Luukaṉu 4:9-32

⁹Puṯu tjingapungkula tawunu Tjarutjalumalakutu mamuku mayutjungku Yiitjunya katirra tjaatji tiṉangka katu nyinatjunu. Nyinatjunkula watjaṉu, “Tjinguru nyuntu Katutjaku katja nyinarra katunguru wararrakati!”

¹⁰Mamuku mayutjungku piyuku watjaṉu, “Katutjaku wangka yalatji ngaranyi, ‘Ilkari ngurrara tjuṯa tjananya Katutjalu watjalku nyuntunyaya purinytju kanyintjaku.’”

¹¹Palulanguru Yiitjula piyuku watjaṉu, “Katutjaku wangka kutjupa ngaranyi, ‘Marangkuntaya ilkari ngurrara tjuṯangku katiyanamalpa, puḻingkanu punkaltjipingka.’”

¹²Yiitjulu watjaṉu, “Katutjaku wangka ngaranyi yalatji, ‘Yaṉangungku wiya Katutjanya watjantjaku, paluru walytjangku kulira palyalpayi.’ Palulanguru ngayulu wiya Katutjanya watjalku ngayunya yaṉṯayaṉṯantjaku.”

¹³Mamuku mayutjungku Yiitjunya puṯu tjingapungkula puṯu kuliṉingi. Ngula piyuku ngalya yankula tjingapungkunytjakitjangku wantikatirra yanu.

¹⁴Palulanguru Yiitjunya yanu Katutjaku kurruntjarra, manta Kaliliyilakutu. Ngurra palula Yiitjunya nyinanyingka yaṉangu tjuṯangkuya watjarinangi, ngurra palula tjayiṯiwanangku.

¹⁵Yiitjunya yankula Tjuwuku tjaatji tjuṯawana tjananya nintirinangi. Nintiṉingitjangka kuliraya yaṉangu yuwankarrangku puḻkapungangi.

¹⁶Tawunu Natjaritjalakutu Yiitjunya yankula Tjuwuku tjaatjingka tjarrpangu, tjiṉṯu Tjarritiyingka. Kututja paluru Tjuwuku tjaatjingka tjarrpapayi, tjiṉṯu Tjarritiyingka. Ngurra nyarra palula paluru pipirri wiima nyinarra tiṉarringu. Tjaatjingka tjarrparra nyinarra pakaṉulpi Katutjaku wangka riitamilalkitja.

¹⁷Yiitjukuraya yungu piipa, Katutjaku wangka, yurrunpa nyinapayingku Yaatjayalu tjunutja. Piipa palunya ruulutapintjatjanu kanyiraya yungu. Yiitjululpi piipa palunya mantjira yarralytjanu riitamilalkitjangku. Alatji paluru riitarringu,

¹⁸“Katutjaku kurrunpatjarra ngayulu nyinanyi palumpa waarrka palyalkitja. Katutjaluṉi ngurrtjara watjaṉu palumpa wangka tjakultjunkunytjaku, maralpa tjuṯangka, yaṉangu kutjupa tjuṯangkaṯarra. Paluru ilta aḻṯurunytju nyinanyi. Paluru tjiilangka nyinapayi tjuṯa yaṉṯayaṉṯalpayi. Paanga tjuṯaṯarra paluru yaṉṯayaṉṯalpayi. Paluru maralpa tjuṯaṯarra yaṉṯayaṉṯalpayi.

¹⁹Paluruṉi wantirriyaṉu ngayulu yalatji nyurra nyatjakultjunkunytjaku, ‘Katutjalu nyurrangarrimpa kuya waṉirra yaṉṯayaṉṯalku.’”

²⁰Yiitjulu yalatji riitarrirra piipa panyapa ruulutapimilara wati kutjupakura maa katirra yungkula nyinakatingu. Tjaatji palulaya yaṉangu tjuṯangku yungkula nyinakatingutja nyakula nyinatjunu.

²¹Palulanguru Yiitjulu tjananya nintiṉu yalatji, “Wangka panyapa Yaatjayalu yurrunpa tjunutja ngayunyatjarra. Yaatjayalu ngayunya watjaṉu, Katutjalu ngayunya wantirriyaṉu nyurrangarrila tjakultjunkunytjaku.”

²²Kulira tjana yunyparringkula wangkangu. “Ninti puntungkulanya nintiṉi. Paluru ngangkari puntutjarrangku palyalpayi. Nganalumpa palunya nintiṉu.” Kutjupa tjuṯangkuya watjaṉu, “Palatja wiya Katutjakuṉu, palatja ngaa ngurrara, Tjutjupaku katja nyinanyi.”

²³Yiitjulu tjananya watjaṉu, “Tjinguruṉinyurra watjalku, ‘Ngaa ngurrara nganaṉanya Katutjakuṉu ngangkari tiṉatjarrangku palyala!’ Tjinguruṉinyurra yalatjiṯarra watjalku, ‘Kuliṉulatju, nyuntu tawunu Kapaniyamala tjananya ngangkaritjarrangku palyaṉutja. Ngaangka nganaṉanyalpilanyatju ngangkaritjarrangku palyala!, nyuntupa ngurra walytjangka.’”

²⁴Piyuku tjananya Yiitjulu watjaṉu, “Wangka ngaatjanyaya kulila! Katutjaku wangka watjalpayiku wiyaya yunyparringanyi, ngurra kutju ngurrara tjuṯaraya. Palumpa wangka kulilwiyaya nyinanyi. Yalatji nguwanpa ngayuku wangka nyurrangarri wiya kuliṉi.”

²⁵Yiitjulu tjananya piyuku watjaṉu, “Yuwa, ngayulu tjananya tawunu Kapaniyamala palyalpayi. Katutjaluṉi wantirriyaṉu tawunu kutjupa tjuṯangka yaṉangu tjuṯa palyantjaku, Yilaatjanya wantirriyaṉutja nguwanpa, ngurra walytja ngaakutu wiyaṉi wantirriyaṉu. Wangka yalatjinyurra kulintjaku. Yirriṯi Katutjaku wangka watjalpayi, Yilaatjanya nyinanyingka, Tjuwu tjuṯaya kuya nyinangi. Wiyaya Yilaatjaku wangka kulilpayi. Yiiya tjirripala nguwanpaya nyinangi, kapi punkantjawiya. Mangarri tjanampa wiyarringu. Minyma waḻukuta tjuṯaṯarra mangarriwiyaya nyinangu.

²⁶Katutjalu wiya Yilaatjanya wantirriyaṉu tjanalakutu waḻukuta Tjuwu tjuṯakutu paḻtjantjaku, wiya, waḻukuta kutjupakutu paluru wantirriyaṉu paḻtjantjaku, manta kutjupangka Tjayitanala, tawunu Tjirapatjala. Palunya nguwanpa ngayulu kutjupa ngurrara tjuṯangka ngangkaritjarrangku palyalpayi.” Yiitjulu tjananya piyuku watjaṉu,

²⁷“Wangka kutjupa palunya nguwanpa yalatji. Katutjaku wangka watjalpayi yini Yilatjanya yirriṯi nyinanyingka, Tjuwu tjuṯaya kuya nyinangu, Yilatjaku wangka kulilwiya. Tjuwu pangki pikatjarra tjuṯaṯarraya nyinangi. Katutjalu wantirriyaṉutjangka Yilatjalu tjananya wantirra ngurra kutjupa ngurrara pangki pikatjarra palyaṉu, Tjiriyanya ngurrara, yini Nayamananya. Palunya nguwanpa ngayulu kutjupa ngurrara tjuṯangka ngangkaritjarrangku palyalpayi.”

²⁸Wangka panyapaya kulira tjaatji ngurrara tjuṯara yunytjuwiyarringu.

²⁹Ngurrkurringkula pakara Yiitjunya witira katingu, tawunungka tjayiṯiwana. Puḻi katuwanaya maa katingi. Tawunu tjanampa ngarangi puḻi katu palula. Katinguya puḻi ngankirrikutu, Yiitjunya yuṉṯura yiluntankukitjangku.

³⁰Palulanguru Yiitjunya ngururrngururrpa tjanampa yaṉangu tjuṯanguru yanu. Wiyaya nyangu palunya.

³¹Tawunu Kapaniyamalakutulpi Yiitjunya yanu. Tawunu palunya manta Kaliliyila ngarangi. Tawunu palula Yiitjunya yankula Tjuwuku tjaatjingka tjarrparra nintiṉu tjananya, tjiṉṯu Tjarritiyi.

³²Yiitjulu tjananya nintingku nintintjala yunypangkuya kuliṉingi, “Ngaangkulanya nintingku nintilpayi, wiya Muutjaku wangka nintilpayi tjuṯangku nintingkulanya nintilpayi, wiya.”