Luka 4:9-32

⁹Ibilisi akamchukua mpaka Yerusalemu, kwenye mnara wa Hekalu, akamwambia, “Kama wewe ni Mwana wa Mungu,

¹⁰kwa maana imeandikwa: Atawaamuru malaika wake wakulinde,

¹¹na tena, Watakuchukua mikononi mwao usije ukajikwaa mguu wako kwenye jiwe.”

¹²Lakini Yesu akamjibu, “Imeandikwa: Usimjaribu Bwana Mungu wako.”

¹³Ibilisi alipokwishamjaribu kwa kila njia, akamwacha kwa muda.

¹⁴Yesu alirudi Galilaya akiwa amejaa nguvu za Roho Mtakatifu, na habari zake zikaenea katika sehemu zote za jirani.

¹⁵Naye akawa anawafundisha watu katika masunagogi yao, akasifiwa na wote.

¹⁶Basi, Yesu alikwenda Nazareti, mahali alipolelewa, na siku ya Sabato, aliingia katika sunagogi, kama ilivyokuwa desturi yake. Akasimama ili asome Maandiko Matakatifu kwa sauti.

¹⁷Akapokea kitabu cha nabii Isaya, akakifungua na akakuta mahali palipoandikwa:

¹⁸“Roho wa Bwana yu juu yangu, kwani amenipaka mafuta niwahubirie maskini Habari Njema. Amenituma niwatangazie mateka watapata uhuru, vipofu watapata kuona tena; amenituma niwakomboe wanaoonewa,

¹⁹na kutangaza mwaka wa neema ya Bwana.”

²⁰Baada ya kusoma, akafunga kile kitabu, akampa mtumishi, kisha akaketi; watu wote wakamkodolea macho.

²¹Naye akaanza kuwaambia, “Andiko hili mlilosikia likisomwa, limetimia leo.”

²²Wote wakavutiwa sana naye, wakastaajabia maneno mazuri aliyosema. Wakanena, “Je, huyu si mwana wa Yosefu?”

²³Naye akawaambia, “Bila shaka mtaniambia msemo huu: Mganga jiponye mwenyewe, na pia mtasema: Yote tuliyosikia umeyafanya kule Kafarnaumu, yafanye hapa pia katika kijiji chako.”

²⁴Akaendelea kusema, “Hakika nawaambieni, nabii hatambuliwi katika kijiji chake.

²⁵Lakini, sikilizeni! Kweli kulikuwa na wajane wengi katika nchi ya Israeli nyakati za Eliya. Wakati huo mvua iliacha kunyesha kwa muda wa miaka mitatu na nusu; kukawa na njaa kubwa katika nchi yote.

²⁶Hata hivyo, Eliya hakutumwa kwa mjane yeyote ila kwa mwanamke mjane wa Sarepta, Sidoni.

²⁷Tena, katika nchi ya Israeli nyakati za Elisha kulikuwa na wenye ukoma wengi. Hata hivyo, hakuna yeyote aliyetakaswa ila tu Naamani, mwenyeji wa Siria.”

²⁸Wote waliokuwa katika lile sunagogi waliposikia hayo walikasirika sana.

²⁹Wakasimama, wakamtoa nje ya mji wao uliokuwa umejengwa juu ya kilima, wakampeleka mpaka kwenye ukingo wa kilima hicho ili wamtupe chini.

³⁰Lakini Yesu akapita katikati yao, akaenda zake.

³¹Kisha Yesu akashuka mpaka Kafarnaumu katika mkoa wa Galilaya, akawa anawafundisha watu siku ya Sabato.

³²Wakastaajabia uwezo aliokuwa nao katika kufundisha.