Luuka 4:9-32

⁹Kasen Ibiliisa naɓi mo Urusaliima, darni mo dow leŋŋe-leŋŋe Suudu Dewal Mawndu, wii mo: —So a Ɓii Laamɗo, suur njippo-ɗaa e leydi,

¹⁰sabi ana winndii: «O yamiran malaa'ika'en makko ndeene.»

¹¹Ana winndii kasen: «Ɓe njaɓɓete, pati koyngal maa gaaɲoo e haayre.»

¹²Iisaa jaabii mo, wii: —Ana winndii: «Pati ittu koro Laamɗo, Joomiraaɗo maa.»

¹³Nde Ibiliisa ronkunoo seytaade mo ndee, seli e makko seeɗa.

¹⁴Iisaa wirfitii leydi Galili, semmbe Ruuhu ana e mum, kabaaru makko saakii e leydi ndii fuu.

¹⁵Omo waajoo ley cuuɗi baajorɗiYahuudiyankooɓe, yimɓe fuu ana teddini mo.

¹⁶O yehi Nasaraatu ɗo o mawni ɗoo, o naati e ley suudu waajordu ɲalaande fowteteende no o woowiri nii. O immii faa o jannga,

¹⁷o hokkaa dewtere annabi Esaaya, o udditi nde, o forri e nokku binndiraaɗo hono nii:

¹⁸«Ruuhu Joomiraaɗo ana e am, sabi o suɓike kam faa mi anndina misikiina'en Kabaaru Lobbo. O nelii kam faa mi ooynanoo nanngaaɓe yoppiteede mum'en, e wumɓe wumtineede mum'en, e torraaɓe yoppiteede mum'en,

¹⁹faa mi ooynoo hitaande nde Joomiraaɗo hollata moƴƴere mum ndee warii.»

²⁰Caggal ɗum, o uddi dewtere ndee, o totti nde golloowo ley suudu waajordu nduu oo, o jooɗii. Wonnooɓe ton ɓee fuu, puttini mo gite.

²¹O darii omo wiya ɓe: —Ko winndii koo, hannde ɗum tabitii ɗo nan-ɗon ɗum ɗoo.

²²Ɓe fuu eɓe kaala haala makko lobba, kasen duu konngi lobbi jaltuɗi e hunduko makko ɗii ana kaaynoo ɓe. Ɓe ndarii eɓe mbiya: —Wanaa oo woni ɓii Yuusufu oo naa?

²³O wii ɓe: —Miɗo anndi on kaalanan kam ngol banndol: «Cawroowo, sawru hoore maa. Ko min nani a waɗii Kafarnahum koo, waɗu ɗum ngeenndi maa ɗoo duu.»

²⁴O wii kasen: —Miɗo haalana on goonga: annabaajo fay gooto jaɓantaake e ngeenndi mum'en.

²⁵Miɗo haalana on, rewɓe misikiina'en ɓe worɓe mum'en maayi ana keewnoo Israa'iila e jamaanu annabi Iliyaasa, wakkati nde waadere kammu saamaali e leydi ndii duuɓi tati e lebbi jeegom. Nden yolbere mawnde waɗiino e leydi ndii fuu.

²⁶Kaa annabi Iliyaasa nelaaka e fay gooto e maɓɓe, so wanaa e debbo gooto mo gorum maayi, jeyaaɗo Sarepta leydi Sidon.

²⁷Kasen duu, seppaaɓe ana keewnoo Israa'iila e jamaanu annabi Eliisa, kaa fay gooto e maɓɓe sellinaaka, so wanaa Naaman jeyaaɗo e leydi Siriya.

²⁸Nde yimɓe wonɓe e ley suudu waajordu nduu nannoo kaa haala ndee, mettaa sanne,

²⁹immii, ndibbi Iisaa faa caggal ngeenndi, ngaddi ɗum faa sera waamnde haayre ɗo ngeenndi maɓɓe ndii woni ɗoo, faa mbedoo mo ley.

³⁰Kaa o seeki hakkunde maɓɓe, o witti.

³¹Iisaa yehi Kafarnahum ley leydi Galili, omo waajoo yimɓe e ley ɲalaande fowteteende.

³²Ɓe kaaynaa e waaju makko oo, sabi omo waajoroo ɓe baawɗe.