Luka 4:9-32

⁹I o beng anđa le ko Jerusalim hem čhivđa le upro najučo than e Hramesoro hem phenđa lese: “Te injan e Devlesoro Čhavo, frde tut akatar tele!

¹⁰Adalese soi pisime ko Sveto Lil: 'Ka naredini ple anđelenđe te arakhen tut,'

¹¹hem: 'Ka akharen tut ko vasta te na khuve tut preja ko bar.'”

¹²O Isus phenđa lese: “Vaćerdoi ko Sveto Lil: 'Ma kušin e Gospode, te Devle.'”

¹³I ked završinđa đijekh kušnja, o beng cidinđa pe olestar đi nesavi aver prilika.

¹⁴I irinđa pe o Isus, ano zoralipe e Duhosoro, ki regija Galileja, i šundilo o glaso olestar ko sa o krajo.

¹⁵I sikavđa olenđe ano sinagoge hem inele pohvalime sarijendar.

¹⁶I alo ki diz Nazaret kote barilo hem, palo plo adeti ko dive e savatesoro, đerdinđa ani sinagoga hem uštino te čitini.

¹⁷I ine lese dindo o lil oto proroko Isaija. Ov phravđa o lil hem arakhlja o than kaj inele pisime:

¹⁸“O Duho e Gospodesoroi upra mande adalese so pomazinđa man hem bičhalđa man te anav o šukar lafi e čororenđe te proglasinav: da o phandle ka oven oslobodime e kororenđe ka irini pe o dikhiba o mučime ka oven slobodna

¹⁹te proglasinav o adžićerdo berš e Gospodesoro.”

²⁰Tegani phandlja o lil, irinđa le e slugaste, i beštino te sikaj. I sare ani sinagoga dikhle ano leste.

²¹A o Isus lelja te vaćeri lenđe: “Avdive pherdilo o Lil savo šunđen tumare kanencar.”

²²I sare vaćerde šukar olestar hem inele zadivime oto šukar lafija save iklile lesere mujestar, i vaćerde: “Nane li ov e Josifesoro čhavo?”

²³A ov phenđa lenđe: “Čače ka vaćeren maje adaja poslovica: 'Doktore, sasljar korkore tut!' So šunđam so ulo ano Kafarnaum, ćer hem akate, ano than kote bariljan.”

²⁴I phenđa: “Čače, vaćerava tumenđe, nijekh proroko nane prihvatime pese ko than kote barilo.

²⁵I čače, vaćerava tumenđe, inele but udovice ano Izrael ked o proroko o Ilija živinđa, ked na pelo bršin trin berš hem šov masek i pojavisalo baro bokhalipe ki sa i phuv.

²⁶I nijekhaće olendar na inele bičhaldo o proroko Ilija sem ki e abanđijengiri diz Sarepta uzalo Sidon e udovicaće.

²⁷I inele but gubavci ano Izrael ked o proroko o Jelisej živinđa, i nijekh olendar na inele sasljardo sem o Neman o Sirijco.”

²⁸I sare ani sinagoga pherdile xoli ked šunde adava.

²⁹I uštindoj ispudinde le tari diz, i legarde le upre ko brego upro savo lengiri diz inele vazdime te šaj frden le odupral.

³⁰Ali o Isus nakhino maškar olende i dželo.

³¹I o Isus huljilo ani e galilejakiri diz Kafarnaum, i sikavđa e manušen ko dive e savatesoro.

³²I on inele zadivime lesere sikavibnaja adalese so lesoro vaćeriba inele ano autoritet.