1Habahim Yesu Kapanayum nuꞌuna ya lau afulen na ya lau Diudeya Nuꞌuna yai be Diyodan Hoꞌowana ya gayo dohe. Ena laulau mate fuya ouꞌouli baiwa ya faꞌoigogoma lisina haba ya fafatalahadi.
2Falesiya haisa Yesu sa anpate bena sa fasai buluhi, be sa fatiꞌoi tiyen, Eda laugagayo ya libaen, taumoho lahuna gonowana ya tausohoꞌen?
3Alinadi Yesu ya bui iyen, Mose laugagayo somo ya felemiu?
4Tiyen, Mose dudulai taumoho ya felen, be tausoho pepana ya uli na habahim lahuna ya dui.
5Yesu ya falibadi iyen, Mose laugagayo te ya uli enehemiu paꞌana nuwamiu sa poꞌi.
6“Fatubu yai Yaubada dodoga ya ginaulidi, taumoho yo waihin.
7Logena taumoho haba tinana yo tamana ya lau afuledi na ma lahuna sa miya esega, be sa famala esega.
8Be iti hige luwaga na sa famala esega.”
9Somo Yaubada haꞌa ya falau esegahi mate doga ibege i fatausohodi.
10Yesu maꞌana hewahewali sa fuyo luma ganahewana habahim liba wa aniyona sa fatiꞌoi.
11Ya falibadi iyen, Taumoho lahuna ya tausohoꞌen be waihin hesa ya fai mate luwagadi ni ponoli sa ginauli.
12Gonogonowana doha waihin lahuna ya tausohoꞌen na taumoho hesa ya fai mate sa ponoli.
13Dodoga haisa wawaya sa ledima Yesu lebena bena ya abiꞌonadi na tau famuli watanina sa sagasagaliyedi.
14Yesu ya itadi be manana ya bala. Yo fede ya libalau tau famuli watanina lebedi iyen, Wawaya ti laoma lisigu. Tabu au gududi, paꞌana Yaubada Aba Baꞌisa mate dodoga doha wawaya itete, enehedi.
15Yena sai ya kawawananaha doha wawaya haba Yaubada Aba Baꞌisa ya luhufi.
16Habahim wawaya ya labadi na nimana ya tole hewadi yai be ena loholoho ya feledi.
17Yesu edaꞌeda yai ya laulau na taumoho hesa ya lautafotafoma be nuwanuwana yai ya tulibono na ya fatiꞌoi iye, Tanuwaga loholohona, somo haba E ginauli be mwahuli hige ofina E lobahi?
18Yesu iyebom, Sidohana be wa kawa loholohoꞌegu? Hige sai laꞌi i loholoho doha Yaubada.
19Laugagayo mate haꞌa wa sibaidi: Tabu u aiyunu; tabu doga hesa lahuna maꞌem au eno bili; tabu u angafu; tabu u lau bwalabwala; tabu bwalabwala yai hidam ena ginauli hesa u abi. Tamam yo tinam bena wa faꞌatitiyedi.
20Taumoho iye, Tanuwaga, ma wawayagu na ya laoma be aho ite mate laugagayodi ni E laulau watanidi.
21Yesu ma gadosisina ya mainene lau lisina, na iye, Ginauli esega moho hige u ginauli. U fuyo be em ginauli mahudoꞌidi u uneꞌunedi na monidi tau gogo gesagesa u feledi. Na u lau watanigu. Ai Galewa haba wa fagogo.
22Liba ni ya atahiyen yo fede ma nuwa heyayana ya aulaha. Paꞌana ya fagogo wananaha.
23Yesu ya itaꞌita lau ana hewahewali lebedi na ya falibadi iye, Yaubada Aba Baꞌisa luhuluhu launa mate tau fagogo lisidi yai ya pili.
24Tau famuli watanina liba ni sa atahi be sa tauhiti. Na Yesu ya falibadi iyen, Nanatugu, Yaubada Aba Baꞌisa luhuluhu launa mate ya pili wananaha.
25Kamela hige gonowana ai diu galina i luhulau! Haba ya talaꞌafi. Gonogonowana doha, tau fagogo hige gonowana i luhulau Yaubada ena Aba Baꞌisa.
26Yo fede tau famuli watanina aluwadi sa potifahi be sa fatiꞌo fuyoꞌidi tiyen, Sai haba ya mwahuli?
27Yesu ya itaꞌita lau lebedi na iyen, Dodoga hige gonowadi. In moho Yaubada gonowana ginauli mahudoꞌidi ya ginaulidi.
28Pita iyen, Wa sibai mate ginauli mahudoꞌidi ꞌe lau afuledi na ꞌe lau watanim.
29Yesu iyen, Wananaha, E falibamiu. Yena sai ena nuꞌu, haidana, lolofuna, tinana, tamana, nanatuna e ena gabu ya lau afuledi Yau debagu yai yo wasa loholohona debana yai,
30haba loholoho ya fahoina. Haba ena luma, haidana, lolofuna, afa tinana, nanatuna yo ena gabu sa ouli wananaha. Haba ya ankamkamna hinaga na fuya matada yai haba mwahuli hige ofina ya lau lobahi.
31Salumadi sa bwaꞌi haba sa mulita yo salumadi sa mulita haba sa bwaꞌi.
32Yesu ya bwaꞌi na ana hewahewali mate mulina yai sa laulau watan be sa hasai Yelusalem. Safuhudohudoꞌi luwaga sa noꞌo, na dodoga mate sa ꞌwasabu. Yesu ana hewahewali ya lawe hudoꞌiyedi be ginauli somo - somo haba sa tubu ai lisina mate ya falibadi.
33Iyen, Hola E falibamiu, ai Yelusalem haba Doga Natuna sa fele lawen tau antalasam babaꞌisadi yo laugagayo tau lau faꞌataena ai nimadi. Diusi dodogadi sa fagilu bena ya peꞌi yo fede sa fele lawen taꞌowawa lisidi,
34be iti haba sa lau faliuhwaꞌen, sa lau kanisoi, sa pidili yo sa wunui. In moho lahai fafaihonana yai haba ya mwahuli fuyo.
35Habahim Sebedi nanatuna luwaga Diyemsi yo Diyon sa laoma Yesu lisina be tiyen, Tanuwaga, ginauli hesa ꞌe fanuha bena wa ginauli enehemai.
36Yesu iyen, Ginaulina somo bena enehemiu E ginauli?
37Alinana sa bui tiyen, ꞌE fanuha bena hesa ai sibam ya taꞌai, na hesa ai seulim em Nuꞌu Namanamalina yai.
38Yesu ya falibadi iyebom, Somo ami anꞌanꞌetai mate hige au sibai. Gonowamiu haba ami kamkamna doha Yau? Ibe peꞌi babasitona E abi, haba gonowamiu ami abi doha?
39Alinana sa bui tiyen, Ai gonowamai. Yesu ya falibadi iyen, Ii–, haba ami ankamkamna doha Yau! Yo peꞌi babasitona hinaga haba ami abi.
40In moho, Yau hige egu dudulai bena haba yawa, “Tataumiu luwaga ai sibagu yo ai seuligu au taꞌai. Sai ena aba taꞌai Yaubada haꞌa ya abi nonohai mate, in enehena.”
41Safuhudohudoꞌi sa atahi be Diyemsi yo Diyon sa manabalaꞌedi.
42Yo fede Yesu ya yoga gogondima na ya falibadi, iyen, Ami siba mate taꞌowawa edi nuwatuhu bena iti babaꞌisa, be edi nuꞌu sa ita watanidi. Edi babaꞌisa lalaꞌi, edi gigibwali sa fapaisowa edi dodoga lisidi yai be edi nuwatuhu haba sa lau watanidi.
43Tabu emi laulau doha. Sai ya fanuha ya hasai wananaha, in bena mahudoꞌidi edi tau lau fayofayo.
44Yo yena sai ya fanuha ya bwaꞌi, in ya famala emi tau paula.
45Doga Natuna ya laoma tanohi yai hige bena dodoga ena ti paisowa. In bena dodoga edi ya paisowa yo ena mwahuli ya pei, be dodoga ouꞌouli ya une fafuyodi.
46Habahim sa mahano lau Diyeliko nuꞌuna yai. Yesu ma ana hewahewali yo baiwa laꞌilaꞌi nuꞌuna sa lau afulen na tau anꞌanꞌeta hesa mata toutouna hesana Batimaiyesa edaꞌeda sadaina yai ya taꞌataꞌai. In mate Timaiyesi natuna.
47Ya atahi mate Yesu, Nasaleta dogana, ya laolaoma yo fede ya yoga iyen, Yesu, Deiwidi Laulauwewena! U nuwatohatohaegu!
48Dodoga boludi sa sagasagaliyen bena ya famakano. In moho ya yoga laꞌilaꞌi boda, iyen, Deiwidi Laulauwewena! U nuwatohatohaegu!
49Yo fede Yesu ya bwaꞌi tohai na, iyen, Au yogaiyama! Be doga mata toutouna sa fayoga tiyen, Ya yogaim, be u obiyo! Na nuwam i adidili!
50Yo fede kaleko, tauna yai ya pei, na ya obiyofahi be ya lau Yesu lisina.
51Yesu ya fatiꞌoi, iyen, Em fanuha somo bena E ginauli? Taumoho mata toutouna iyen, Tanuwaga, E fanuha bena matagu wa falaladi.
52Yesu ya faliba iyen, U lau! Em kawawananaha haꞌa ya faloholohom. Yo fede matana ya falaladi. Yesu ya famuli watan be edaꞌeda yai sa lau.
