Lucas 4:9-32

⁹Tekꞌuchiriꞌ, ritzel xukꞌam bꞌi ri Jesús chupa ri tinamit Jerusalem kꞌa chikaj che ruwi ri Rocho Dios y jewaꞌ xubꞌiꞌij che: —We qatzij at Ukꞌajol ri Dios, chakꞌaqa bꞌi awibꞌ kꞌa chuꞌlew

¹⁰yey na jinta kꞌo kakꞌulumaj, ma jewaꞌ tzꞌibꞌital kan chupa Rutzij Upixabꞌ ri Dios: Ri Dios kebꞌutaq lo ru ángeles awukꞌ chaꞌ katkichajij.

¹¹Katkichap kꞌu rukꞌ ri kiqꞌabꞌ chaꞌ na kaꞌchiqa ta rawaqan che juna abꞌaj —xchaꞌ.

¹²Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Makꞌam upa ri Dios Qajawxel —xchaꞌ.

¹³Echiriꞌ ritzel winaq na xuriq ta chik suꞌanik kukꞌam upa ri Jesús, xel chiriꞌ y xroyeꞌej na kꞌu riꞌ jampalaꞌ kukꞌam tanchi upa.

¹⁴Ekꞌuchiriꞌ, ri Jesús xeꞌek tanchi Galilea y lik kꞌo ruchuqꞌabꞌ ri Ruxlabꞌixel ri Dios rukꞌ. Y xeꞌek utzijoxik puwi Rire pa taq tinamit y pa taq raldeas re Galilea.

¹⁵Kakꞌutun kꞌu pa taq sinagogas y konoje ri ketaw re lik kakiyak uqꞌij.

¹⁶Xopon kꞌu ri Jesús chupa ri tinamit Nazaret pa xkꞌiy wi. Y chupa ri qꞌij re uxlanibꞌal xok chupa ri sinagoga jelaꞌ pachaꞌ xex kuꞌan wi. Xtakꞌiꞌ kꞌu riꞌ chaꞌ karajilaj Rutzij Upixabꞌ ri Dios.

¹⁷Y xyaꞌ che Rire ri jubꞌotaj wuj re ri qꞌalajisanel Isaías. Y echiriꞌ xujaq upa, xuriq pa kubꞌiꞌij wi:

¹⁸Ri Ruxlabꞌixel ri Dios Qajawxel kꞌo panuwiꞌ, ma inuchaꞌom loq chaꞌ koꞌlnuyaꞌa ri Utzilaj Tzij chike ri nibꞌaꞌibꞌ. Inutaqom loq chaꞌ kambꞌochiꞌij kikꞌuꞌx ri lik e kꞌo pa bꞌis, koꞌlnutzijoj kelebꞌal lo ke ri e kꞌo chi presoyil, kebꞌenutzuꞌnisaj ri e potzꞌ, kebꞌenuwesaj lo pa kꞌax ri lik kitijom kꞌaxkꞌolil,

¹⁹y koꞌlnutzijoj ruqꞌijol ri kꞌutubꞌal re ri rutzil ukꞌuꞌx ri Dios Qajawxel.

²⁰Ekꞌuchiriꞌ xukꞌis rajilaxik Rutzij Upixabꞌ ri Dios, xubꞌoto y xuya tanchi che ri aj chak re ri sinagoga, y xtzꞌuyiꞌ chikiwach ri e kꞌo chiriꞌ. Y konoje lik kakitzutzaꞌ pan uwach.

²¹Ekꞌuchiriꞌ, xubꞌiꞌij chike: «Waꞌ wa xinwajilaj che Ruchꞌaꞌtem ri Dios, waqꞌij xujeq bꞌi rilik chiwach alaq» xchaꞌ.

²²Konoje ri xetaw re, kakiyak uqꞌij y lik kaminaq kanimaꞌ che ri chomilaj uchꞌaꞌtem, jewaꞌ kakibꞌiꞌij: «¿Na e ta nebꞌa ukꞌajol ri José waꞌ?» kechaꞌ.

²³Y ri Jesús xubꞌiꞌij chike: «Laj ne kabꞌiꞌij alaq chwe: “Kunanel, chakunaj awibꞌ chawibꞌil awibꞌ. Chaꞌana kꞌu riꞌ chupa wa tinamit taq ri kꞌutubꞌal re ruchuqꞌabꞌ ri Dios jelaꞌ pachaꞌ ri qatom xaꞌan chilaꞌ Capernaúm” kacha alaq chwe.»

²⁴Y xubꞌiꞌij tanchi waꞌ: «Paqatzij wi kambꞌiꞌij che alaq: Na jinta juna qꞌalajisanel kakꞌul chi utz chupa rutinamit.

²⁵Paqatzij wi kambꞌiꞌij che alaq: Rojertan lik e kꞌi rixoqibꞌ e malkaꞌnibꞌ e kꞌo chupa ri tinamit Israel chwach ri qꞌalajisanel Elías echiriꞌ na xuꞌan ta jabꞌ oxibꞌ junabꞌ rukꞌ nikꞌaj y xpe kꞌu ri jun unimal numik chupa ronoje wa tinamit.

²⁶Na rukꞌ ta kꞌu riꞌ, ri Dios na xutaq tubꞌi ri Elías rukꞌ junoq chike wa malkaꞌnibꞌ aj Israel; ma e xutaq bꞌi rukꞌ jun ixoq malkaꞌn aj Sarepta, jun tinamit kꞌo chunaqaj ri tinamit Sidón.

²⁷Yey ojertan lik e kꞌi ri kꞌo ri yabꞌil lepra chike echiriꞌ ri qꞌalajisanel Eliseo kꞌo chupa ri tinamit Israel. Na rukꞌ ta kꞌu riꞌ, na jinta junoq chike xkunutajik, ma xew xkunutaj ri Naamán, ri jun aj Siria» xchaꞌ.

²⁸Echiriꞌ xkita waꞌ, konoje ri e kꞌo chupa ri sinagoga lik xpe koyowal.

²⁹Xeyaktaj kꞌut y xkesaj lo ri Jesús pa ri tinamit y xkikꞌam bꞌi kꞌa chutzaꞌm jun nimalaj juyubꞌ chaꞌ kakikꞌaq bꞌi pa siwan.

³⁰Noꞌj ri Jesús xa xikꞌow chikixoꞌl y xeꞌek.

³¹Ri Jesús xopon chupa ri tinamit Capernaúm re Galilea y xujeq kakꞌutun chikiwach ri winaq chupa taq ri qꞌij re uxlanibꞌal.

³²Y konoje lik kakam kanimaꞌ che, ma ruma rukꞌutunik kaqꞌalajinik lik kꞌo uwach.