1Tjarritiyingka, Yiitjunya palumpa kutunguḻu tjuṯatjarra kaanawana yanangi. Kaana panyapawana mangarri wiita tjuṯa ngarala wanaṉangi. Palumpa kutunguḻu tjuṯangkuya kaanawanaya yankula wiita yantarinkula ngalkuyinangi, marangku nyupirinkula.
2Paratji tjuṯangkuya palumpa kutunguḻu tjuṯangka watjaṉu, “Nyaakunyurra yantara ngalkuṉi? Luwulampa ngaranyi, wiya Tjarritiyingka wiita yantara ngalkunytjaku. Nganampa luwu yalatji ngaranyi yaṉangungku wiita yantara ngalkula yalatji waarrka palyaṉi. Yalatji waarrkarringkula nganampa luwu kilytjuntananyi.” Muutjaku luwu kulira Tjarritiyingka Tjuwu tjuṯaya kututja waarrkawiya kunpu nyinapayi. Wiita tjukutjuku yantaṉingkaya watjalpayi, “Wanti!, waarrkawiya nyinanytjaku, Tjarritiyi ngaranyingka.”
3Yiitjulu tjananya watjaṉu, “Riitarrimaranyurra, yirriṯi mayutju Tapitalungarriya paḻtjatjirratjarringkula ngalkuṉingi.
4Tapita paluru tjaatji tiṉangka tjarrparra mangarri puriiti tjunkula wantingutja ngalkuṉu. Ngalkura palumpa walytja tjuṯaku tjanampa yungu. Mangarri palunya Katutjaku yungutja, tjawirrilyi, tuḻkuku mayutju tjuṯangku kutju ngalkupayi, luwu tjanampa yalatji ngarangu.”
5Piyuku tjananya Yiitjulu watjaṉu, “Ngayulu yaṉanguku katja mayutju tiṉa nyinanyi yaṉangu tjuṯaku. Ngayulu watjaṉi palyaya ngayuku kutunguḻu tjuṯangku Tjarritiyingka mangarri yantara ngalkuntjaku.”
6Tjarritiyi kutjupangka Yiitjunya yankula Tjuwuku tjaatji kutjupangka tjarrpangu, Tjuwu tjuṯa tjananya nintilkitja. Tjaatji palula wati mara waku parralayitji nyinangi.
7Paratji tjuṯangku, Muutjaku wangka nintilpayi tjuṯangkuṯarra kuliṉingi, “Tjinguru wati ngaatjanya mara palyara Tjarritiyingka, luwulampa kilytjuntanku.” Yiitjunyaya nyangangi.
8Panyapaya kuliṉingitjangka Yiitjunya ninti nyinangi. Yiitjulu watjaṉu mara parralayitjingka yalatjingku, “Pakara ngayula ngalya yankula ngara!” Paluru yilta pakara yankula Yiitjula ngarangi.
9Palulanguru tjananya yaṉangu tjuṯangka Yiitjulu tjapiṉu, “Nyaanyurra kuliṉi? Luwu nganampa nyaa ngaranyi? Tjarritiyingkala tjinguru yaṉangu kutjupa yulykawiyangku nyakula wantinytjaku?, tjinguru nganaṉa aḻṯururringkula kanyintjaku. Tjinguru nganaṉa miiṉṯa kanantjaku?, tjinguru nganaṉa kanginypungkula iluntankunytjaku?”
10Yiitjulu tjananya yaṉangu tjuṯangka parra nyakula, parralayitjingkalpi nyakula watjaṉu, “Mara ngalya katurriwa!” Katurringkula mara palumpa palyarringu.
11Tjarritiyingka palyaṉutjangka paluru tjana Paratji tjuṯa, Muutjaku wangka nintilpayi tjuṯaṯarra pikapikarringkula yankula tjungurringkula Yiitjunya mirri pungkunytjakitjaya wangkangi.
12Palulanguru Yiitjunya puḻikutu yankula kaḻpangu, Katutjalara wangkakitja. Mungangka kutu wangkarra tjiṉṯurringu.
13Tjiṉṯu tjiṉṯurrirra pakara tjananya yaḻṯingu palumpa walytja tjuṯa tjungurrinytjaku. Yiitjulu kutunguḻu tuwalpala ngurrtjara watjaṉu yalatjingku, “Nyurrangarri ngayula ila nyinanytjaku. Ngayulu nyurrangarrinya wantirriyalku ngayuku wangka kutju tjananya tjakultjurinkunytjaku.”
14Tuwalpala paluru tjanaya yini yalatjiya nyinangu, Tjaamananya, Yanturunya, Tjayimitjanya, Tjaananya, Pilipanya, Patjalamanya, Maatjuwunya, Tamatjanya, Tjayimitja kutjupanya, Tjaamana kutjupanya, Tjuutanya, Tjuutatjanya. Tjaamana yurruntitja Yiitjulu yini kutjupa watjaṉu yalatji “Piitanya.” Yanturu palunya Piitaku maḻanypa nyinangu. Tjaamana kutjupa ngaṉṯitja paluru Ruumanya ngurrara tjuṯaku tuunlayiki nyinangu. Tjayimitja kutjupa ngaṉṯitja paluru Yalpiyatjaku katja nyinangu. Tjuutatjanya paluru tjana yini kutjupa watjalpayi, “Yitjikarriyatanya.” Paluru tjananya ngula tjakultjunu Yiitjunyaya witira iluntankunytjaku. Yalatji tjananya ngurrtjara ngaratjunu palumpa kutunguḻu tjuṯa nyinanytjaku.
17Puḻinguru wararrakatirra Yiitjunyangarriya puliinangka ngarangi, palumpa walytja tjuṯa kutjupawana. Puliina palula yaṉangu kutjupa tjuṯalingku, ngalya yankula tjungurringu, palumpa wangka kulilkitja. Kutjupa tjuṯaya tjungurringu paluru tjananya palyantjaku. Kutjupa tjuṯaya tjungurringu paluru tjanampa mamu payira wantirriyantjaku. Yaṉangu palunya tjuṯa ngurra tjuṯanguru yankula ngurra palula tjungurringu, Tjarutjalumanya ngurrara tjuṯa, manta Tjuutiyanya ngurrara tjuṯa, tawunu Taaya anta Tjayitananya ngurrara tjuṯa. Tawunu paluru kutjarra yurungka tjayiṯingka ngaranyi. Yuru yini palunya, “Mititiriniyanya.”
19Yiitjunya ngangkari tiṉatjarra, pikatjarra tjuṯangkuya pampura palyarringangi. Palunyatjanu yaṉangu kutjupa tjuṯaya pikatjarrangku Yiitjunya pampulkitjangku yutjura kanyiṉingi.
20Yiitjulu tjananya palumpa kutunguḻu tjuṯa, yaṉangu tjuṯaṯarra nyakula watjaṉu, “Maralpa tjuṯa nyurranya Katutjalu purinytju kanyinmalpa. Yalatji kulira yunypanyurra nyinanytjaku.
21Paḻtjatjirratja tjuṯa nyurranya Katutjalu yungku. Yalatji kuliranyurra yunypa nyinanytjaku. Kutjupa tjuṯanyurra yulanyi walytja wiyarringanyingka, Katutjalu nyurranya marrkura pukuḻmanku. Yalatji kulira yunypanyurra nyinanytjaku.
22Nyurrangarri ngayuku, yaṉanguku katjaku walytjanyurra nyinanyingka, kutjupa tjuṯa nyurrampa tuunlayiki nyinaku. Paluru tjanalpi nyurrangarrinya kanginypungkula panypurangkuku, ngayuku walytjanyurra nyinanyingka. Panypuranganyingka Katutjalu nyurranya purinymara kanyilku. Yalatji kuliranyurra yunypa nyinanytjaku. Ngula paluru nyurranya palumpa ngurrangka kutu kanyilku. Nyurrangarrinya kuwarri panypurangkunytja nguwanpa, yirriṯi nyinanytja tjuṯangku Katutjaku wangka watjalpayi tjuṯa tjananya panypurangkupayi.
24Yulytja puntutjarranyurra yunypawiya nyinaku. Kuwarrinyurra yulytjatjarra nyinanyi, ngula yulytjawiyalpinyurra nyinarra pika punturrinytjala tjilurutjilururringku.
25Mangarri tiṉatjarranyurra yunypawiya nyinaku. Ngulanyurra aṉmatjirratjarringkula puṯu kulilku. Kutjupa tjuṯanyurra kuwarri yikarriyikarri yunypa nyinanyi. Yunypawiyanyurra nyinarralpi yulamalpa.
26Yaṉangu kutjupa tjuṯangku nyurranya puḻkapunganyingka, wiyanyurra yunyparrinytjaku. Katutjaku kutjunyurra yunyparringkula tjukarurru nyinanytjaku. Yalatji nguwanpa yirriṯi nyinanytja tjuṯangkuya kutjupa tjuṯa puḻkapungkupayi, ngunytjinytju tjuṯa. Paluru tjana ngunytjinytju tjuṯangku wiyawana yalatji watjalpayi, ‘Kulilalanyatju!, Katutjaku wangkalatju nyurrangarrinya tjakultjunanyingka.’”
27Yiitjulu tjananya piyuku watjaṉu, “Ngayuku walytja tjuṯangkuya kulila! Nyurrangarrimpa yunytjuwiya nyinanytja tjuṯaku nyurrangarri yunytju tjanampa nyinanytjaku. Tjukarurru tjanampaya palyala!
28Nyurrangarrinya kuyalpayi tjuṯaku nyurrangarri Katutjanya tjanampa tjapila!, paluru yaṉṯayaṉṯantjaku. Nyurrangarrinya panypurangkupayi tjuṯaku Katutjanya tjanampa tjapila!
29Nyuntu kuya palyantjawiyangka tjinguru yaṉangu kutjupangkunta kantja pungkukunta. Kutjupa tjayiṯi taaṉarrirra ngara!, kantjanta piyuku pungkunytjaku. Yalatjinta pungutjangka nyuntu pungkunytjawiya ngarama! Tjinguru yaṉangu kutjupangku nyuntupa kuuta tjapilwiyangku katinyingka, tjaaṯaṯarrara wanti!, yunytjurrirra katinytjaku. Ngurrilwiyangku wanti!
30Kutjupa tjuṯangkuntaya yinkanytjala, yuwa tjananya! Kutjupangku nyuntupa yulytja mulyaṯangku katinyingka, ngurrilwiyangku wanti!
31Tjingurunyurra yunytjurringanyi, yaṉangu kutjupangkunta tjukarurru palyantjaku. Yalatji yunytjurringkula yaṉangu kutjupaku tjukarurru palyala!”
32“Nyurrangarrimpa walytja tjuṯa nyurrampa yunypa nyinanyi. Walytja palunya tjuṯaku kutjunyurra yunypa nyinanyingka, Katutjanya wiya nyurrampa yunyparringanyi. Yaṉangu ulaataku nyurrangarri yunytju nyinanytjaku. Palunya nguwanpa Katutjaku kulilwiya tjuṯa tjanampa walytja tjuṯaku kutju yunytju nyinanyi.
33Nyurrangarrimpa walytja tjuṯa yunypa nyurrampa nyinanyi. Paluru tjana nyurrampa tjukarurru palyaṉi. Walytja palunya tjuṯaku kutjunyurra tjukarurru palyaṉi. Yalatjinyurra walytja tjuṯaku tjukarurru palyantjala wiya Katutjanya yunyparringanyi. Yalatji nguwanpaya nyinanyi, Katutjaku kulilwiya tjuṯa. Walytja tjuṯaku kutjuya tjukarurru palyaṉi. Nyurrangarri yaṉangu ulaataku tjukarurru palyantjaku.
34Ngaparrtji mantjilkitjangku kutju yunganyingka Katutjanya wiya yunyparringanyi. Yinytjanungku kutu yungkunytjaku, wiya ngaparrtji mantjilkitjangku, kulintjaku. Katutjaku kulilwiya tjuṯa palunya nguwanpa nyinanyi, yinytjanungku yungkupayi wiya, ngalytja tjuṯa.
35Wiya yalatjinyurra nyinanytjaku. Nyurrangarri yunypa tjanampa nyinanytjaku nyurrangarrimpa yunytjuwiya tjuṯaku. Nyurrangarri tjukarurru tjanampa palyala! Nyurrangarri yinytjanungku kutu yungkunytjaku, ngaparrtji mantjilkitjangku kulilwiyangku. Yalatji palyanyurra nyinanyingka, Katutjalu nyurranya ngaparrtjingku puntura yungku. Yalatjinyurra palya nyinarra, mayutju Katutjaku walytja tjuṯanyurra nyinaku. Katutjalu palumpa kulilwiya tjuṯa yaṉṯayaṉṯalpayi, kuya palyalpayi tjuṯaṯarra.
36Yaḻṯurunytjunyurra yaṉangu kutjupaku nyinanytjaku, nyuntupa paapa Katutjanya yaḻṯurunytju nyinanytja nguwanpa.”
37“Wiyanyurra yaṉangu kutjupa yaḻṯuruwiyangku mayutju nguwanpangku watjantjaku. Nyurrangarri yaṉangu kutjupanya mayutju nguwanpangku watjantjala, Katutjalulpi nyurranya ngula kuutawutjungka aḻṯuruwiyangku mayutjungku watjara payira wantirriyalku. Kutjupa tjuṯangku nyurranya kuya palyantjala, ngaparrtjingku tjananya kuya palyantjawiyangku wanti! Kuya palyantjala nyurrangarri kalyparringkula nyinanytjaku. Nyurrangarri tjanampa kalypanytju nyinanyingka, Katutjalu nyurrampa kuya waṉiku. Waṉinytjala, kalypanytjulpinyurra nyinaku Katutjaku.
38Yaṉangu kutjupa tjuṯaku tjanampa nyurrangarri yungama! Yunganyingka Katutjalu nyurranya ngaparrtjingku yinytjanungku yungku, mara palyangku. Tjingurunyurra yalatji kulilku, ‘Pala tjuṯalaka wanti! Nganaṉa wiya tjananya kulintjaku.’ Palulanguru tjanalpi nyurrampa yunytjuwiyarringkula kulilwiyalpi nyinaku.”
39Yara kutjupa tjananya Yiitjulu watjaṉu, “Kuru patingku wiya katipayi wati paanga mara witira, ngaṯingkapula punkaltjipingka.” Yara palunya watjara Yiitjulu yalatji watjaṉu, “Tjaampalangku Katutjaku wangka tjukarurrungku nintilpayi. Tjaampalangku Katutjaku wangka wiyawanangku nintilpayi. Paluru tjana kuru paanga palunya nguwanpa nyinanyi. Paangangku wiya yuti nyanganyi, yalatjiya paluru tjana wiya Katutjaku wangka yuti kulira tjukarurru nyinanyi, tjana kutu kuya palyalpayi. Tjana wiya yaṉangu kutjupa watjantjaku yalatji, ‘Nyuntu kuya palyaṉu, yalatji nyuntu tjukarurru nyinanytjaku, ngayunya nguwanpa.’ Nintilpayingkuṯarra Katutjaku wangka kulira tjukarurru nyinanytjaku.”
40Yiitjulu tjananya yara kutjupa watjaṉu, “Nintilpayiku waarrkana wiya nintilingku nyinanyi. Waarrkana paluru tjukutjuku kutju kulira ninti nyinanyi.” Yara palunya Yiitjulu tjananya kampa kutjupa watjaṉu, palumpa kutunguḻu tjuṯa nintilkitjangku yalatji. Tjana wiyawana nintilpayi tjuṯaku wangka wiya kulintjaku, Yiitjukuṉu wangka kutju kulintjaku.
41Yara kutjupa tjananya watjaṉu Yiitjulu, “Nyuntula kurungka watiya wiima tjarrpanyingka, wati nintingku palurunta yinyu kurutjanu katura tiṉatjarrangku puṯu kulilku yurrkulkitjangku.
42Wiya nyuntu walytja kutjupanya yankula watjantjaku yalatjingku, wiyawana nintilpayi nguwanpangku, ‘Kurungkaṉanta watiya wiima nyanganyi. Wanyuṉaka mantjila!’ Kuru walytjangka watiya tiṉangku yangatjunkula ngarrinytjatjarrangku wiya yalatji nyuntu watjantjaku. Nyuntu ngunytjinytju. Yurrunpangkunu watiya yangatjunkula ngarrinytjatjanu walytjangkunkun yurrkunmara nyuntupa kurungka. Palyalpiranu nyuntulpi nyangamara yaṉangu kutjupangka yurrkulkitjangku.” Yara palunya Yiitjulu kampa kutjupa yalatji tjananya watjaṉu, nintilkitjangku. Tjaampalangku wiyawana nyinarra wiyawana nintilpayi. Palunya tjananya nguwanpangku wiyanyurra yalatji watjantjaku, “Ngayulu nintilingku nyinanyi. Ngayuluṉanta nintilku tjukarurru nyinanytjaku. Nyuntu ngayuku wangka kulintjaku.”
43Yiitjulu tjananya yara kutjupa watjaṉu, “Watiya palya, mangarri palyatjarra ngaranyi. Watiya piḻṯi, mangarri kuyatjarra ngaranyi. Watiya piḻṯingka wiya nganaṉa mangarri palya mantjiṉi.
44Tjinguru watingku yukiri wiima pakaṉutja nyakula puṯu kulilku, ‘Watiya nyaa ngaatjanya?’ Yukiri palunya tiṉarringkula mangarritjarra ngaranytjala paluru nyakula nintingku kulilku, ‘Yuwa, ngaatjanya watiya palya mangarri palyatjarra.’
45Yara palunya watiya palya nguwanpa, wati palyangku tjukarurru kulira yaṉangu kutjupakura tjukarurru palyalpayi. Watiya piḻṯi nguwanpa wati kutjupangku tjaalpangku kulira yaṉangu kutjupa wantirra wiya tjukarurrura palyalpayi. Yuwa, nyurrangarri ngunytjinytjungku kulira ngunytji wangkanyi. Yaṉangu kutjupa tjuṯangku nyurrangarrimpa wangka kulira watjaṉi, ‘Yuwa, wati pala tjuṯangku, ngunytjinytjungku kulira wangkapayi.’ Yaṉangungku walytjangku kulira wangkapayi.”
46Yiitjulu tjananya piyuku watjaṉu, “‘Nyuntu mayutju ngayuku.’ Wiyaṉinyurra yalatji waḻkuntjaku, ngayuku wangka kulilwiyangku wantikitjangku.
47Yaṉangu ngayuku wangka kulira tjukarurru nyinarra waaḻa nintingku palyalpayi ngaa nguwanpa nyinanyi.
48Waaḻa palyalpayi paluru manta tjawara puḻi yutitjara, tjiminta yintira lalypara waaḻa palyalku. Waaḻa palunya puḻingka katu ngaramalpa taayiti kutu. Kapi puntungku waaḻa palunya puṯu tjawatjawara punkatjingalkitjangku, waaḻa palunya puḻingku witira kanyiṉingka. Waaḻa palyalpayingku tjukarurru palyaṉutja nguwanpa, ngayuku walytja tjukarurru kutu nyinaku.
49Yaṉangu kutjupangku ngayuku wangka kulira wantirra waaḻa palyalpayi kuyakuya nguwanpa nyinanyi, ngurrpa. Palyalpayi paluru tjiminta yintira lalypara manta katuwana waaḻa palyalku. Waaḻa palunya talingka katu ngaranyingka, kapi puntungku waaḻa palunya ngaṯingaṯira punkatjingalku. Punkara kilytjukatirra yuḻpurriku. Waaḻa palyalpayi rama nguwanpa, yilta yaṉangu ngayuku wangka kulira wantirra rama nyinaku.”
