1Galili Gabogabona yai sa dohe be Gelasa nuꞌuna yai sa duna.
2Yesu ya tulubeꞌu na taumoho hudoꞌi yaluwa heyaheyayadi ganahewana yai ya laoma. Bwana yai ya kalamahano be ya laoma Yesu lisina.
3In mate duyufi atiꞌatipudi yai ya gogogo. Hige gonowana sai i faseni bodai.
4Fuya ouꞌouli nimana yo ahena sa fasenidi in moho seni ya eli motudi yo powati ahena yai ya dem pwaipwaidi. Hige gonowana sai i abi famamayo.
5Lahai yo iꞌipa ya laulau gaibu ai bwana yo ai tuꞌa. Ya ꞌwalaꞌwalawui yo tauna ya anseseidi ai umeꞌehu senadi.
6Yesu hola ya laolaoma na dogana ya itaꞌita lau be ya ita yo fede ya fabelele be nuwanuwana yai ya tulibono.
7Habahim ya liba laꞌilaꞌi iyen, Yesu, Hewa Wananaha Yaubadana Natuna! Somo lisigu yai wa fanuha? E anꞌetaim Yaubada hesana yai, tabu u fakamkamnagu!
8(Ya liba doha paꞌana Yesu iyen, “Yaluwa heyaheyayadi doga ni au lau afulen!”)
9Yo fede Yesu ya fatiꞌo lau lisina iyen, Hesam somo? Taumoho iyen, Hesagu “Baiwa–,” ꞌe ouli wananaha!
10Ya anꞌeta lau Yesu lebena tabu yaluwa heyaheyayadi ai nuꞌu ni i lau weꞌaidi.
11Na sadai yai mate salai baiwadi sa suwasuwali daha sadaina yai.
12Yo fede yaluwa heyaheyayadi Yesu sa anꞌetai tiyen, Aee–, u fatamalimai ai lau salai ai ganahewadi ai miya.
13Yo fede Yesu ya duidi be sa kalamahano na sa lau salai baiwadi doha 2,000 sa luhufidi. Salai sa leta kokoli daha yai be sa dago lidi hoꞌowa yai. Yo fede sa kapulolo.
14Salai tau itaꞌita watanidi sa gela be sa lau sa fatala libalibaen taon yai yo mulimulina nuꞌudi yai be dodoga sa laoma somo ya tubu sa ita.
15Sa mahanoma Yesu lisina, taumoho wa uluna ya dudulai. Kaleko ya liꞌo, na ya taꞌataꞌai sa ita. Yo fede mahudoꞌidi sa ꞌwasabu.
16Somo ya tubu taumoho ni yo salai lisidi yai salumadi sa ita, mate dodoga edi sa liba.
17Yo fede Yesu sa faliba tiyen, Aee–, ema nuꞌu u lau afulen!
18Waga yai Yesu ya awa na doga ya faloholoho wa ya libalau lisina iyen, Aee–, Yesu, bena E lau watanim!
19Yo fede alinana, Yesu ya bui iyen, Hige gonowana! U fuyo em luma yo am boga lisidi be Guyau ena nuwatohatoha lisim yai yo somo ya ginauli lebem yai enehedi u liba.
20Yo fede doga wa ya aulaha ya lau Dekapolisi Nuꞌuna yai be somo Yesu ya ginauli lisina yai ya falibadi. Salumadi sa atahiyen mate sa noꞌo.
21Waga yai Yesu sa dohe be sa mahano yo fede baiwa sa faꞌoigogon.
22Aba oiꞌoigogo baꞌisana hesana Diyailusi ya mahanoma Yesu ya ita yo fede ya hoba lidi ahena yai.
23Ya anꞌeta gadogadola lau lisina iyen, Natugu waiwaihin mate nuꞌanuꞌana. Te lau be wa abilau ai tauna haba ya loholoho!
24Yo fede Diyailusi maꞌena Yesu sa lau. Dodoga mate sa faipapipapi na sa laulau watanidi.
25Waihin hesa ana asiyebo mate ꞌwasina ya miyamiya afulen ee–, bolima safuhudohudoꞌi luwaga.
26Doketa boludi fuya lofalofa edi mulamula yai sa fafakamkamna. Ena moni mahudoꞌina ya pei faꞌofi bena haba loholoho ya lobahi. In moho ana asiyebo ya fafalaꞌi.
27Yesu wasana waihin wa ya atahiyen be nuwana yai iyen, Ibe ana luhuluhu moho E abiꞌona haba E loholoho. Yo fede Yesu mulina yai ya laoma be dodoga pwaludi yai ya andudu balabala be ana luhuluhu ya abiꞌona.
29Amna ya atahi mate ꞌwasina ya miyamiya afulen ya fatautau yo ena kamkamna wa ya ofi.
30Yesu amna ya abi mate gigibwali ya lau afulen. Yo fede baiwa ganahewadi yai ya timuli bui be ya fatiꞌo iyen, Sai agu luhuluhu ya abiꞌina?
31Tau anpate alinana sa bui tiyen, Baiwa haꞌa wa ita, na sidohana be uwen, “Sai ya abiꞌinagu?”
32Yo fede Yesu ya itaꞌita asiꞌasi be tau abiꞌinana ya yoꞌoi.
33Waihin asiꞌasiyebona somo lisina yai ya tubu ya sibai yo fede ma ꞌwasabuna ya laoma be ya tulibono ahena yai na ya faliba dudulain.
34Yesu iyen, Natugu, nuwam i amna! Em kawawananaha debana yai asiyebona ni, ibege u abi fuyoi.
35Yesu hola waihin asiꞌasiyebona ya fafaliba na Diyailusi ena luma yai dodoga sa laoma be aba oigogo baꞌisana sa faliba tiyen, Natum haꞌa ya peꞌi. Tabu u modemode lau tanuwaga lisina.
36Sa libaliba, Yesu ya atahi yo fede iyen, Tabu u ꞌwasabu! U kawawananaha moho.
37Diyemsi ma hidana Diyon yo Pita iyabodi maꞌedi Yesu sa lau, na hige sai hesa.
38Sa mahano lau Diyailusi ena luma yai, bobohalahala yo tan sa atahi.
39Ya luhulau luma yai be ya falibadi iyen, Bobohalahala yo tan te sidohana? Tineꞌeu ni hige i peꞌi. Mate ya eno!
40Yo fede sa liuhwaꞌen. Habahim mahudoꞌidi ya duidi sa lau ganamuli. Na tamana, tinana yo tau famuli watanna faihona ya auledi be sa lau tineꞌeu edi aba tolena bilina yai.
41Ya abilau nimana yai na ya faliba iyen, Talita, koum! (Aniyona mate, “Tineꞌeu kiukiu, E falibam, ‘U obiyo!”)
42Hige walolona na ya laulau tiga. (Ena bolima mate 12). Laulau te debana yai edi noꞌo sa ofi.
43Yesu ya laugagayoꞌedi tabu sai, ena ti liba, yo ya falibadi bena sa fakalahe.
