San Lucas 4:9-32

⁹Dxejcti huinä beṉdxabni lo guedx Jerusalén, huinänini jiaa yejc xques guidoro. Dxejc räjp beṉdxab lojni: ―Palga guliilu najclu Xi'n Dios, gutiäjs lo yuj

¹⁰sa'csi si'c caj loj rexquijtz Dios: Suxhaḻ Dios rexanglni te ga'preni luj,

¹¹guiniaazreni luj didi jiajblu lo guij.

¹²Badzu' Jesús diidx lojni, räjpni: ―Cajza lo rexquijtz Dios: “Na'c faḻlu Dad ni najc Xtioozlu.”

¹³Che baluux beṉdxab rextiidxni, gubicajni lo Jesús sa'csi dini niujn gaan nusoob Jesús xtiidxni. Guläjzni guidzujṉ stee dxej te gusacsíruni Jesús.

¹⁴Dxejc gubi' Jesús lo rexyuj Galilee räjpni yäḻrnibee xten Sprit Dxan. Bire'ch diidx xcuentni guiraa neṉ reguejdx ni tre' nejzga.

¹⁵Ruluiini neṉ reguidobäz luxh guiraa rebejṉ rliä'p xpala'nni.

¹⁶Dxejcti huij Jesús guedx Nazare't cadro gulaani. Che gojl dxej ni rusilajz rexpejṉ Israel, biu'ni neṉ guidobäz sigajc ni rujnpacni, dxejc huisuliini te biḻni

¹⁷reguijtz xten Dios. Badeedreni lojni guijtz ni bacuaa Isaías; cheni baxhalni guijtzga, bidxälni cadro rnii scree:

¹⁸Sprit Dxan xten Dios suganäj narä, sa'csi agule Dios narä te gusule'ä xtidxcoobni lo rebeṉproob. Baxhaḻni narä te gusiacä lastoo renani di lastooreni cuedxi, te gusule'ä yäḻrusḻaa lo rebejṉ ni yu' lo dojḻ, te gusiacä baloj rebeṉ lotiä'p, te gusḻaä́ rebeṉ ni cadejd trabajw,

¹⁹te gusule'ä abiu' ijzsa'c che rulaslajz Dios rebejṉ.

²⁰Dxejc basäu Jesús reguijtzga, badeednini loj bejṉ ni cayacnäj neṉ guidooga, dxejc gurejni. Sa'csi guiraa rebejṉ ni sobga' neṉ guidooga cahuidzu'tzreni lojni,

²¹gusloj guniini, räjpni lojreni: ―Lagajc nadxej guzojb rediidx ni caj lo reguijtzre nez loj guiraatu.

²²Guiraareni sarú guniireni xcuent Jesús, bedxeloduxhzareni redidxsaruduxh ni guniini lojreni. Gunabdiidxreni loj sa'reni, räjpreni: ―¿La et xi'ndi José dade're, ä?

²³Dxejc räjp Jesús lojreni: ―Siniipactu rediidxre loä: “Doctoor, basiajc lagajc luj”; siniizatu loä: “Recos ni biejn diajgnu bejnlu nez guedx Capernaum, lagajc recosga bejn nez ree cadro najc lajdxlu.”

²⁴Dxejc huinuu xtiidxni, räjpni lojreni: ―Rniliä́pac lojtu, nicla tej redade' ni rnii xtidx Dios, di rebeṉ lajdxreni jiu xtiidxni.

²⁵Luxh rniliä lojtu, che gubajṉ Elías lo guedxliuj, guyu' xhidajl gunabiuud guedx Israel che di nisguij niajb choṉ ijz garol, dxejc guyu' yäḻrlianduxh guideb guejdxga.

²⁶Luxh di Dios nuxhaḻ Elías rolijz nicla tej regunabiuud ni guläjz guedx Israel, alga baxhaḻnini lo beṉzijt, rolijz te gunabiuud ni rbäjz Sarepta, gajxh guedx Sidón.

²⁷Sigajcza che gubajṉ Eliseo lo guedxliuj, guyu' xhidajl beṉ racxhuu ni raḻ tiejxhreni guedx Israel, luxh dini nusiajc nicla tejreni, alga basiajcni dade' ni laa Naamán, ni siääd te guedxzijt ni laa Siria.

²⁸Che biejn diajg reni sobga' neṉ guidoo rextidx Jesús, bidxechduxhreni,

²⁹huisuliireni, guläärenini neṉ guejdxga. Dxejc huinärenini yejc dajn cadro tre' guejdxga cadro yu' te balaro, te ro'c rlajzreni nustejbrenini.

³⁰Dxejc Jesús sigaj gudejdni galäiireni, sä'tini ste'ca lajt.

³¹Dxejc huij Jesús guedx Capernaum, te guejdx xten Galilee. Ro'c gusloj cagusule'ni diidx loj rebejṉ che gojl dxej ni rusilajz rexpejṉ Israel.

³²Bidxeloduxhreni xtiidxni sa'csi rusule'ni si'c te beṉnajn, si'c te ni rnibee.