San Lucas 4:9-32

⁹Niꞌr bchëꞌ Jesús Jerusalén tuꞌ xöhuiꞌ naꞌ, atiꞌ budxía Lëꞌ cjuꞌu gdauꞌ, len rë Lëꞌ: ―Chquiꞌ nacuꞌ Zxiꞌnëꞌ Dios, busládzuꞌtscaꞌ cuinuꞌ ni

¹⁰le nayúj lu guich laꞌy, rna: Dios gsölëꞌë gbaz laꞌy queëꞌ, láclenëꞌ Liꞌ.

¹¹Lu naꞌquëꞌ luchisëꞌ Liꞌ Cui tsajcheguꞌu guiöj, cugunuꞌ ziꞌ niꞌu.

¹²Bubiꞌë didzaꞌ Jesús, rëꞌ lei: ―Nayúj lu guich laꞌy, rë netuꞌ: “Cutu siꞌ bëꞌu Xanuꞌ Dios.”

¹³Catiꞌ cutu budzöli yetú le siꞌ bëꞌ Jesús tuꞌ xöhuiꞌ naꞌ, buzáꞌ ga zoëꞌ tu chiꞌidauꞌ.

¹⁴Böjëꞌ Jesús luyú Galilea, dë lu nëꞌë yöl‑laꞌ huac queëꞌ Dios Böꞌ Laꞌy. Gzë didzaꞌ ca nac queëꞌ, atiꞌ gulayöni bunách nacuáꞌ yúguꞌtë yödz gdu zbiꞌil.

¹⁵Busëdnëꞌ bunách Jesús gap nac lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ glun Lëꞌ zxön yúguꞌtë bunách niꞌ.

¹⁶Niꞌr budxinëꞌ Jesús yödz Nazaret ga niꞌ gzxönëꞌ. Catiꞌ bdxin dza laꞌy quequëꞌ bönniꞌ judío, ca runczëꞌ Jesús, gyaziëꞌ lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ gzuinëꞌ quië ulabëꞌ tu le nayúj lu guich laꞌy.

¹⁷Guludödëꞌ lu nëꞌë Jesús guich ga naꞌ nayúj didzaꞌ bëꞌë Isaías, bönniꞌ bëꞌë didzaꞌ uláz queëꞌ Dios. Catiꞌ bsaljëꞌ guich naꞌ, bdzölnëꞌ ga nayúj lu guich le rna:

¹⁸Zóalenëꞌ nedaꞌ Böꞌ Laꞌy queëꞌ Xanruꞌ Le nubijëꞌ nedaꞌ quizi queëꞌ Quië quíxjöiꞌdaꞌ bunách yechiꞌ didzaꞌ dxiꞌa. Bsölëꞌë nedaꞌ unaꞌ nup rac ziꞌ ládxiꞌdauꞌgac, Len usyöndaꞌ nup nadzungac, ca gac lulá, Len unaꞌ bunách nachúl laugac, Len usláꞌ bunách zoa nu runi leygac ziꞌ,

¹⁹Len gunaꞌ lban qui dza ruzáꞌ ladxëꞌë quegac bunách Xanruꞌ Dios.

²⁰Niꞌr butubëꞌ guich naꞌ Jesús len buguꞌë lei lu nëꞌë bönniꞌ run chiꞌë yuguꞌ guich laꞌy, atiꞌ gröꞌë. Niꞌr gulanáꞌ Jesús yúguꞌtë nup nudubgac lu yuꞌu naꞌ.

²¹Gzu lahuëꞌ Jesús rëꞌ lequëꞌ: ―Naꞌa dza ni zoaliꞌ lbiꞌiliꞌ, rudxíncz le nayúj lu guich ni.

²²Gulanë́ꞌ dxiꞌa queëꞌ yúguꞌtëꞌ, len gulubannëꞌ ca nac didzaꞌ dxiꞌa ruꞌë, atiꞌ taꞌnë́ꞌ: ―¿Naruꞌ clëg bönniꞌ ni zxiꞌnëꞌ José?

²³Rëꞌ lequëꞌ Jesús, rnëꞌ: ―Nazx huëliꞌ nedaꞌ lë ni taꞌná bunách, le rna: “Liꞌ, bönniꞌ ruún bunách, bun cuinuꞌ.” Lëzcaꞌ cni huëliꞌ nedaꞌ: “Yuguꞌ le byö́nituꞌ benuꞌ Capernaum, ben caꞌ ga ni nac ladzuꞌ.”

²⁴Gnëꞌ caꞌ Jesús: ―Le nactë rëpaꞌ lbiꞌiliꞌ, chquiꞌ zoëꞌ bönniꞌ ruꞌë didzaꞌ uláz queëꞌ Dios, cutu tun lëꞌ ba laꞌn bunách uládz queëꞌ.

²⁵Le nactë rëpaꞌ lbiꞌiliꞌ, gulacuaꞌnu zian ngul uzë́b luyú Israel yuguꞌ dza niꞌ zoëꞌ Elías, bönniꞌ bëꞌë didzaꞌ uláz queëꞌ Dios, catiꞌ niꞌ cutu gul guiöj gdu ca tsonn iz yu xop beoꞌ atiꞌ guc gbin luyú naꞌ,

²⁶san Dios cutu bsölëꞌë Elías naꞌ ga nacuaꞌnu ngul uzë́b nacuaꞌnu luyú Israel, san bsölëꞌë lëꞌ ga naꞌ zoanu ngul uzë́b lu yödz Sarepta, le nabáb yödz Sidón.

²⁷Lëzcaꞌ cni, gulacuáꞌ luyú Israel zian nup teꞌi huëꞌ nudzuꞌ ruzö́d dza niꞌ zoëꞌ Eliseo, bönniꞌ bëꞌë didzaꞌ uláz queëꞌ Dios, san cutu böaquëꞌ nitúëꞌ bönniꞌ nutsëꞌë ladj bunách Israel naꞌ, san böaquëꞌ tuzëꞌ Naamán, bönniꞌ nababëꞌ luyú Siria.

²⁸Catiꞌ gulayönnëꞌ didzaꞌ ni, gulaleynëꞌ yúguꞌtë bönniꞌ nacuꞌë lu yuꞌu ga naꞌ tuꞌdubëꞌ tuꞌsëdëꞌ queëꞌ Dios.

²⁹Niꞌr gulayasëꞌ len gulubijëꞌ Jesús niꞌl raꞌ yödz. Gulachë́ꞌë Lëꞌ ga nac lëꞌi guiꞌa guiöj ga naꞌ dë ladzquëꞌ quië lusládzuꞌë Lëꞌ ga nac lëꞌi guiꞌa guiöj naꞌ.

³⁰Niꞌr gdödëꞌ Jesús gatsj lahuiꞌl ga naꞌ nacuꞌë, zhuöjtëꞌ.

³¹Niꞌr gyijëꞌ Jesús yödz Capernaum luyú Galilea, atiꞌ niꞌ busëdnëꞌ bunách yuguꞌ dza laꞌy quequëꞌ bönniꞌ judío.

³²Gulubannëꞌ ca nac le rusëdnëꞌ lequëꞌ Jesús, le bëꞌë didzaꞌ ca tu bönniꞌ dë lu nëꞌë.