ሉቃሴ 4:9-32

⁹ዬካፓ ፃላሄ ሃሣ ዬሱሴ ዔኪ ዬሩሳላሜ ዴንዳዖ ጌኤዦ ማኣሮኮ ሙስኩላ'' ዔቂሲ፦ «ኔኤኒ ፆኦሲ ናይ ማዔቶ ሂንዳ ሃይካፓ ሊካ ኮኦሚ ኬዴ''፤

¹⁰ዓይጎሮ ጌዔቶ ‹ኔና ዔያታ ካፓንዳጉዲ ፆኦሲ ኪኢታንቾ ዓይሣንዳኔ፤

¹¹ቶካ'' ኔኤኮ ሹጮይዳ ዹቂንቱዋጉዲ ዔያታ ፔ ኩጮና ኔና ዓርቃንዳኔ› ጌይንቲ ፃኣፒንቴኔ» ጌዔኔ።

¹²ዬሱሴ ማሃዖ፦ « ‹ፆኦሲ፥ ኔ ጎዳሢ ዎይታቴያ ዛጋኒ ጌሺሺሪፖ› ጌይንቲ ፃኣፒንቴኔ» ጌዔኔ።

¹³ፃላሄ ዬሱሴ ሚርጌ ጎይሢና ዛጋኒ ጌሼሢኮ ጊንፃፓ ዻካ'' ዎዴሮ ሓሺ'' ዒዛ ዴንዴኔ።

¹⁴ዬሱሴ ዓያና ጌኤሺ ዎልቄ ዔኪ ጌሊላ ባንሢ ማዔኔ፤ ዒዛኮ ሱ'ንፃኣ ዓጮ'' ቢያይዳ ዋይዚንቴኔ።

¹⁵ዓይሁዶ ዓሳ ቡካ ቤዞይዳ ቤዞይዳ ዔርዛኣና ቢያሢ ዒዛኮ ዔርዚፆሮ ዒዛ ጋላቴኔ።

¹⁶ዬካፓ ዬሱሴ ዒ ዲጬ ዓጮ''፥ ናዚሬቴ ዴንዳዖ ዒዚ ቤርታ ማዻ ጎይፆ ዓይሁዶ ዓሶኮ ሃውሾ ኬሎ''ና ዔያቶኮ ቡኪንቶ ቤዞ ጌሊ ናባባኒ ዔቃዛ፥

¹⁷ፆኦሲ ማሊፆ ኬኤዛ ዒሲያሴ ማፃኣፓ ዒዛም ዒንጊንቴም፥ ማፃኣፖ ዒ ቡሌ'' ዎዶ''ና ሂዚ ጌዒ ፃኣፒንቴ ቤሲ ዴንቄኔ፦

¹⁸«ፆኦሲኮ ዓያና'' ታኣም ዒንጊንቴኔ፤ ዬይ ያዺ ማዔሢ ማንቆ ዓሶም ኮሺ ሃይሴ ቱኡቴዞንሢም ቡሊ''ንቲሢ ሃይሴ ዓኣፖ ባይቄዞንሢም ዛጊሢ ሃይሴ ታ ኬኤዛንዳጉዲና ሄ'ርቂንቲ ዴማ'' ዎርቃዞንሢ ዓይላ''ታፓ ታ ኬሳ''ንዳጉዲ፤ ቢታንቶ ታኣም ዒንጋኒኬ።

¹⁹ዬያጉዲ ሓሣ ጎዳ ፔ ዴሮ'' ዻቂሻንዳ ዎዳ'' ሃማታሢ ታ ኬኤዛንዳጉዲ ታና ዳኬኔ።»

²⁰ዬሱሴ ማፃኣፔሎ ጳንጪ ቤርታ ዔቄ ዓሢም ዒንጋዖ ዴዓዛ ዓይሁዶ ዓሶኮ ቡኪንቶ ቤዛ ዓኣ ዓሳ ጊዥ ጌይ ዒዛ ዛጊሢ ዓርቄኔ፤

²¹ዒዚያ፦ «ሓይ ሓሢ ናባቢንታንቴ ዒንሢ ዋይዜ ማፃኣፖ ቃኣላ'' ሓኖ'' ኩሜኔ!» ዔያቶም ጌዔኔ።

²²ቢያሢ ዒዛ ኮሺ ማሂ ጌስታኔ፤ ዒ ኬኤዛ ኮዦ ቃኣሎ''ናኣ ዲቃቲ ሄርሻዖ፦ «ሓይ ዮሴፔ ናዓሢቱዋዓዳ?» ጌዔኔ።

²³ዬሱሴ ዔያቶም ማሃዖ፦ « ‹ሓይ ኔ ዼኤሾ ዔራሢ ሂንዳ ኔና ዻቂሼ› ጌይንታ ኮኦኪንሦ ታጊዳ ዒንሢ ኬኤዛንዳሢ ታ ዔራኔ፤ ዬያጉዲ ‹ቂፒርናሆሜይዳ ኔ ማዼኔ ዓሳ ጋዓንቴ ኑ ዋይዜሢ ቢያ ሃይካ ኔ ዓጮ''ይዳኣ ማዼ› ዒንሢ ታና ጋዓንዳኔ» ጌዔኔ።

²⁴ጎኔ ታ ዒንሢም ጋዓኔ፦ «ፆኦሲ ማሊሢ ኬኤዛ ዓሲ ፔ ዓጮ'' ዓሶ ኮይላ'' ቦንቺንቱዋሴ፤

²⁵«ዋይዙዋቴ! ጎኔ ታ ዒንሢም ኬኤዞም፤ ፆኦሲ ማሊፆ ኬኤዛ ዔኤሊያሴ ዎዶ''ና ሃይሦ ሌዔና ላሆ'' ዓጊኒና ዒርዚ ዋርቂባኣሢሮ ዓጮ'' ቢያይዳ ዼኤፒ ናይዚ ኬስኬኔ፤ ዬኖ ዎዶ''ና ዒስራዔኤሌ ዓጮ''ይዳ ዜኤሪንዶ ማዔ ሚርጌ ላኣሊ ዓኣንቴ፥

²⁶ዔኤሊያሴ ሲዶና ጌይንታ ዓጮ''ይዳ ሴራጲታ ጌይንታ ጉርዴሎይዳ ዓኣ ፔቴ'' ዜኤሪንዴስኬኖ ኮይላ'' ሌሊ ዳኪንቴያፓዓቴም ሜሌ'' ዖ ኮይላ''ኣ ዳኪንቲባኣሴ።

²⁷ዬያጉዲ ሃሣ ፆኦሲ ማሊፆ ኬኤዛ ዔልሳዒ ዎዶ''ና ዑሢዳ ኬስካ ዶርዖና ዓርቂንቴ ዓሲ ዒስራዔኤሌ ዓጮ''ይዳ ሚርጌ ዓኣንቴ ሶኦሪያ ዓጮ'' ዓሢ ኒዒማኔፓ ዓታዛ ዔያቶይዳፓ ፔቴ''ታዖ ዻቂባኣሴ» ጌዔኔ።

²⁸ዓይሁዶ ዓሶኮ ቡኪንቶ ቤዛ ዓኣ ዓሳ ቢያ ዬያ ዋይዛዖ ዻጋዺ፥

²⁹ዬሱሴ ጎቺ ዔኪ ካታማፓ ዙሎ'' ኬሴ''ኔ፤ ዬና ካታሜላ ማዢንቴሢ ዹኬ ዑስካታሢሮ ዒዛ ዔያታ ጎኦቦ'' ሂዒ ዳካኒ ኮዒ ዔኪ ዓኣዼኔ።

³⁰ዒዚ ጋዓንቴ ዔያቶኮ ባኣኪና ቶሊ'' ዴንዴኔ።

³¹ዬካፓ ዬሱሴ ጌሊላ ዓጮ''ይዳ ዓኣ፥ ቂፒርናሆሜ ካታሜሎ ዴንዲ ዒኢካ ዴሮ'' ዓይሁዶ ዓሶኮ ሓውሾ ኬሎ''ና ዔርዛኔ።

³²ዒዚ ቢታንቶና ኬኤዛሢሮ ቢያሢ ዒዛኮ ዔርዚፆና ዲቃቲ ሄርሻኔ።