Luku 4:9-32

⁹Anante Sata'a Jisasina avareno Jerusale kumate vuno, ra mono nomofo amumpare ome nenteno, amanage huno asami'ne, Kagra Anumzamofo mofavre mani'nenunka fenamufi takauro,

¹⁰na'ankure avontafepi anage huno krente'ne, Anumzamo'a ankero vahe'a huzmantenke'za kva hugantesageno,

¹¹Havemo kagia taga hu'zanku zamazampi kavresga hanageno, kagia taga osugahie huno krente'ne, (Sam-Zga 91:11-12)

¹²Jisasi ana kemofo nona'a anage huno asami'ne, avontafepi anage huno krente'ne, Ranka'a anumzamofona rehenka onko huno hu'ne. (Diu-Kas 6:16)

¹³Sata'ma mika revatga huvagareteno, henka'a kankamuma fore hanigeno revatga hanigu atreno vu'ne.

¹⁴Jisasi'a ete Galili mopare Avamumofo hihamufi vigeno, agenke'amo ana mopafina vuno eno hu'ne.

¹⁵Ana nehuno Jisasi'a, agafa huno osi mono no zimifi mono kea nehige'za, agi erisga hu'naze.

¹⁶Hagi Jisasi'a nenama hu'nea kumate Nazarete eno, nehiaza huno mni fruhu knazupa (sabat) osi mono nompi marerino avontafe hamprinaku o'netige'za,

¹⁷Kasnampa ne' Aisaia avontafe eri'za eme nemigeno, eri vakanereno, hakreno amanage huno kre'nea ke hampri'ne,

¹⁸Ramofo avamumo nagrane emanine. Na'ankure agra huhampri nanteno, zamunte omane vahepi knare musenkea huama huo huno hunante'ne. Agra hunanteno huama hugeno, kinafi maninesaza vahemo'za katufe'za nevnageno, zamu suhu vahemo'za negesageno, vahemo'za zmazeri haviza nehanaza nagamoza fru hu'za nemnisagena,

¹⁹Ramo tamaza huno tmazeri so'ema hiazankura huama hu'na tmasaminaku e'noe. (Aisa 61:1-2)

²⁰Anage huno hampriteno, ana avontafe regazarino, avontafemofo kva ne' nemino manige'za, ana osi mono nompi mani'namo'za zamua Agri kete'za mani'naze.

²¹Ana huteno agafa huno zamasmi'ne, Amama hamprugetma antahiza kemofo avufa'a meni fore nehie.

²²Hagi maka vahe'mo'za knare kema hia kegura antri nehu'za, mago'ene ontahige antahige nehu'za, ama Josefe mofavre omaninefi? hu'za nehazageno,

²³Jisasi'a anage huno zmasami'ne, tamage hutma huvame kea hunantegahaze. Tusa ne'moka kagra kavufa kazeri knare huo! nehuno anage hu'ne, Kapeniam kumate kaguvazama erifore hu'nanketa antahi'nonanki, e'i anazana kumaka'are huo hutma hugahaze.

²⁴Tamage hu'na neramasamue. Magore huno kasnampa vahe'mofona kuma'afinti vahe'mo'za ke'a antahi omigahaze.

²⁵Hianagi tamage hu'na neramasamue, Israeli vahepina rama'a kento'ane Ilaija knafina mani'nageno, monafinti 3'a kafugi 6si'a ikana kora origeno, tusi aga ateza maka mopafina fore hu'ne.

²⁶Ana hu'neanagi Ilaijana huntegeno Israeli mni'naza kento a'nerera ovu'neanki, rurega kento ate huntegeno Sarafat kumate Saidoni mopare vu'ne. (Jem 5:17-18, 1 Kin 17:1-16)

²⁷Hanki Israeli mopafina, rama'a fugo namuma zmare'nea vahera kasnampa ne' Elisa knafina mani'nazanagi, mago'mofone huno ana vahepina fugo namumo'a vgareonte'neanki, Siria ne' Nemaninke ana fugo namumo'a vgarentene. (2 Kin 5:1-14)

²⁸Anage hige'za, osi mono nompi mani'naza maka vahe'mo'za nentahiza tusiza hu'za zmarimpa ahente'naze.

²⁹Zamagra oti'za Jisasina ra kumateti retufe'za, kuma zmimofo zava ankinare aretufe atrenaku vu'naze.

³⁰Hianagi Jisasi'a amu'no zimifinti nezamatreno vu'ne.

³¹Ana huteno Kapaniamu rankumate Galili kaziga uramino umani'neno, mni fruhu knarera (sabat) mono kea rempi huzami'ne.

³²Zamagra rempima huzamia kegu zmagogogu hu'naze. Na'ankure hanave'a me'nea vahe'mo'ma nehiaza huno rempi huzamine.