Text copied!
CopyCompare
Luritja Bible - Luukaṉu

Luukaṉu 9

Help us?
Click on verse(s) to share them!
1Yiitjulu tjananya yaḻṯirra tjunguṉu palumpa kutunguḻu tuwalpala. Kutjarra kutjarra tjananya Yiitjulu wantirriyalkitjangku paapala tjapiṉu rapangku tjakultjurinkunytjaku. Paluru tjananya iyalkitjangku watjaṉu, mamu payira wantirriyantjaku, miiṉṯa tjuṯaṯarra palyantjaku, palumpaṉu paawutjarrangku.
2Paluru tjananya watjaṉu, yankula tjananya palyarinkunytjaku, Katutjaku wangka tjananya tjakultjurinkunytjaku yalatji, “Katutjalu yaṉangu tjuṯa ngulytjura yaṉṯayaṉṯaṉi.”
3Kutjarra kutjarra wantirriyalkitjangku tjananya watjaṉu, “Yankukitjangkunyurra wiya mangarri yulytja katinytjaku, wanaṯarra. Yalatji nyurrangarri wiya payiki, maniṯarra katinytjaku. Puutangkaya tjarrparra yarra! Turawutju, tjaaṯa walytjatjarra kutjunyurra yankunytjaku, kutjupa katinytjawiya.”
4Yiitjulu tjananya piyuku watjaṉu, “Nyurrangarri kutjarra yiitji tawunu kutjukutu yankunytjaku. Tawunu palulapula waaḻa kutjungka nyinarra tawunu palunya ngurrara tjuṯa nintinma! Palulanguru tawunu kutjupakutupula yarra!
5Tawunu ngurrara tjuṯa nyupalimpa yunytjuwiyarrinyingka, nyupalimpa wangka tjana kulira wantinyingka, puuta nyupali yarrara manta puutatjanu yunngu ngarringitja kiliinamilara tjarrparrapula wantirra yarra, tawunu kutjupakutu! Nyupali manta puutangka ngarringutjatjanu kiliinamilaṉingka, palunya ngurrara tjuṯangku nyakula kulilku, ‘Nganaṉa palumpa kutjarraku wangka kulira wantinyingka, Katutjalulanya tjinguru pungkuku.’”
6Palulanguruya Yiitjuku kutunguḻu tjuṯa yanangi tawunu tjuṯawana. Kutjarra kutjarrangku tjakulpa palya tjananya nintirinkula miiṉṯa tjuṯa palyarinangi.
7Yaṉangu tjuṯangku nyakupayi Yiitjulu tjananya ngangkari tiṉangku palyaṉingka. Yaṉangu tjaampalangkuya Yiitjunya kuliṉu, “Yilta ngaatja ngangkari tiṉatjarra nyinanyi. Ngaatja Tjaananya mirringuru pakaṉu, ngangkari tiṉatjarra. Tjaananya ngangkari tiṉatjarra nyinangutja nguwanpa.” Yaṉangu tjaampalangkuya Yiitjunya kuliṉu, “Yiitjunya ngunytji yini, paluru yilta yaṉangu palunya yirriṯitja, Yilaatjanya kanarringu. Yilaatjanya yirriṯi ngangkari tiṉatjarra nyinangutja nguwanpa.” Yaṉangu tjaampalangkuya Yiitjunya kuliṉu, “Yaṉangu yirriṯitja, Katutjaku wangka watjalpayi palunya nguwanpa tjinguru kanarringkula nyinanyi. Paluru yiltalanya Katutjaku wangka tjakultjunkupayi.” Mayutju Yirutalu yaṉangu tjuṯangku watjaṉutjangka kulira yalatji kuliṉingi, “Ngayuluṉa tjananya watjaṉu, Tjaananya kata kuntara mirri pungkunytjaku. Paluru wiya kanarringu, yaṉangu wiya mirringuru kanarringkupayi. Yiitjunya wati kutjupa ngangkari tiṉatjarrangku paluru tjananya palyalpayi. Ngayulu yunytjurringanyi Yiitjunya nyakunytjakitja.”
10Yiitjulu kutunguḻu tuwalpala iyaṉutja tawunu tjuṯawana yaṉangu tjuṯa palyara nintirinkula Yiitjulakutuya maḻaku yanu. Yiitjulaya tjakultjunu nintirringkula palyarinangitjangku. Palulanguru Yiitjulu tjananya katingu tawunu Piitjatalakutu, tjaalpaya nyinanytjaku, yaṉangu tjuṯangkamarra.
11Tawunu Piitjatalaya nyinanyingka yaṉangu tjuṯangku kuliraya tjungurringu. Yiitjulu tjananya nyakula yunyparringkula nintiṉingi yalatji, “Katutjalu yaṉangu tjuṯa ngulytjura yaṉṯayaṉṯalku.” Yiitjulu miiṉṯa tjuṯaṯarra tjananya paluru palyalpayi.
12Rawa nintira tjananya mungarrtjirringu. Palulanguruya palumpa kutunguḻu tuwalpalangku Yiitjunyaya marrkuṉu, “Wantirriyala tjananya tawunu tjuṯakutu!, yankulaya ngalkuraya ngarrinytjaku. Ngaangka mangarri wiya ngarrinyi.”
13Yiitjulu tjananya watjaṉu, “Nyurrangarri tjananya yuwa, ngalkunytjaku!” Puṯu kuliraya watjaṉu, “Mangarri puriiti kapuṯu payipala ngarrinyi, kuka piitji kutjarraṯarra. Palyalatju yanku mangarri tjuṯa payimilara mantjilku?, yaṉangu tjuṯalingku ngarala waṉinyingka.”
14Ngurra palula wati payip tjawutjuna ngarangi, minyma anta pipirri tjuṯaṯarra. Yiitjulu tjananya watjaṉu palumpa kutunguḻu tjuṯangka, “Yaṉangu tjuṯawanaya parra yankula watjala!, kapuṯurringkulaya nyinanytjaku tjaalpa yiitji yukiringka, pipitiyipala kutjupa, pipitiyipala kutjupa.”
15Yaṉangu tjuṯaya kuliraya tjungurringkula tjaalpan tjaalpaya nyinangi, pipitiyipala kutjupa, pipitiyipala kutjupa.
16Puriiti payipala kuka panyapaṯarra Yiitjulu mantjira yirra nyakula Katutjanya waḻkuṉu, mangarri panyapa Katutjalu yungutjangka. Waḻkura Yiitjulu kutu mangarri an piitji panyapa kilytjuntankula tjananya palumpa kutunguḻu tjuṯanya yungangi, kutjupa tjuṯaku yungkunytjaku tjanampa.
17Yaṉangu yuwankarrangkuya ngalkura paḻtjarringu. Mangarri tiṉa ngalkura waṉingutja palumpa kutunguḻu tjuṯangku tjarrpatjunangi kaṉilpa tiṉa tjuṯangka, tuwalpalangka. Kaṉilpa panyapa tjuṯangka mangarri punturringkula katu ngarala waṉingi.
18Palulanguru Yiitjunya tjaalpa nyinarra Katutjalara wangkangi. Palumpa kutunguḻu tjuṯa palulakutu yankula yila ngaranyingka, paluru tjananya tjapiṉu yalatjingku, “Yaṉangu tjuṯangkuṉiya ngunytji kuliṉi ngayulu yini Yiitjunya. Kuliṉiya ngayulu mirritjanu nguwanpa nyinanyi. Yini ngananyaṉiya watjaṉi?”
19Watjaṉuya, “Kutjupa tjuṯangkuntaya watjaṉi, nyuntu Tjaananya mirritjanu kanarringkula nyinanyi, kapingka tjarrpatjunkula papatatjimilalpayi. Kutjupa tjuṯangkuntaya watjaṉi, nyuntu mirritjanu kanarringkula Yilaatjanya nyinanyi. Kutjupa tjuṯangkuntaya watjaṉi, nyuntu Katutjaku wangka watjalpayinya nyinanyi, mirritjanu pakara.”
20Yiitjulu tjananya tjapiṉu, “Ngananyaṉinyurra yini watjaṉi?” Piitalu watjaṉu, “Nyuntu Kurayitjanya nyinanyi, Katutjalu yirriṯi watjara wantirriyaṉutja.”

21Palulanguru tjananya Yiitjulu marrkuṉu, “Kutjupangka wiya nyurrangarri wangka palunya tjakultjunkunytjaku, ngayunyatjarra, Katutjalu wantirriyaṉutja.”
22Yiitjulu palumpa kutunguḻu tjuṯangka piyuku watjaṉu, “Yaṉanguku katjaṉiya tjuṯangara yitjipungkula mirrintanku. Muutjaku wangka nintilpayi tjuṯangkuya, tuḻkuku mayutju tiṉa tjuṯangku, tjiḻpi tjuṯangkuṯarra watjantjala tjana ngayunya pikantankula mirrintanku. Mirri ngarrirraṉa munga kutjarra pakara yanku.”
23Yaṉangu tjuṯangka tjanala Yiitjulu watjaṉu yalatji, “Yaṉangu ngayuku walytja nyinanytjakitjangku, yulytjaku, manikuṯarra wiya kulintjaku, ngayunya kutju kulira nyinanytjaku. Kuya tjuṯangkuya panypurangkunytjala paluru ngayuku kutu tjukarurru nyinanytjaku.
24Tjinguru kuya tjuṯangku mirri pungkutjipingka, ngayuku walytjangku nguḻurringkula ngayunya wiyalpi kulilku. Yaṉangu paluru wiya kana kutu nyinaku ngayuku ngurrangka, wiya. Tjinguru kuya tjuṯangku mirri pungkukitjangku watjantjala, ngayuku walytja kutjupangku kulira wiya nguḻurrinytjaku mirriya pungkukitjangku watjantjala. Paluru kana nyinakitjangku kulintjawiya, tjukarurru ngayuku kutu nyinanytjaku. Yalatji tjukarurru nyinanytjala palulanguru kuya tjuṯangku iluntanku. Palulanguru paluru ngayuku ngurrangka kana kutu nyinaku.
25Kulilaya wangka ngaatja! Tjinguru nyurrangarri ngayuku wangka wantirra mani tiṉa, yulytja tiṉa, waaḻa tjuṯaṯarra mantjira kanyilku. Yalatji mantjira wiya nyurrangarri kana kutu nyinaku Katutjaku ngurrangka.
26Kuwarri yaṉangu tjuṯaya wiyawana nyinanyi. Kutuya kuya palyara nyinanyi. Paluru tjana ngayuku walytja tjuṯa tjingapunganyi wiyawana nyinanytjaku. Tjinguru ngayuku walytjangku tjananya kulira ngayunya yunytjuwiyangku wantiku. Palunyatjanu ngula ngayulu yunytjuwiyangku kuutawutjungka yaṉangu palunya wantiku, wiyaṉara patjuri wangkaku. Wiya paluru ngayuku ngurrangka kana nyinaku, wiya. Yilta ngayulu ngurra palulakutu yankula piyuku ngalya yanku yilkari ngurrara tjuṯawana. Katutjanya mantarra tilitjarra nguwanpa ngayulu mantarra tilitjarra nguwanpa tjarukatiku.”
27Yiitjulu tjananya panyapa tjuṯangka piyuku watjaṉu, “Wangka ngaatjanyaya kulila! Katutjalu yaṉangu tjuṯa ngulytjura yaṉṯayaṉṯantjala, tjaampalangkunyurra kana nyinarra walytja palunya tjuṯa nyakula kutju mirrirriku.”
28Palulanguru wiika kutjupangka nyinarra Yiitjulu tjananya Piitanya Tjayimitjanya Tjaananya yaḻṯirra katingu puḻikutu, Katutjanya tjapintjaku.
29Puḻingkaya katu kaḻparra puṯu paṯara paṯaraya yankurringu, Yiitjulu Katutjanya tjapiṉingitjangka. Palulanguru Yiitjunya yaṉangu kutjupa nguwanparringu. Palumpara mantarra tjulkurarringkula tili nguwanpa ngarangi.
30Yiitjulapula Muutjanya anta Yilaatjanya yutitjarringu, yirriṯi nyinangutja kutjarra. Paluru kutjarra mantarra tilitjarra nguwanpa ngarangu. Paluru kutjarrapula Yiitjula wangkangi yalatji, “Yiltaya yaṉangu tjuṯangkunta Tjarutjalumala iluntanku. Palulanguru nyuntu mirringuru kanarriku.”
32Piitanyangarriya yanku ngarringutjatjanu kanarringu. Paluru tjana nyangu Yiitjunya mantarra tjulkurarringkula tili winki ngaranyingka, yirriṯitja paluru kutjarra tjungu ngaranyingka.
33Muutjanya an Yilaatjanya maḻaku yankukitjarringanyingka Piitalu Yiitjunya watjaṉu, “Mayutju. Nyuntu palya nganaṉanya ngaakutu ngalya katingu. Nyuntu yunytjurringanyingka purilatju maṉkurrpa palyalku nyurrangarrimpa, kutju nyuntupanta, kutjupara Muutjaku, kutjupara Yilaatjaku.” Piitalu wangka panyapa ngarruṯatjarrangku parrpaṯu wangkangu. Muutjanya, Yilaatjanya yaṉangu winkipula yutirringutja nyakula paluru nguḻurringu.
34Wangka panyapa Piitanya wangkanyingka, yutuwaringku tjananya tjutuṉu. Paluru tjana nguḻurringu.
35Palulanguru Katutjalu yutuwaringuru watjaṉu, “Ngaatjanya katja ngayuku. Ngayulu palunya paṉakutu wantirriyaṉu. Rawangkunyurra palumpa wangka kulintjaku.”
36Panyapa wangkarra wiyarringutjangka Yiitjunya kutju ngarangi. Palulanguru palumpa kutunguḻu maṉkurrpa wangkawiya nyinangi, wiyaya wangkangi puḻingka nyangutjatjanu.
37Mungawinki pakaraya puḻinguru tjarukatirra nyangu tjananya, yaṉangu tjuṯalingku ngalya yananyingka.
38Tjungurrirraya ngaranyingka wati kutjungku ngalya mirrarra Yiitjunya tjapiṉu, “Nintilpayi. Ngayukutju katja kutju mamungku kuyara kanyiṉi. Ngalya yankulatju palyala!
39Mamungku patjantjala paluru mirrapayi. Mirrarra punkara nyunypa yintirra kaṯiṯingkungku patjara yaṉangu parralayitjirrirra ngarripayi, pakantjawiya.

40Nyuntupa kutunguḻu tjuṯangkaṉa tjananya ngayulu puṯu tjapiṉu mamu payira wantirriyantjaku. Puṯuya payira wantirriyaṉu.”
41Yiitjulu tjananya yaṉangu tjuṯangka watjaṉu, “Nyurrangarri ngayuku wangka kulira wantipayi, puṯu kulilpayi tjuṯanyurra nyinanyi. Rawaṉa nyurrangarrinya nintiṉingi. Kuliranyurra ninti nyinamara. Yaalytjingaranyurra pina alytjurarringkula kulilku?” Yiitjulu wati palula watjaṉu, “Uḻa palatja ngalya kati!”
42Uḻa palunya Yiitjulakutuya ngalya katinyingka mamu paluru uḻa palula yunngu nyinarra yaṉangu palumpanguru patjara parralayitjimilaṉingi. Mantakutu punkara ruularringkula tjaanguru nyunypa tjutirra ngarringi. Yiitjulu palula watjaṉu, “Mamu, uḻa ngaatja wantikatirra yarra!” Yalatji Yiitjulu mamu palunya payira wantirriyara uḻa palunya palyaṉu. Palyara mara witira katingu palumpa paapakutu.
43Yaṉangu tjuṯangkuya watjaṉu, “Yiitjunya yilta Katutjakuṉu ngangkari tiṉatjarra nyinanyi.” Yaṉangu tjuṯangku yalatji Yiitjunya puḻkapunganyingka, Yiitjulu tjananya palumpa kutunguḻu tjuṯangka watjaṉu,
44“Wangka ngaatjaya purinytju kulila Wati kutjungkuṉi yaṉanguku katja tjakultjunku tjananya kutjupa tjuṯangkuṉiya witira katinytjaku, iluntankukitjangku.”
45Wangka palunya palumpa kutunguḻu tjuṯangku puṯu kulira yalatji wangkangu, “Ngaatjanya mayutju tiṉalampa, wiya paluru mirrirriku.” Wiyaya Yiitjunya tjapiṉu ninti nyinakitjangku, kuṉṯarringkulaya wantingu. Yalatjiya pina pati nguwanpa nyinangi.
46Palulanguru palumpa kutunguḻu tjuṯangkuyanku wangkarra waṉingi, “Ngananya mayutju tiṉalampa nyinaku?, Yiitjula tjungu?”
47Yalatjiya wangkanyingka Yiitjunya ninti nyinangi. Pipirri yila ngaranytjala ampura katirra tjanala ngaratjunu.
48Pipirri palula Yiitjunya yilarringkula palumpa kutunguḻu tjuṯangka tjananya paluru watjaṉu, “Pipirri ngaa nguwanpa ngayulu tjananya yunyparringkula yaṉṯayaṉṯaṉi. Tjingurunyurra pipirri tjuṯaku yunyparringkula, ngayukuṯarranyurra yunyparriku. Tjingurunyurra ngayuku yunyparringkula ngayuku paapakuṯarranyurra yunyparriku. Paluruṉi mantakutu iyaṉu. Pipirri tjuṯa mayutjuwiya nyinanyi, palunya tjananya nguwanpa nyurrangarri nyinanytjaku mayutju mayutjurrinytjaku wiya. Waarrkana nguwanpa kutju nyurrangarri nyinanytjaku. Yalatjinyurra nyinanyingka yalatji Katutjanyalpi nyurrampa yunypa nyinaku.”
49Tjaanalu Yiitjula watjaṉu, “Nintilpayi. Wati kutjupalatju nyangu mamu payintjala. Paluru watjalpayi yalatji, ‘Ngayuku walytja Yiitju Kurayitjanya ngangkari tiṉatjarra nyinanytjala, ngayulu mamu ngaatjanya payira iyaṉi, yaṉangu ngaatjanya wantirra yankunytjaku.’ Wati palunya mamu payilpayinyalatju marrkuṉu, payira wantirriyalwiyangku wantinytjaku, tjungula parra yankunytjawiyangka.”
50Yiitjulu Tjaananya watjaṉu, “Wati palunya nyurrangarri marrkulwiyangku wantimara. Palya paluru ngayunya yini watjara mamu payira iyalpayi. Yaṉangu kutjupalampa yunypa nyinanytjala, walytja nguwanpalampa nyinanyi.”
51Palulanguru Yiitjulu kuliṉu, “Tayimi yilarringu, Tjarutjalumanya ngurrara tjuṯangkuṉi pungkunytjala, ngayulu Paapalakutu maḻaku yanku. Ngayulu kuwarri Tjarutjalumalakutu tjukarurru yanku.”
52Ruutuwana yankula tjananya paluru wikarru tjuṯa wantirriyaṉu tawunukutu, “Yankulanyurra ngurra mantjira mangarri palula tjunkunytjaku.” Tawunu palula Tjamiriyanya ngurrara tjuṯaya nyinangi.
53Palunya ngurrara tjuṯangkuya Yiitjunya kanginypungu, yalatjiya kuliṉingi, “Yiitjunya tawunu Tjarutjalumalakutu wiya yankunytjaku, Katutjanya waḻkulkitja, paluru ngaangka waḻkuntjaku.”
54Tjamiriyanya ngurrara tjuṯangkuya Yiitjunya kanginypungutjangka, Tjaanalu Tjayimitjalupula kulira Yiitjula tjapiṉu, “Mayutju. Palyala tjapilku Katutjalu tjananya ilkaringurungku warutjarrangku mirrintankunytjaku?”
55Nguṉṯilangarala pulanya payiṉu Yiitjulu, wiya alatji wangkanytjaku.
56Palulanguruya tawunu kutjupakutuya yanu.
57Ruutuwanaya yankula tjungurringu wati kutjupalpi. Wati paluru Yiitjula watjaṉu, “Yunytjurringanyiṉa nyuntulawana yankukitja ngurra tjuṯakutu. Tjungula yanamalpa, wiyaṉanta wantirriyalku.”

58Yiitjulu watjaṉu, “Papa tjuṯa puḻingka nyinapayi. Tjuḻpu tjuṯaya manngungka nyinapayi. Ngayuluṉa yaṉanguku katjangku ngurra wiya kanyiṉi, ngarrikitjangku.”
59Wati kutjupangka Yiitjulu watjaṉu alatji, “Tjunguli yulytjayinkunytjaku.” Paluru Yiitjula watjaṉu, “Mayutju. Wanyu paṯala!, ngayuku paapa tjiḻpi nyinarra mirrirringanyingka, kutjuli tjungu yulytjayinamalpa.”
60Yiitjulu watjaṉu, “Paluru mirrirringanyingka walytja kutjupa tjuṯangkuya palunya yaṉṯayaṉṯara, tjunutjunkunytjaku. Kuwarri ngali Katutjaku wangka tjakultjurinkunytjaku. Nyuntu tjananya yaṉangu tjuṯa tjakultjurinkunytjaku, Katutjalu yaṉangu tjuṯa ngulytjura yaṉṯayaṉṯaṉingka.”
61Palulanguru wati kutjupangku Yiitjula watjaṉu, “Mayutju. Tjunguli yilta yulytjarinamalpa. Wanyu paṯala!, yankulawarriṉaka ngayuku walytja tjuṯa nyawa!”
62Yiitjulu watjaṉu, “Wiya. Nyuntu Katutjaku waarrka kutju kulira palyantjaku. Wiya yaṉangungku Katutjaku waarrka palyalkitjangku wantirra kutjupa kutjupa tjuṯawarri kulira palyantjaku. Yalatji Katutjaku waarrka wantirra wiya palumpa walytja tjuṯangka tjungu nyinaku.”