LUUKA 4:9-32

⁹Dhali a’di ki sus a’di mo e Pa Urushaliim mo dhali a’di ki kar a’di e ’kup̱an gu’b gi mondheleladhelel mo dhali o a’di gwo mo ki: Waḵki/ /e ta Ya/ ma Arumgimis mo tani biṯi is pini ka ’cesh mo ma ’peni mahan mo,

¹⁰haali/ a’di ’kwarkunu mo ki: A’di midi hash iman’doyu gwom piti mo mmoḵan gwo gom /e mo dhali mmoji /e mo,

¹¹dhali, E me’d buni mo tani uni mini ’de’k /e mo, isi ciki/ ki /e mina sho’k pini diki ṯorosh ap̱o/ wosh mo be.

¹²Dhala Yesus thoḵki a’di gwo mo ki: A’di okunu mo ki: /e mini dhalku/ ki pal Tap̱a Arumgimis pini mo.

¹³Dhali ki tap̱a ma ruma ’cesh ’baarki mompal piti mo tani a’di yaki’d mo ’peni a’di mo ntagi embula ’borga/ mo be.

¹⁴Dhala Yesus doḵki’d mo ka nyaŋ’ko’d ki mom’bi’th gi Shi/in mo e Pany Jaliil mo dhali gwo gom a’di yaki’d ki lala’th mo eya ris bampa/ ’baar mo kun ’kon ki jiŋ ’kam mo be.

¹⁵Dhali a’di ṯorki gwo mo e gu’b gi montul is buni mo dhali a’di karkin ma ris ’kwani ’baar ki ca mo.

¹⁶Dhali a’di p̱u’dki’d mo e Pa Naasira mo e mo jin thip̱kunu a’di mo. Dhali a’di yaki’d mo e gu’b jin tulu is mo, me’d miim piti jin miikina a’di mo, ka cim ma pesu/ mo. Dhali a’di doshki’d ki mis mo dhali deŋ gwo e mo.

¹⁷Dhali a’di c̱ikunu awarka/ gi gwo ma manc̱i gwo ma Arumgimis kadhamo/ jin ta’da Ishaya mo. A’di ḵa’dki’da warka/ mo dhali gam mo jin ’kwarkunu gwo nycine/ mo ki:

¹⁸Shi/in gi Tap̱a a’di diki’da p̱o/ aha/ mo, haali/ a’di ’koshki aha/ is ki monyca mo mmoc̱i gwom ’boro’d mo gom uni gun hatha’ko’d mo. A’di hashki aha/ mo mmobah eya tente/ mo mo jin ’cuḵu uni gwansan kun tana habuus mo, dhali mmoḵa’d uni e mo uni gun tana ja’da/ mo mmomish mo mo, dhali mmodhu uni gwansan ki ’kus mo, uni gun ’cwarkunu mo be,

¹⁹mmobah eya tente/ yil jin kwanyu mo gom Tap̱a mo.

²⁰Dhali a’di mu’thki’da warka/ mo dhali c̱i a’di ka nyaŋ’ko’d mo e a’di jin doshki’d mo mmomii to mo dhali a’di c̱a’bki’da ’cesh mo. Dhali aris e gi ’kwani kun ’kon e gu’b gi montul is mo tani dhoro’thkina p̱o/ a’di mo be.

²¹Dhali a’di ṯelki gwo ’pen mo dhali mmo/o uni gwo mo ki: Shwane/ Gwo ma Arumgimis yan jin ’kwarkunu mo tani a’di thimkunu mo e bwany’cem bum mo mmociḵ mo be.

²²Dhali aris ’kwani ’baar mo o gwo ki ’bore/ gom a’di mo dhali mer mo gom gwo ma ’the kun pikin mo ’peni ’twam piti mo. Dhali uni o gwo mo ki: A’di diki ta Ya/ ma Yuusup̱ mo ’taa?

²³Dhali a’di ki thoḵ uni gwo mo ki: Ka jiŋ gana/ um mini thoḵ aha/ gwo mo ’peni gwoŋ gwar ka ’bi’th/e ki: /e jin tana hakiim mo tani wac̱i is pini mo ma. Gwo jin ciḵa aman mo gom miim pini jin miikina /e mo e Paŋ Kap̱ranahuum mo tani miiyi a’di si’da/ mmahan mo e bampam piniŋ gana/ mo ma.

²⁴Dhali a’di thoḵ uni gwo mo ki: Ka jiŋ gana/ aha/ ona um gwo mo ki: amanc̱i gwo ma Arumgimis kadhamoŋ kamu/ yisa mishu bu’th mo e bampam pitiŋ gana/ mo.

²⁵Dhali hili e gwoŋ gana/ mo tani aha/ ṯora um gwo mo ki up̱ ka ris kun wuna ikaṯẖ ’kokin mo ka ris e ’Kwani ma Israyiil mo ka tee ma Iliyya mo, ki momis dar ga sho’k mo ki yili kwara mo dhali ka ppe ’kup̱i pe’de/ mo dhali adhan ṯe/ p̱u’dki’d mo ap̱o/ mony’ceshi ’baar mo.

²⁶Dhali Iliyya yisa hashkunu mo e jan ṯal ’deŋ kamu/ ’peni uni mo yisa, hili jasi e a’di jin di’d e Pan Sarp̱a mo e Bampa/ gi Pan Saydaa/ mo eya ’bom jin wun ma kaṯẖ mo be.

²⁷Dhali e mun mo tani ’kwani ’kon ka ris kun ’kosha monthus mo e ’Kwani ma Israyiil mo ka tee jin tan ma Aliisha amanc̱i gwo ma Arumgimis kadhamo/ mo dhali jan ’deŋ kamu/ ’peni uni yisa dhelelki’d mo yisa, hili jasa Nimaan gi Pan Suriyya mo be.

²⁸Dhali ki uni ciḵki gwo yansan mo tani aris ’kwani gi gu’b gi montul isi ’baar mo ’tu’dkunu mo ka nyor mo be.

²⁹Dhali uni cuki mis mo dhali kar a’di ’pen ka pije/ mo ’peni ’peŋkuman bampa/ mo dhali sus a’di mo eya liman ’twa/ wosh e mo jin nyaŋkunu ’peŋkuman pam buni mo, ki uni mini ’taki bel a’di ka ’cesh ka luŋgu’b mo be.

³⁰Hili mmoyakina a’di ki yampe mo e bwam uni mo tani a’di yaki’d mo.

³¹Dhali a’di p̱u’dki’d ka luŋgu’b mo e Paŋ Kap̱ranahuum mo e ’peŋkuman pa gi Pany Jaliil mo. Dhali a’di c̱iki uni gwo mo ka cima pesu/ mo be.

³²Dhali uni merkin gom gwony c̱im piti jin c̱ina a’di ki moshirr mo be.