Luke 4:9-32

⁹Ale Tiapolo mo lavi Iesu mo taua aulu na pusa Temple, ale mo verea isana mara, “Vara engko Natun God, o kue!

¹⁰matan Retiulia mo verea vara, ‘God i pa retileu isana nona angelo vara la pa lo kilau mamahuniho,

¹¹ale la pa tauriho na limara matan vara o sopo vujahi na palom hin te vatu.’”

¹²Iesu mo r̃aramia mara, “Retiulia mo verea vara, ‘O pa sopo vaihite Moli nom God!’”

¹³Ale na rani Tiapolo mo isoiso na nona vaihite isan Iesu, mo malue mo vano, pani mo lo kilau matan te masapa r̃uhu tinapua.

¹⁴Iesu mo mele vano Galilee na suihan Tanume Tapu, ale sorasorahina mo r̃alihi jara atu.

¹⁵Mo vujangi na tamlohi na nora ima lotu, ale tamlohi tari la hasohasoa.

¹⁶Ale Iesu mo pala Nazareth, jara atu sei mo ulua ea. Ale sohena mo lo vaia tarea mo vano na nora ima lotu na Sabbath, ale mo turu na naho tamlohi mata i evi na Retiulia,

¹⁷ale la silea hin viriviri pepa atu sei Isaiah mo lo ulia, mo vuhesia ale mo vano hin jara atu sei mo opoia vara i evia, ale mo verea mara,

¹⁸“Tanumen Moli mo lo toho hiniau matan enia mo vir̃oniau vara a vereuli na Retir̃uhu isana tilavono. Mo r̃uleau vara a vere na materi isan la haratu la lo taurilatira, ale vara a vai na tamlohi matavuso la kilau, ale vara a teri la haratu la lo toho na ruhuruhu tamlohi sasati,

¹⁹ale vara a vereulia vara nake enia pongi r̃omr̃uhu non Moli.”

²⁰Ale Iesu mo mele viriviri pepa atu, mo silea isan tamlohi atu mo lo silea isana, ale mo sakele. Tamlohi tari na lolon ima lotu atu matara la lo toho hinia,

²¹ale mo tapulo verea isara mara, “Nahapani natu Retitapu nike mo pa masese na peromim.”

²²Ale tamlohi tari la hasohasoa, la mar̃urahi na retir̃uhu mo lo verera, ale la verea lara, “Avei, tamlohi nike enia natun Joseph teni!”

²³Ale Iesu mo verea isara mara, “Na levosahi mamahunia vara ha pa vereau hin titileu sei mo verea vara, ‘Doctor, o hase vai mamahuniho!’ Ha pa verea vara, ‘Sava hina mar̃urahi kama rongoa vara ko lo vaia Capernaum, o vaia nike na jaram sohena!’”

²⁴Ale mo verea isara mara, “Varar̃uhu na verea isamim, vara mo sopo te pr̃ovet hatea i er̃i lavi na r̃omr̃uhu nona tamlohi na vanuana.

²⁵Pani, na varar̃uhu hin haratu na verea vara, ‘Malepu matuvana Israel la lo toho na rani non Elijah, hin rani atu usa mo sopo jovi mata tauni mo tolu vitu mo limarave, ale marua tavera mo voroi Israel,

²⁶ale God mo sopo r̃ule Elijah i vano isan te vonara, pani isana har̃ai malepu matea mo lo toho Zarephath na jara Sidon.

²⁷Ale tamlohi lepros matuvana hin Israel la lo toho na rani non Elisha, God mo sopo vai mamahuni te vonara hatea pani Naaman purongo mara Syria matea.”

²⁸Ale lara la rongo la hinau atu Iesu mo lo verera, tamlohi tari na lolon ima lotu la lolokoru patura.

²⁹La turu la titiua vara i malue hin taon atu, ale la lavia mo vano na tavalu taon matan vara la pa pulahia na pesapesan vutivuti atu sei la voro na nora taon hinia.

³⁰Pani Iesu mo hahau roto na livuhara mo vano.

³¹Ale Iesu mo sahe Capernaum, taon tavera matea Galilee. Mo lo vujangira na Sabbath,

³²ale la haratu la rongoa la mar̃urahi tavera na nona vujangi, matan nona reti mo suiha.