1Tjuwuku mayutju tjuṯangkuya pakara Yiitjunya katingu mayutju Payilatalakutu, kamantaku mayutjukutu.
2Mayutju Payilatalaya ngaratjunkula tjakultjunu yalatji, “Wati ngaangku tjananya yaṉangu tjuṯa watjalpayi yalatji, ‘Ngayulu Kurayitjanya nyinanyi nyurrangarrimpa Tjuwu tjuṯaku mayutju tiṉa. Kamantaku mani mantjilpayi tjuṯanya wiya nganaṉa yungkunytjaku. Nganaṉa kuwarri kuḻaṯa tjuuḻaṯarra mantjira tjungurringkula yankula kamanta ngurrara tjuṯa pikangku pungkunytjaku.’”
3Wangka palunya kulira mayutju Payilatalu Yiitjunya tjapiṉu, “Nyuntu Tjuwu tjuṯaku mayutju tiṉa nyinanyi?” Yiitjulu Payilatanya watjaṉu, “Nyuntu wangka palunya kulintjaku.”
4Mayutju Payilatalu tjananya tuḻkuku mayutju tiṉa tjuṯanya, yaṉangu kutjupa tjuṯanyaṯarra watjaṉu yalatji, “Ngayulu palunya tjapira kuliṉi, palatja palya ngaranyi, wiya paluru kuya palyaṉu.”
5Tuḻkuku mayutju tiṉa tjuṯangku Payilatanya watjaṉu, “Wati ngaangku tjananya yaṉangu tjuṯa nintira watjalpayi kamanta ngurrara tjuṯanya pungkunytjaku. Yurrunpa paluru tjananya yalatji watjalpayi manta Kaliliyilawana. Palulanguru ngurra ngaawana, manta Tjuutiyalawana yalatji tjananya watjalpayi.”
6Wangka palunya kulira mayutju Payilatalu tjananya tjapiṉu, “Wati palatja Kaliliyinya ngurrara, yilta?”
7Yaṉangu tjuṯangkuya yuwa watjaṉingka, Payilatalu kuliṉu, “Yirutanya Kaliliyinya ngurrara tjuṯaku tjanampa mayutju tiṉa nyinanyi. Paluru watjantjaku, ngayulu wiya. Paluru kuwarri ngalya yankula Tjarutjalumangkalpi nyinanyi.” Yalatji kulira Payilatalu tjananya watjaṉu Yiitjunya Yirutalakutu katinytjaku.
8Mayutju Yirutalu Yiitjukuṉu tjakulpa kulira yunytjurringkula nyinangu, nyakukitja. Yiitjunyaya katirra Yirutala ngaratjunanyingka Yirutalu yunyparringkula kuliṉingi, “Kala, tjinguru Yiitjulu ngangkaritjarrangku kutjupa kutjupa palyalku, ngayulu nyanganyingka.”
9Mayutju paluru Yiitjunya yilaṯuyilaṯu tjapiṉangi, kulilkitjangku. Yiitjunya ngarangi wangkawiya.
10Palulanguru tuḻkuku mayutju tiṉa tjuṯangku, Muutjaku wangka nintilpayi tjuṯangkuṯarra ngarala Yiitjunya puntura kuru watjaṉu.
11Mayutju Yirutaku tjuulytji tjuṯangku Yirutaluṯarra Yiitjunya yinkarra panypurangangu tjuṯangara. Yiitjunyaya kuuta mayutjukuṉungka, tjarrpatjunkula mayutju Payilatalakutu piyuku katingu.
12Yirutanya Payilatanyapula yunytjuwiya nyinapayi, rawa. Tjiṉṯu palulapula wangkarra kalyparringu.
13Mayutju Payilatalu tjananya yaḻṯingu tjungurrinytjaku, tuḻkuku mayutju tiṉa tjuṯa, mayutju kutjupa tjuṯa, yaṉangu tjuṯaṯarra.
14Payilatalu tjananya watjaṉu, “Nyurrangarri wati ngaatjanya ngalya katirra tjakultjunu ngayunya yalatji, ‘Wati ngaangku tjananya yaṉangu tjuṯa watjalpayi kamanta ngurrara tjuṯa tjana pungkunytjaku.’ Nyurrangarri kuru watjaṉutjangka, ngayuluṉa puṯu tjapiṉu wati ngaatjanya, nyurrangarrila mirangka. Puṯu tjapiraṉa kuliṉi, palya paluru ngaranyi, luwulampa kilytjuntankunytjawiya.”
15Payilatalu tjananya piyuku watjaṉu, “Mayutju Yirutaluṯarra wiya watjaṉu yalatji, ‘Yiitjulu luwulampa kilytjuntanu.’ Wiya paluru yalatji watjaṉu. Palulanguru paluru ngaatjanya ngalya wantirriyaṉu, watjalwiyangku. Kulilaya! Wati ngaatjanya mungutja, wiya tjana iluntankunytjaku, luwulampa kilytjuntankunytjawiya paluru ngaranyi.”
16Payilatalu kuliṉangi, “Tjinguru Tjuwuku mayutju tjuṯaya yunyparriku, ngayulu tjuulytji tjuṯanya yalatji watjantjala, ‘Wiipatjarrangkuya katirra puwa!’ Palunyatjanu Payilatalu tjananya watjaṉu, ‘Ngayulu tjananya tjuulytji tjuṯa watjalku wiipatjarrangkuya palunya pungkula iyantjaku.’”
18Yuwankarrangkuya Payilatanya mirrarra watjaṉu, “Yiitjunyaya tjana iluntankunytjaku. Parapatjanya puritjina kutjulampa tjana pakaltjingara wantirriyala!”
19Parapatjalungarriya yirriṯi kamanta ngurrara tjuṯanya pikangku pungangi. Ngurra palula Parapatjalu wati kutju mirri pungu.
20Mayutju Payilatalu Yiitjunya pakaltjingalkitjangku yaṉangu tjuṯangka piyuku tjapiṉu.
21Tjuṯangaraya yalatji mirrarra watjaṉu, “Watiyangka tjana waralytjunkula iluntankunytjaku.”
22Piyuku tjananya Payilatalu watjaṉu, “Paluru mungutja nyinanyi. Kuya nyaa nguwanpa paluru palyaṉu? Wiya paluru luwulampa kilytjuntanu. Puṯuṉa kuliṉi, wati ngaatjanya wiya tjana iluntankunytjaku. Ngayulu tjuulytji tjuṯangka watjalku, wiipatjarrangku palunya pungkula pakaltjingara iyantjaku.”
23Kutuya mirrarra watjaṉingi, “Yiitjunyaya watiyangka waralytjunkula iluntarra!” Panyapaya tjana kutu mirrarra watjaṉingi, Payilatalu puṯu kuliṉu.
24Yalatji puṯu kulira Payilatalu tjananya watjaṉu tjuulytji tjuṯangka Yiitjunyaya katirra iluntankunytjaku, yaṉangu tjuṯaya yunyparrinytjaku.
25Piyuku tjananya watjaṉu Parapatjanya tjiilangka pakaltjingara iyantjaku, yaṉangu tjuṯa tjananya pukuḻmankukitjangku. Parapatja paluru palyawiya nyinangu Yiitjunya nguwanpa, paluru yaṉangu mirri pungkupayi.
26Palulanguru tjuulytji tjuṯangku Yiitjunya katingu waralytjunkunytjaku. Yiitjulu tjaḻira watiya katiyanangi. Ngururrpa yankulaya tjana nyangu wati yini Tjaamananya, Tjayirininya ngurrara ngalyanutja, ngurra kutjupanguru. Tjaamananya nyakula tjana yalatji watjaṉu, “Kala, nyuntulpi watiya ngaatjanya tjaḻira katiyarra, Yiitjukura!” Yiitjunya yurrunpa yananyingka, Tjaamanalura ngaṉṯiwana watiya katiyanangi.
27Yaṉangu tjuṯangkuya ngaṉṯiwana Yiitjunya wanaranangi, minyma tjuṯangkuṯarraya. Minyma paluru tjana Yiitjuku yularra wanaranangi.
28Minyma tjuṯangka paluru taaṉarringkula watjaṉu, “Minyma Tjarutjalumanya ngurrara tjuṯa. Wiya ngayukutju nyurrangarri yulanytjaku, walytjangkunyurra yulanytjaku, nyurrangarrimpa pipirri tjuṯakuṯarra.
29Ngula yaṉangu tjuṯangku yalatji watjalku, ‘Minyma tjuṯaya yunypa nyinaku, pipirri mantjintjawiya. Minyma kutjupa tjuṯa pipirritjarra tjana yunypawiya nyinaku, pipirri tjuṯa tjanampa kuya tjuṯangku mirri punganyingka.’
30Yuḻṯa palula yaṉangu tjuṯaya puḻi katu ngaranytjakutu yankula puḻi tjayiṯingka ngarala Katutjanya watjalku, ‘Tjuulytji tjuṯangku nganaṉanya rawangku pungkula iluntankutjipingka, nyuntu puḻi ngaatjanya pirrtjitjingala!, puḻi tjuṯangku nganaṉanya paḻira iluntankunytjaku.’”
31Wangka kutjupa tjananya minyma tjuṯangka Yiitjulu watjaṉu, “Ngayunyaṉiya mungutja waralytjunkula iluntanku. Palunya nguwanpa kuya tjuṯangku nyurrangarrimpa walytja tjuṯa iluntankula wiyalku.”
32Tjuulytji tjuṯangkuya katingu Yiitjunya, kuya palyalpayi kutjarraṯarra waralytjunkula iluntankunytjaku.
33Tjana puḻikutu tjananya katingu. Puḻi palunya yaṉangu tjuṯangkuya yini watjalpayi, “Kata tarrkanya.” Puḻi palula Yiitjulaya mantarra yarrara tjunu. Watiya panyapangkaya nyiiḻamilara ngaratjunu, waralyngarala, mirrirrinytjaku. Watiya kutjarra kutjupangka tjana kuya palyalpayi kutjarraṯarra nyiiḻamilara ngaratjunu, waralyngarala mirrirrinytjaku. Yiitjunya ngururrpa pulampa waralyngarangi.
34Yaṉangu tjuṯaku tjanampa yaḻṯururringkula Yiitjulu marrkuṉu, palumpa paapanya, “Paapa. Ngaa tjuṯangkuṉiya waralytjunkula iluntankukitjangku wiyawanangku kuliṉi. Yalatjiya kuya palyaṉi. Kuya tjanampa waṉi!, ngaparrtjingku pungkuwiyangku.” Tjuulytji tjuṯangkuya Yiitjukuṉu mantarra mantjira tjunkula puḻiyirringu, kutjungku mantjira kanyilkitjangku. Yaṉangu tjuṯangkuya ngarala nyanganyingka Tjuwuku mayutju tjuṯangkuya Yiitjunya panypurangangi. Yalatjiya tjana inkarra waṉingu kutjupa tjuṯangka, “Kutjupa tjuṯa tjananya paluru kanalpayi ngangkari tiṉatjarrangku. Paluru ngangkari tiṉatjarra nyinarra, ngalya tjarukatirra kanarrinytjaku. Tjinguru paluru Tjuwu tjuṯakulampa mayutju tiṉa nyinanyi, tjinguru paluru Kurayitjanya, Katutjalu yirriṯi watjara wantirriyaṉutja.”
36Tjuulytji tjuṯangkuṯarraya Yiitjunya panypurangangi. Tjana wayina kuya katirra Yiitjunya yungkukitjangku katuṉu, “Ngaatja wayina kuya tjikila!” Tjana kuliṉingi, “Mayutju tiṉa tjuṯangku wayina palya kutju tjikilpayi. Ngaatja mayutju tiṉawiya waralyngaranyi paluru ngaatjanyalpi wayina kuya tjikintjaku, nganaṉa kuyakuya tjuṯangku tjikilpayi nguwanpa.” Piyukuya yalatji Yiitjunya inkarra watjaṉu,
37“Tjinguru nyuntu Tjuwu tjuṯaku tjanampa mayutju tiṉa nyinarra nyuntu ngalya tjarukatirra kanarrinytjaku.”
38Watiya palula pukutju wangkatjarraya tjunu Yiitjula katu. Wangka yalatjitjarra tjana tjunu, “Ngaatjanya Tjuwu tjuṯaku tjanampa mayutju tiṉa.”
39Kuya palyalpayi kutjungku waralyngarala Yiitjunya panypurangu yalatji, “Nyuntu wiya Kurayitjanya waralyngaranyi. Tjinguru nyuntu Kurayitjanya ngangkaritjarra nyinarra, tjarukatirra kanarrimara. Nyuntu ngalinyaṯarra tjarukatirra kananmara.”
40Kuya palyalpayi kutjupangku waralyngarala palunya marrkuṉu, “Wanti, panypurangkuwiyangku! Ngaatjanya mungutja waralyngaranyi. Ngula nganaṉa ngaraku kuutawutjungka Katutjalunta kuru watjaltjipingka.
41Tjana tjukarurru ngalinya waralytjunkula iluntananyi, ngali kuya palyara luwu kilytjuntanu. Ngaatjanya ngururrpa waralyngaranyi, mungutja, kuya palyantjawiya. Tjana wantimara waralytjunkula iluntankuwiyangku.”
42Kuya palyalpayi paluru, yalatji kutjupanya marrkura Yiitjunya watjaṉu, “Yiitju. Ngula nyuntu mayutju tiṉa nyinarra ngayunya kulira yaṉṯayaṉṯala!”
43Yiitjulu palunya watjaṉu, “Wangka ngaatjanya kulila! Kuwarrili tjungu ngurra palyangka nyinamalpa.”
44Tjiṉṯu kaḻaḻangka manta tjuṯawana mungarringu. Munga ngarala ngarala mungarrtji tjirriyukuluku nguwanpa tjiṉṯurringu. Palulanguru kaliki tiṉa Tjuwuku tjaatji tiṉangka waralyngarapayi alytjuranu katunguru.
46Palulanguru Yiitjulu mirrarra watjaṉu, “Paapa. Kurrunpa ngayunyaṉi mantjira yaṉṯayaṉṯala!” Yalatji watjara mirrirringu.
47Tjuulytji tjuṯaku mayutjungku, Yiitjunya mirri nyakula waralyngaranytjala, paluru Katutjanya waḻkura yalatji watjaṉu, “Yilta, wati ngaatjanya tjukarurru nyinapayi, kuya palyantjawiya.”
48Yiitjuku walytja tjuṯangkuya minyma tjuṯangkuṯarra, waṉma ngarala nyangangi. Minyma paluru tjana manta Kaliliyilanguru tjungu Yiitjulawana yanangi Tjarutjalumalakutu. Yaṉangu tjuṯalingkuya tjungurringu nyakukitja, wati kuya palyalpayi kutjarra, Yiitjunyaṯarra waralyngaranyingka. Yiitjunya rawa waralyngarala mirrirringanyingka, yaṉangu paluru tjana wiḻa kuyarringkula yankula waṉingu, ngurrakutu.
50Wati palya yini Tjutjupanya nyinangu. Tjutjupa paluru tawunu Yaramatjiyanya ngurrara nyinangu. Wati paluru Tjuwuku mayutju tjuṯangka kututja tjungurripayi tawunu Tjarutjalumala. Paluru kuliṉingi, “Mayutju tjuṯangku wiyawanangku watjaṉu Yiitjunya iluntankunytjaku.” Tjutjupa paluru Katutjaku tjukarurru nyinapayi, paluru kulilpayi, “Kuwarri Katutjalu yaṉangu tjuṯa ngulytjura yaṉṯayaṉṯalku.” Tjutjupa paluru Payilatalakutu yankula tjapiṉu, Yiitjunya mirri katirra kuḻpingka ngarritjunkunytjaku. Payilatalu yuwa wangkangu.
53Tjiṉṯu Puratiyi ngarala maa mungarrtjirringu. Tjuwu tjuṯaya waarrkarringkula kuliṉangi, “Nganaṉa kuwarri waarrka palyara wiyalku, Tjarritiyingka waarrkawiyalpi nyinanytjaku.” Tjutjupalungarriya kuliṉingi, “Nganaṉa parrpaṯu Yiitjunya mantjira katirra ngarritjunku. Luwulampa ngaranyi, Tjarritiyingka wiyala mirri katirra ngarritjunkunytjaku.” Tjana yankula Yiitjunya mirri mantjira pulangkitingka tjutura tayimapiṉu, pulangkiti palunya mirri tjutulpayikuṉungka. Tjutura tayimapira tjana katirra ngarritjunu kuḻpingka, yirriṯi tjana tjawara wantingutja, kuḻpi wiimatjanu. Kuḻpi palula wiya mirri kutjupa yurrunpa ngarringi.
55Tjutjupalungarri ngarritjunkunytjala minyma tjuṯangku nyangu. Minyma paluru tjana mungaṯu Yiitjulawana tjungu yankupayi, manta Kaliliyilanguru. Yiitjunyaya ngarritjunkunytjala nyakulaya minyma paluru tjana yanu ngurrakutu, nyiṯi paṉṯi palyantjaku, Yiitjunya nyapalkitjangku. Palulanguru tjiṉṯu Tjarritiyingkaya ngurrangka nyinangi Yiitjulakutu nyiṯi katinytjawiya. Yalatjiya ngurrangka nyinangi, Tjarritiyingka waarrkawiya nyinanytjaku Muutjalu yirriṯi watjaṉutjangka.
