Lukas 4:9-32

⁹I ap kalualang i Ierusalem o kauada i pon kongkong en im en kaudok o indai ong i: Ma komui sapwilim en Kot, kasedi pein komui,

¹⁰Pwe a intingidier: A pan kasilaki sapwilim a tounlang kai komui, pwen apapwali komui.

¹¹O wa komui nan lim ar akan, pwe aluwilu omui der dipikelekel ni takai eu.

¹²Iesus kotin sapeng masani ong i: A lolokido, koe ender kasongesong Kaun om Kot!

¹³Tewil lao kanikiela songesong karos, ap muei sang i ansau kis.

¹⁴Iesus ap kotin pure dong Kaliläa ni roson en Ngen, ap indand sili nan sap karos me mi imp a.

¹⁵A kotin kaukawewe nan ar sinakoke kan, o karos kapinga i.

¹⁶A kotin lel Nasaret, wasa a kotin kakairida ia, ap kotilong song nan sinakoke duen a kin wiada ni ran en sapat o kotida, pwen wadok.

¹⁷Puk en saukop Iesaia ap wisike dong i a lao lim pasang puk o ap diarada wasa o me intingidier:

¹⁸Ngen en Kaun kotikot re i, i me a keie kin ia da, pwen padaki ong me samama kan rongamau. A kadar ia do, pwen kaloki ong me salidi kan, me ren saladokela, o me maskun akan pan kilang wasa, o me patau kan pan maioda,

¹⁹O kaloki saunpar mau en Kaun o.

²⁰A kotin lim pena puk o ap kupure ong me papa men o kotidi. Mas en karos nan sinakoke kangkakil i.

²¹I ari tapiada masani ong irail: Kisin likau wet pwaidar mo ’mail ran wet.

²²Ir karos ap kadede o puriamuiki masan kompok kan, me pwili sang silang i, ap indada: Kaidin i nain Iosep?

²³A ap kotin masani ong irail: Nan melel, komail pan indang ia karaseras wet: Saunwini, sauasa pein uk! Pwe se rongadar duen song kapuriamui, me wiauier nan Kapernaum; ari kom pil wiada dueta wasa et nan sap omui.

²⁴A kotin masani: Melel I indai ong komail, sota saukop amen me konekon nan sap we.

²⁵A melel I indai ong komail, li odi toto mi nan Israel ni muein Elias, ni ansau nanlang matata par silu o saunipong wonu, ni lek lapalap kipadi sap karos;

²⁶A sota amen, me Elias pakadar wong, pwe ren li odi men nan Sarepta nan sap Sidon.

²⁷O me tuketuk kan me toto nan Israel ni muein saukop Elias, a sota amen re ’rail, me kelailadar, pwe Naeman eta men Sirien.

²⁸Karos, me mi nan sinakoke ni ar rongadar mepukat, ap makar kida kaualap,

²⁹Re udar sikonlar i sang kanim o, o kalualang i pon kailan dol o, wasa ar kanim kakaudar ia, pwen kasedi sang ia,

³⁰A i kotin weid nan pung ar, kotila sang irail.

³¹I ari kotilang Kapernaum kanim en Kaliläa, o kotin kawewe ong irail ni ran en sapat akan.

³²Irail ari puriamuiki a padak, pwe a masan me manaman.