1Palulanguru kamanta mayutju tiṉa nyinangi, yini Yukatjatjanya. Mayutju paluru kamanta ngurrara tjuṯangka tjananya watjaṉu, yini yuwankarra tjananya tjunkunytjaku, piipa kamantakuṉungka. Yurrunpa wiyaya yini yuwankarra tjunu kamantaku piipangka. Yini yuwankarraya tjunu, mayutju Kiriniyatjanya nyinanyingka. Mayutju Kiriniyatjanya manta Tjiriyanya ngurrara tjuṯaku tjanampa mayutju nyinangi.
3Yaṉangu yuwankarraya tawunu walytjakutuya yanu, yini tjananya kamanta ngurrara tjuṯangku tjunkunytjaku.
4Tjutjupanya Miirinyapula tawunu Natjaritjalanguru tawunu Pitjiliyamalakutu yanu, yini tjunkunytjaku. Tawunu Natjaritjanya manta Kaliliyila ngarangi. Tawunu Pitjiliyamanya manta Tjuutiyala ngarangi. Tawunu Pitjiliyamanya yaṉangu tjuṯangkuya watjalpayi, “Ngaatjanya ngurra, mayutju Tapitanya nyinangitja.” Tapitaku walytja Tjutjupanya, ngaṉṯitja nyinangi. Tjutjupaku tjangkuṉutja Miirinya waḻinyku nyinangi.
6Tawunu Pitjiliyamalapula walytja tjuṯa tjananya puṯu tjapiṉu waaḻangka yunngu ngarrinytjakitjangku. Yaṉangu kutjupa tjuṯangkuya waaḻangka tjarrparra yangatjunkula ngarrinyingka, paluru kutjarrangkupula puṯu tjapiṉu. Puṯu tjapira, paluru kutjarra waaḻangka tjayiṯingka ngarringi pulukakuṉungka yuntangka. Tawunu palulapula nyinarra Miirinya wiḻa pipirrilpi yutitjarringu. Katja palunya yurruntitja pulangkitingka karrpira pukutjungka ngarritjunu. Pukutju palula, pulukangku mangarri ngalkupayi.
8Tawunu palula waṉma nguwanpa tjiipi tjuṯaya kanyilpayi. Mungangkaya tjungura kanyilpayi, tjiipiku mayutju tjuṯangku.
9Munga palula, Miiriku katja yutitjarringutjangka, Katutjalu wantirriyaṉu tjanampa ilkari ngurrara kutju, tjiipiku mayutju tjuṯakutu. Ilkari ngurrara paluru kutju tjanampa tjanalakutu tjarukatirra yutitjarringu, ngarala tilingku irrnyaṉingi. Palulanguruya nyakulalpi nguḻunguḻurringu.
10Ilkari ngurrara paluru watjaṉu tjananya, “Nguḻurringkuwiyangkuya kulila! Ngayuluṉa ngalyanu, yara palya nyurrangarrila tjakultjunkunytjakitja. Yaṉangu yuwankarrangkuya kulira puntura yunyparriku.
11Yara palya yalatji. Tapitaku tawunungka kuwarri nyurrampa kanalpayinya, pipirri yutitjarringu, mayutju Kurayitjanya. Kurayitja palunya, Katutjalu yirriṯi watjara wantingutja kuwarrilpi yutitjarringu.
12Yankulanyurra nyaku pipirri pulangkitingka karrpintja ngarrinyingka, pulukakuṉu pukutjungka. Nyakulanyurra nintingku kulilku yalatjingku, ‘Panyapa ilkari ngurrangkulanya tjakultjunutja, yilta Kurayitjanya pipirri ngarrinyi.’”
13Palulanguruya ilkari ngurrara kutjupa tjuṯa kutjukuturaya tjungurringu. Tjuṯangkuya Katutjanya waḻkuṉingi yalatjingku,
14“Puḻkapuwalaka!, Katutjanya nganampa mayutju tiṉa kuwarri nyinanyi. Yaṉangu Katutjaku yunyparrinytja tjuṯa palyaya nyinaku yunypa.”
15Ilkari ngurrara tjuṯaya ngaṉṯikutu yilkarikutu maa kaḻpanytjala watjaṉuyanku tjiipiku mayutju tjuṯangku yalatjingku, “Tawunu Pitjiliyamalakutulaka yarra!, panyapa nyakukitja. Katutjalulanya nintiṉu.”
16Pakaraya parrpaṯu yankula ngurrira nyangu, Miirilu Tjutjupalupula, pipirri kanyiṉingitjangka. Yilta pulukakuṉu pukutjungka Yiitjunya yiṯi ngarringi.
17Pipirri palunya nyakulaya Miirila Tjutjupala pulala tjakultjunu, ilkari ngurrarangku watjaṉutjangka.
18Tjakulpa palunya yaṉangu tjuṯangku kulira yalatji kuliṉingi, “Tjinguru pipirri paluru mayutju Kurayitjanya ngarrinyi?”
19Kanya Miirilu tjakulpa palunya yunypangku kulirinangi.
20Tjiipiku mayutju tjuṯangkuya Miirinya wantikatirra yanu, tjiipi tjuṯakutu. Ngururr ngururrpa yankula tuḻku warraraya Katutjanya puḻkapungkuyinangi. Yalatjiya wangkangi, “Yilta ilkari ngurrarangku nganaṉanya tjukarurrungku tjakultjunu.”
21Pipirri uḻa palunya tjiṉṯu tjapanpala ngarringutjangka watiṉu. Watiraya yini watjaṉu, “Yiitjunya.” Yini palunya ilkari ngurrarangku yirriṯi watjaṉu, Miirinya waḻinykuwiya nyinanytjala yurrunpa.
22Muutjaku luwu kulira Tjutjupalu Miirilu Purayitiyi tjikitjipala Yiitjunya ngurrangka kanyiṉingi. Palunyatjanu paluru kutjarra Yiitjunya katingu Tjarutjalumalakutu, tjaatji tiṉakutu. Katirrapula paaḻkara kutjarra yungurapula, tuḻkuku mayutjungku pungkunytjaku. Tuḻku palula Katutjalaya tjapiṉu, Yiitjunya yaṉṯayaṉṯantjaku. Tuḻku panyapakutupula katingu, mayutju Muutjalu yirriṯi watjaṉutjangka. Katutjakuṉu luwu Muutjalu yalatjingku watjaṉu, “Pipirri uḻa yurruntitja nyupali tjaatjikutu katinytjaku, tuḻkuku mayutjungkura Katutjanya tjapintjaku.” Muutjalu piyuku watjaṉu, “Tjuḻpu kutjarra paaḻkara nguwanpa katirra, tuḻkuku mayutjukura yuwa!”
25Tawunu Tjarutjalumala tjiḻpi nyinangi, yini Tjimiyananya. Tjiḻpi paluru Katutjaku walytja tjukarurru nyinangi, Katutjaku kurrunpatjarra. Paluru Katutjaku walytjarringkula kutu paṯara kuliṉingi, “Katutjalu nganampa Yitjurilaku ngaṉṯitja tjuṯaku mayutju Kurayitjanya ngalya wantirriyalku.” Katutjaku kurrunpangku irriṯi tjiḻpi palula nintiṉu yalatjingku, “Katutjalu yirriṯi watjara wantirriyaṉutja, Kurayitjanya nyakula kutju, nyuntun mirrirriku.”
27Katutjaku kurrunpangku nintintjala, tjiḻpi Tjimiyananya yankula tjarrpangu tjaatji tiṉangka, Tjutjupalu an Miirilu pipirri palunya tjaatji tiṉangka yunngu kanyiṉingitjangka.
28Tjimiyanalu ngalya yankula tjarrparra yunypangku yampura kanyiṉingi. Katutjanya puḻkapungangi yalatjingku,
29“Mayutju Katutja. Nyuntu ngayunya panyapa watjaṉu ngayulu Kurayitjanya nyakunytjaku. Kala ngaatjanya Kurayitjanya ngayulu nyanganyi. Nyuntu tayimi ngayuku kuliṉingka, palyaṉa mirrirriku. Ngayulu nyuntupa walytja nyinanyi, yunypalpiṉa mirrirriku. Kurungkuṉa nyanganyilpi ngaatjanya. Nyuntu ngaatjanya yutiṉu nyuntupa walytja tjuṯa nganaṉanya kanantjaku, ngurra kutjupa kutjupa ngurrara tjuṯaṯarra tjananya ngaangku kanantjaku.
32Mungangka yaṉangu tjuṯa tilingka nyakula tjungurringanyi. Palunya nguwanpa ngaatjanya tili nguwanpa nyinaku. Tjuwuwiya tjuṯangku ngaatjanya nyakula tjungurrirra nintirringku, Katutjaku. Ngaaku wangkaya yaṉangu tjuṯangku kulira Katutjaku walytjarringkula Yitjurilaku walytja ngaṉṯitja tjuṯa nyurrangarrinya waḻkulku.”
33Tjimiyanaku wangkapula Tjutjupalu an Miirilu puṯu kuliṉu, “Tjinguru ngaatjanya Kurayitjanya ngarrinyi.”
34Katutjanya pulampa Tjimiyanalu tjapiṉu yaṉṯayaṉṯantjaku. Tjapira Miirilara watjaṉu yalatji, “Pipirri ngaatja Katutjalu nyinatjunu, Yitjurilaku walytja ngaṉṯitja tjuṯa tjananya wangkanytjaku. Yaṉangu kutjupa tjuṯangku kutjuya palumpa wangka kulira Katutjaku walytja tjuṯa nyinaku, kanya kutjupa tjuṯangku palumpa wangka kulira wantirra wiya kana kutu nyinaku. Miiri, nyuntu nyakula tjilurutjilururringkula wiḻa kuyarringku.”
36Palulanguru Katutjaku wangka watjalpayi wulkumanu Yananya nyinangi, Yaatjaku walytja ngaṉṯitja. Paluru Panulaku yuṉṯalpa nyinangi. Yananyapula miiṯararra yiiya tjapanpala nyinarra, miiṯa wiyarringu.
37Palulanguru waḻukuta nyinangi, yiiya tjuṯalingku yiitiyi puupalangara. Tjaatji tiṉangka kutu nyinarra ngarapayi tjiṉṯungka mungangka, kutu Katutjanya waḻkulpayi. Katutjanya tjapira wangkapayi, mangarri ngalkuwiyangku wantirra.
38Tjutjupalu an Miirilu pipirri tjaatji tiṉakutu katinyingka, Yanalu pipirri nyakula Katutjanya waḻkuṉu. Palulanguru yankula tjakultjurinu tjanala Katutjaku walytja tjuṯangka, Kurayitjaku paṯara nyinapayi tjuṯangka, tawunu Tjarutjalumalawana.
39Palulanguru Tjutjupalu an Miirilu tjawirrilyi katirra yungu tjaatjiku mayutjuku, Muutjalu yirriṯi watjaṉutjangka, tjaatji Tjarutjalumangka. Paluru kutjarrangku Yiitjunya katirra ngaṉṯikutuya yanu manta Kaliliyilakutu, tawunu walytjakutu, Natjaritjalakutu.
40Palulanguru nyinarra tiṉarringu. Paluru nintilingku nyinangi. Katutjanyara yunypalingkura nyinangi, waḻkura yaṉṯayaṉṯaṉingi.
41Yiiya kutjupa yiiya kutjupangka Tjutjupanya an Miirinya kutu Tjarutjalumalakutu yankupayi, tuḻku Patjuwupakutu.
42Yiitjunya yiiya tuwalpala nyinarra pipirri tiṉarringanyingkapula katingu, tawunu Tjarutjalumalakutu, tuḻku Patjuwupakutu.
43Tuḻku palunya wiyarringanyingka, Yiitjunya Tjarutjalumala nyinangi, palumpa paapa an maama ngurrakutu anutjangka. Ngurrpapula yanangi, kanya Yiitjunya kutu Tjarutjalumala nyinangi. Yalatji ngunytjipula kulirinangi, walytja kutjupa tjuṯawana Yiitjunya yanutjangkakutjura. Mungarrtjirrirra ngururrpaya ngarringu, ngurra Natjaritjalakutu yankukitja.
45Palulangurupula Yiitjuku puṯu ngurrira ngaṉṯikutu yanu, Tjarutjalumalakutu.
46Tjiṉṯu tjirripalangkapula Tjarutjalumalawana puṯu ngurrira nyangulpi, tjaatji tiṉangka nyinanyingka. Wati nintilpayi tjuṯangka tjanala Yiitjunya nyinangi. Wangka tjananya kulira tjapiṉingi.
47Nintilpayi tjuṯangkuya wangka Yiitjukuṉu kulira puṯuyanku kuliṉingi, “Nintilingku pipirri uḻa ngaatja.”
48Tjutjupalu an Miirilu Yiitjunya nyakula kuliṉu, “Yilta pipirri ngaangku tjananya tjukarurru watjaṉi.” Miirilulpi watjaṉu, “Katja. Nyaangurumpalinyatjun wantingu. Ngalitjulitjunta puṯu ngurririnangi.”
49Yiitjulu pulanya ngalya watjaṉu, “Nyaakupulan puṯu ngurririnangi? Ngayuku paapaku ngurrangkaṉa palya nyinanyi. Yalatjipulan kulinmara.”
50Yiitjulu panyapa watjantjala, puṯupula kuliṉu.
51Tjungulpiya ngaṉṯikutu yanu ngurrakutu, tawunu Natjaritjalakutu. Paluru kutjarrangku watjantjala Yiitjulu tjukarurrungku palyalpayi. Tjimiyanaku wangka, Yiitjukuṉu wangkaṯarra Miirilu yunypangku kutu kulirinkupayi.
52Yiitjunya tiṉarrirra ninti puntu nyinangi. Katutjanyara yunypa nyinangi, yaṉangu tjuṯaṯarra.
