Belzebul, savo hino vodcas le demonenge, a hoj leskera zoraha tradel avri le demonen.

²³O Ježiš peske len vičinďa a chudľa lenge te vakerel andro podobenstva: “Sar šaj tradel o satan avri le satan?

²⁴Te pes o kraľišagos rozulavela a džala pre peste, oda kraľišagos našťi obačhela.

²⁵A te pes o kher rozulavela a džala pre peste, oda kher našťi obačhela.

²⁶Avke, te o satan džala korkoro pre peste a rozulavela pes, našťi obačhela, ale avľa leskero koňec.

²⁷Ňiko našťi džal ko zoralo murš andro kher te čorel leskere veci, medik ole zorale muršes na phandela. Paľis šaj čorel avri leskero kher.

²⁸Čačipen tumenge phenav, hoj savore bini the o nalačhe lava, so vakerena o manuša pro Del, lenge ela odmukle.

²⁹Ale oleske, ko pes ruhinel pro Sentno Duchos, na ela šoha (ňikda) odmuklo, ale leskero binos ačhela pre leste furt.”

³⁰Bo phenenas: “Hin andre leste nalačho duchos.”

³¹Avľa leskeri daj the leskere phrala, ačhenas avri a dine les te vičinel.

³²Bešenas pašal leste but manuša a phende leske: “Tiri daj the tire phrala tut roden.”

³³Ov lenge odphenďa: “Ko hin miri daj a ko hin mire phrala?”

³⁴Visaľiľa ke ola, save leha bešenas, sikaďa pre lende a phenďa: “Dikhen, miri daj the mire phrala.

³⁵Bo sako, ko kerel le Devleskeri voľa, hino miro phral, miri pheň the miri daj.”