Lukas 4:9-32

⁹Baka dati didibri tyari Yesus go na Yerusalem, dan a poti En tnapu na a lantyi fu a daki fu a mamakerki fu den Dyu. A taigi En taki: “Efu Yu na a Manpikin fu Gado, trowe Yusrefi go na gron.

¹⁰Bika a skrifi taki: Gado sa seni den engel fu En fu kibri Yu.

¹¹Moro fara: Den sa tyari Yu na tapu den anu, fu Yu no stotu Yu futu na wan ston.”

¹²Ma Yesus piki en taki: “A skrifi owktu taki: Yu no mus tesi Masra yu Gado.”

¹³Di didibri kba tesi Yesus, a gwe fu luru wan tra okasi.

¹⁴Di Yesus drai go baka na Galilea, A ben furu nanga a krakti fu a Yeye. Ini a heri kontren drape den sma ben e taki fu En.

¹⁵A ben e gi leri na ini den kerki fu den, èn ala sma ben e gi En bigi nen.

¹⁶Dan Yesus go na Nasaret pe A ben kweki. Soleki fa A ben gwenti fu du tapu a sabadei, A go na a Dyukerki. A opo tnapu fu leisi

¹⁷dan den gi En a buku san a profeiti Yesaya ben skrifi. Di A opo a buku, A leisi a pisi pe skrifi taki:

¹⁸A Yeye fu Masra de na mi tapu, bika A poti mi fu tyari Bun Nyunsu gi den pôtiwan. A seni Mi fu taigi den sma di feyanti poti na strafu, tak' den o lusu. A seni mi fu meki breniman si baka, fu puru sma na ini katibo,

¹⁹èn fu taki tak' a ten doro fu Masra sori En bunfasi.

²⁰Dan Yesus tapu a buku, A gi en na a man di e wroko ini a Dyukerki, dan A go sidon. Ala den sma ini a kerki ben e luku En.

²¹Dan Yesus taigi den taki: “Tide a pisi disi fu a Santa Buku san un yere, kon tru.”

²²Ala den sma ben lobi fa A taki, èn den ben ferwondru fa A ben taki so moi. Dan den taki: “Tan, a no a boi fu Yosef?”

²³Yesus piki den taki: “Mi sabi tak' un o koti a odo gi Mi taki: ‘Datra, dresi yusrefi! Un yere san Yu du ini Kafarnaum. We, du den srefi sani dyaso ini Yu eigi foto.’

²⁴Fu tru Mi e taigi un taki: Den sma fu wan foto no e teki san den eigi profeiti e taki.

²⁵A sani san Mi e taigi unu now tru. Ini a ten fu Elia dri nanga afu yari langa, alen no ben fadon èn wan bigi angriten ben de ini a heri kondre. A pisten dati furu uma di masra dede kba ben de ini Israel.

²⁶Ma Gado no seni Elia go na no wan fu den. A seni en go na a foto Sarepta ini a birti fu Sidon. Drape a ben mus go na wan frow di masra dede kba.

²⁷Sosrefi ini a ten di a profeiti Elisa ben e libi, furu gwasiman ben de ini Israel. Ma Elisa no ben dresi no wan fu den, boiti Naaman, a man fu Siriakondre.”

²⁸Di den sma ini a kerki yere san Yesus taki, den ati bron srefsrefi.

²⁹Ne den opo, dan den teki Yesus pusu puru ini a foto. Den pusu En go te na a lantyi fu a bergi tapu san a foto fu den ben bow, fu fringi En go na gron.

³⁰Ma Yesus waka psa na den mindri, dan A gwe.

³¹Dan Yesus go na Kafarnaum, wan foto ini Galilea. Tapu a sabadei A ben e gi den sma leri.

³²Den sma ben ferwondru fu a fasi fa A ben e gi leri, bika A ben taki leki a sma di kon nanga a leri.