Luka 4:9-32

⁹Ma i agure urama Ierusalem, ma i vaki ia liu ta ra bur na pal na vartabar, ma i biti tana: Ba u natu i God, una pil ba mamati;

¹⁰tago di ga tumu ia: “Na tul tar kana umana angelo tam, diat a balaure u.

¹¹Ma go bula: “Diat a puak vatur u ma ra lima i diat, kan una tuke ra kaum ta ra vat.”

¹²Iesu i tatike tana: Di ga tatike: “Koko una valar ra tuluai kaum God.”

¹³Ba Satan i tar valam ia ma ra lavur varilam parika i vana papa kan ia.

¹⁴Iesu i talil ma ra dekdek i ra Tulungen urama Galilaia, ma i rarang vanavana ta ra lavur gunagunan.

¹⁵Ma i vartovo ta kadia lavur pal na lotu, ma diat par dia pite pa ia.

¹⁶Ma i pot Nasaret, nam i ga tavua tana; i ruk ta ra pal na lotu ta ra Bung Sabat, da kana mangamangana iat, ma i tur upi na luluk.

¹⁷Ma di tul tar tana ra buk kai ra propet Iesaia. Ma i pelegi ra buk, ma i na tadav ra pakana di ga tumu ia tana dari:

¹⁸“A Tulungea i ra Luluai i ki tagu, Tago i tar tap iau upi ina varve ra bo na varvai tadav ra lavur luveana; I tar tulue iau upi ina varvai dari: Da papa vue diat di ga banubat diat, Ma ra lavur pula diat a nana mulai; Upi ina pala vue diat dia dala,

¹⁹Ma upi ina varvai ure ra e na varvalaun kai ra Luluai.”

²⁰Ma i paum ra buk, i tul tar ia mulai tai ra tultul, ma i ki ra pia, ma ra tarai par ta ra pal na lotu dia bobobe.

²¹Ma i tatike ta diat: Gori di tar pait ot pa go ra tutumu ta ra talinga i vavat.

²²Ma dia mulaot par tana, ma dia kaian ta ra ko na tinata i tatike; ma dia titir ure ba: Go laka natu i Iosep?

²³Ma i tatike ta diat: Kan avat a tatike go ra tinata valavalar tagu: Tena valagar, una valagar iu mulai; nam par ave valongore ba u ga pait ia arama Kapernaum, una pait ia bula ati ta kaum gunan iat.

²⁴Ma i biti: A dovot go iau tatike ta vavat: Pa ta propet ba di ru ia ta kana gunan.

²⁵A dovot go iau tatike ta vavat ba: Mangoro na ua na vavina dia ga ki Israel ta ra kilala i Elias, ba di babat ra lavur bakut a utul a kilala ma ra laptikai na gai, ma ra ngala na mulmulum i tup ra gunagunan parika;

²⁶ma pa di ga tulue Elias tadav diat, tadav uka ra ua na vavina ta ra pia na pal Sarepta ta ra gunan Sidon.

²⁷Ma mangoro na vukavuka dia ga ki Israel ta ra kilala kai Elisa ra propet, ma pa di vagomgom ta na ta diat, ia kaka Naaman a te Siria.

²⁸Ma diat par dia ki ra pal na lotu, dia kankan ba dia valongore go ra lavur tinata;

²⁹ma dia tut, ma dia okole vue kan kadia pia na pal, ma dia ben ia ta ra papar a tavarat ta nam ra luana di ga pait kadia pia na pal tana, upi diat a vue valilie vaba ia.

³⁰Ma i vana ka livuan kan diat.

³¹Ma i vana Kapernaum, a pia na pal Galilaia. Ma i tovo diat ta ra Bung Sabat

³²ma dia kaian ta kana vartovo, tago kana tinata i dekdek.