Lukas 4:9-32

⁹Mürin Tefil a emwenala Jesus Jerusalem o aütai won ungen ewe imwenfel. Iwe, a üreni, “Are en Nöün Kot, kopwe aturuketiu me ikei.

¹⁰Pun a mak lon ekewe Toropwe mi Pin, ‘Epwe allük ngeni nöün kewe chon läng pwe repwe tümwünuk.’

¹¹A pwal mak, ‘Repwe pwisuk lepöür, pwe pecheöm esap chepeti fau.’”

¹²Iwe, Jesus a pölüeni, “A mak lon ekewe Toropwe mi Pin, ‘Kosap sotuni ewe Samol om Kot.’”

¹³Iwe, lupwen Tefil a wes me sotuni Jesus ren ekewe sosot meinisin a feila seni lon ekis chök fansoun.

¹⁴Mürin Jesus a liwinsefäliti Kalilea, nge manamanen Ngünmifel a nom ren. Iwe, pworausan a chöfetal lon unusen ewe fanü meinisin.

¹⁵A afalafal lon ekewe imwen felikis o aramas meinisin ra mwareiti i.

¹⁶Mürin Jesus a feila Nasaret, ewe ia a mämäritä me ie. Iwe, lon ewe ränin sapat Jesus a feila lon ewe imwen felikis usun an örüni. Iwe, a ütä pwe epwe aleani ekewe Toropwe mi Pin,

¹⁷nge ra ngeni puken ewe soufos Aisea. Iwe, a sukala ewe puk o a küna ewe ia a mak ie ekei kapas,

¹⁸“Ngünün ewe Samol a nonom woi, pun a afiliei pwe üpwe afalafala ewe Pworausen Manau ngeni ekewe chon mwelele. A tiniei, pwe üpwe aronga ngeni ekewe chon fötek pwe repwe ngasala, ekewe chon chun pwe repwe küna mwer, üpwe pwal angasala chokewe aramas ra ariaföüür.

¹⁹Üpwe pwal arongafeili pwe a war ewe fansoun, lupwen ewe Samol epwe amanaua nöün aramas.”

²⁰Mürin Jesus a öppüngala ewe puk, a aliwini ngeni ewe chon angang o mottiu. Iwe, ekewe aramas meinisin mi nom lon ewe imwen felikis ra afota meser won.

²¹Iwe, a popuetä le kapas ngeniir, “Ikenai ekei kapas oua rongorong me lon ei Toropwe mi Pin ra fen pwönüetä.”

²²Aramas meinisin ra kapas öch usun o mwar ren an kapas mi manaman a apasatä. Ra ais, “Ifa usun, sap i nöün Josef?”

²³Nge a üreniir, “Ewer, üa silei pwe oupwe apasa ngeniei ei mwiitun, ‘Sousafei, kopwe püsin apöchökülok!’ Kopwe föri ikei lon püsin telinimwomw met aia rongorong pwe ka föri me lon Kapernaum.”

²⁴Iwe, a sopwela le kapas ngeniir, “Enlet eman soufos esap wor meninin me lon poputän telinimwan.

²⁵Oupwe aüselingaei: A wor chomong fefin mi mä pwülüer lon Israel lon fansoun Elias, lupwen a wor mailengita lon unusen ewe fanü pokiten esap püng üt lon ükükün ülüngat esop ier.

²⁶Iwe, Kot esap tinala Elias ren eman lein ekewe fefin mi mä pwülüer lon Israel, nge a tinala ren eman fefin mi mä pwülüan lon Sarapat lon ewe fanü Siton.

²⁷A pwal wor chomong aramas mi samaun rupun pwötür lon Israel lon fansoun ewe soufos Elisa. Nge esamwo wor eman a limöch seni rupun pwe Naeman chök ewe re Siria.”

²⁸Iwe, lupwen ekewe aramas meinisin lon ewe imwen felikis ra rongorong ekei kapas, ra fokun song.

²⁹Ra ütä o etekinawu Jesus lükün ewe telinimw, ra etekinatä won ewe chukuchukutä ia ar telinimw a köütä ie, pwe repwe aturätiu me lepokun ewe achau.

³⁰Nge Jesus a fetalelong lein ewe mwichen aramas o feila seniir.

³¹Mürin Jesus a feila Kapernaum, eu telinimw lon Kalilea. Ikenan a afalafala ekewe aramas lon ewe ränin sapat.

³²Iwe, ekewe aramas ra mairü ren an afalafal, pun a afalafal usun eman mi wor an manaman.