Lucas 4:9-32

⁹Entonces e Satanás uqꞌueche e Jesús ixin esto tama e chinam Jerusalem y utꞌabꞌse uturbꞌa tujor e templo y che: —Cocha net Uyunenet e Dios, tobꞌen tara,

¹⁰porque chꞌar tzꞌijbꞌabꞌir tama uyojroner e Dios que: E Dios uyebꞌta watar uyangelobꞌ tuaꞌ ucojcuet.

¹¹Turobꞌix tuaꞌ uchuquiet taca ucꞌabꞌ tuaꞌ machi ayobꞌi abꞌa y nien tuaꞌ machi ayobꞌi oꞌc tama ingojr tun. Bꞌan chꞌar tzꞌijbꞌabꞌir tama uyojroner e Dios, che e diablo.

¹²Y sutpa ojron e Jesús otronyajr y che: —Machi, porque tzꞌijbꞌabꞌir chꞌar tama uyojroner e Dios ubꞌan que: “Ira amajres Awinquirar Dios tuaꞌ uche e mabꞌambꞌanir”, che e Jesús.

¹³Entonces cocha e diablo machi utajwi cocha tuaꞌ upijchꞌi e Jesús, uyacta cora era, y locꞌoy ajni tut.

¹⁴Pues entonces sutpa ixin e Jesús esto tama e departamento Galilea, y bꞌutꞌur uyalma taca ucꞌotorer Unawalir e Dios. Y cay checta ixin e ojroner tama e Jesús tama tunor or e lugar era este tama e aldea ubꞌan.

¹⁵Y e Jesús war acanseyan tama uyojroner e Dios tama inteꞌ inteꞌ sinagoga lo que ayan tama inteꞌ inteꞌ lugar, y tunor tin e cay uyubꞌiobꞌ uyojroner war utattzꞌiobꞌ ut e Jesús.

¹⁶Entonces ixin e Jesús esto tama e chinam Nazaret tiaꞌ chꞌijtesna. Entonces tama e día tuaꞌ e jiriar ixin tama e sinagoga bꞌan cocha acay uche. Y de allí achpa wawan tut e gente tuaꞌ uche leer uyojroner e Dios.

¹⁷Y ajcꞌuna inteꞌ tzꞌotbꞌir jun xeꞌ jax lo que tzꞌijbꞌabꞌir umen e profeta Isaías tama e onian tiempo. Y conda uwechꞌe e jun utajwi tiaꞌ tzꞌijbꞌabꞌir que:

¹⁸Turu Unawalir e Dios tacaren porque sicbꞌabꞌiren tuaꞌ inchecsu uyojroner e Dios tama e corpesiaj tut tin e tzajtaca ut. Y Cadiosir uyebꞌta tarien tuaꞌ intzꞌacpes tin e machi acꞌay tama uyalma, y uyebꞌta tarien tuaꞌ inchecsu e corpesiaj tut tin e macarobꞌ tama e cárcel, y uyebꞌta tarien tuaꞌ inwerojse ut tin e machi eꞌron, y uyebꞌta tarien tuaꞌ injirijse tin e war achena tzajtzaj.

¹⁹Y uyebꞌta tarien tuaꞌ inchecsu e día conda Cawinquirar Dios cꞌani ucorpesox. Bꞌan chꞌar tzꞌijbꞌabꞌir umen e profeta Isaías, che e Jesús.

²⁰Entonces e Jesús umaqui e libro y uyajcꞌu e ajcojc sinagoga y de allí turuan e Jesús tut e gente tuaꞌ oꞌjron. Y tunor e gente xeꞌ turobꞌ tama e sinagoga era war uchꞌujcu uwirobꞌ e Jesús y war ubꞌijnuobꞌ, —¿Y tucꞌa tuaꞌ uche jaxir era? xeꞌ war ubꞌijnuobꞌ e gente era.

²¹Entonces cay ojron e Jesús y che: —Coner era cꞌapa chena tiut lo que chꞌar tzꞌijbꞌabꞌir tama uyojroner e Dios era, che e Jesús.

²²Y tunor e gente tin e uyubꞌiobꞌ uyojroner era cay bꞌactobꞌ ubꞌijnuobꞌ que galan locꞌoy tunor uyojroner e Jesús, pero ayan tin e cay ojronobꞌ y che: —Pero ¿ma ca jax uyunen e José era? ¿Y tiaꞌ cano más ya? che e gente era.

²³Pero e Jesús che: —Bꞌajcꞌat war ibꞌijnu tuaꞌ iwaren que: “Jay net ajtzꞌaconeret, tzꞌacan abꞌa net taca.” O bꞌajcꞌat cꞌani iwaren que: “Non coybꞌi que chena cora nuxi milagro tama e chinam Capernaum amener. ¿Tucꞌa tuaꞌ machi ache inteꞌ milagro ticajam non tiaꞌ chꞌiet net ubꞌan?”

²⁴Y era cꞌani inwareox inteꞌ ojroner xeꞌ erach, que inteꞌ profeta tuaꞌ e Dios machi tuaꞌ achꞌajma umen tin e ajlugarobꞌ tacar.

²⁵Pues chequer que meyra ayan ani e ixictac xeꞌ chamen uviejobꞌ tama e Israel tama utiempo e profeta Elías xeꞌ turuan tama e onian tiempo. Porque machi cꞌaxi e jajar tama inteꞌ tiempo de tres año y medio, y meyra winar ayan tama tunor or e lugar Israel tama e tiempo yajaꞌ.

²⁶Pero e Elías machi tzacarna ixin umen e Dios tuaꞌ utacre e ixictac xeꞌ chamen uviejobꞌ xeꞌ turobꞌ tama e lugar Israel, sino que jaxir tzacarna ixin tuaꞌ utacre inteꞌ choquem ixic xeꞌ chamen uviejo xeꞌ turuan tama e chinam Sarepta tama e lugar Sidón xeꞌ majax tuaꞌ e Israel.

²⁷Y chequer ubꞌan que ayan ani meyra gente tama e Israel tin e ajmuac taca e sian chec xeꞌ ucꞌabꞌa lepra tama e onian tiempo conda turuto e profeta Eliseo. Pero mamajchi tzꞌacpesna tujam e ajmuacobꞌ tama e Israel umen e Eliseo, sino que jax taca inteꞌ choquem winic xeꞌ ucꞌabꞌa Naamán xeꞌ turuan tama e departamento Siria xeꞌ majax tuaꞌ e Israel, che e Jesús.

²⁸Pero conda cꞌapa uyubꞌiobꞌ e ojroner era tuaꞌ e Jesús, qꞌuijnobꞌ tunor tin e turobꞌ macuir e sinagoga era.

²⁹Y de allí achpobꞌ tunorobꞌ y uquerejbꞌobꞌ locꞌoy najtir e Jesús uqꞌuechiobꞌ ixin esto tama utiꞌ e chinam tiaꞌ ayan inteꞌ nuxi chꞌen tiaꞌ cꞌani uyojresobꞌ axin e Jesús.

³⁰Pero conda cꞌotoyobꞌ tujor e nuxi chꞌen era, e Jesús machi uwirobꞌ tiaꞌ ixin tujam e sian gente, intaca satpa tutobꞌ.

³¹Pues entonces ixin e Jesús tama e chinam Capernaum xeꞌ turu tama e departamento Galilea, y ochoy tama inteꞌ sinagoga tama e día tuaꞌ e jiriar y cay ucanse e gente.

³²Pero e gente cay bꞌacta uwirobꞌ ucanseyaj e Jesús porque jaxir canseyan taca ucꞌotorer e Dios.