Luka 4:9-32

⁹Kateige Seteneu tota Iesu melamei Dielusalemae tinu. Tialeu Diue dubu baluga ke kobola lavihovosege Seteneu loui avoe, “A Dilava mo holiniege komo lamisi biloa.

¹⁰Kosealemo Bukae Hotou loui avoe, ‘Dilavana au anelu hanavege abuna a nibisi a hoesehavoi.’

¹¹Hoto keu tota loui avoe, ‘Anelu abuna a evudei. Ige a bae dobai munemo a ebika hamalivebene.’”

¹²Ige Iesu hotove ibina avuho loui avoe, “Hoto seleveike. Isito Bukae Hotou tota loui avoe, ‘Lainaho heiata la Kosive nego ke kaovalive.’”

¹³Ige Seteneu hoto kateale loui Iesu lobohavoge uoholige au halei tinu. Isiviai talive ukaukaito tota avue lohoi.

¹⁴Iale loboe vaveve keu uoholige Iesuu halei Galili vatae tinu. Keve tiale Munana Tumute vuvunemo ua. Ige au vamale ke hotou vata ke bahatae tinu.

¹⁵Ige au tiale dubuiabemo ata haivege abu bahata hoesehavolu.

¹⁶Vani mole Iesu hoilahai tiale Nasaletae au esebuluta uale keve velemanu. Vani bahata bulau lohoge auna tiniege guliguliagei. Iale bula kemo au tiale dubue lamisi isiviai Bukae Hoto dodavei.

¹⁷Kateige abu beloveta Aisaia buka mole mai omilu. Ige au buka ke mai vavehai iviganiai dodavei tinu.

¹⁸Dodavei avoe, “Dilava Munanau daemo ua. Au di ebagemage dana hotove dua loui kunaiholimale kebia haivei. Au di hanavoge dana tiniege vaveveabe toela kemo iovege abuna ke halevai. Au di hanavoge ni kedute keabuna bae nilahai elehai. Au di hanavoge dana olemeau uvu unahamo umale kebiata hoesegevei.

¹⁹Au di hanavoge dana ataho loui kosea, ‘Kosivena bae aike la hoesegevei la tedaevei.’”

²⁰Hoto ke dodavege uoholige au buka mai dubue ata mole omisito ugumanu. Ige ata bahataeau tobekai nibisi ua.

²¹Ige Iesu namigevei abuho loui avoe, “Di hoto dodavege la eviale keu nova velemanu.”

²²Hoto kateale louge abu hotoe dua ke evige uvuiabeu teteanu. Isi vikolahai loui avoe, “Dioseba monike. Au oleve kateai hoto ke manu.”

²³Ige Iesu abuho loui avoe, “Di hilokage la hoto kosealeike dahoe louliho. ‘Au vavahanite hoesegevemale ata. Iale a ebika hoesehavonela.’ Mesoho lana tota daho loui kosea, ‘A Kabenumu oe vaveve ni molete vale ke nahate a vata seleve kove kateale vanela.’ La la uvumo hoto kateale huhulahama.

²⁴Isito di la namigevege evive. Beloveta ata kena au vata kemo hoto louge atave seleve keau bae hotove evilivebene.

²⁵Dana kemo hoto mole loui. Subuta mole Ilaidiau usege veniu lohoholiale vagana abuita igaeta isi bata ada mole isi igaeu uoholinu. Katealemoike vata ko bahatamo loviu uoholige vae balugau lohonu. Kateimale vanila Iselala gobuvu moagaeau vata kove ua.

²⁶Isito kebiaho Dilavau Ilaidia hanavoholinu. Ke hanavoge vata mole Saidoni keve tiale Salebeta oe gobu mole tedahonu.

²⁷Subuta vani kela Iselala ata moagaeau vavahani mole lebolasi ke malu. Isito beloveta Ilaisau kebia tedaeveholinu. Isito Silia kosive mole Neimeni ke igae tedahoge au momoleanu.”

²⁸Iesu hoto isute kateale louge ata bahataeau dubue uvue ke evisi avuho itumu balugalu.

²⁹Isi kemo hovedevei Iesu kabitisi isiviale mai oe iae seikamo mihatui.

³⁰Isito Iesuu ata bahatae edekaeabemo velemai tinu.

³¹Iesuu matama ke halei Galili vatae o mole Kabenumue tiale keve bulamo ata haivenu.

³²Ige abu Iesuu louale ke evisi vikolahalu. Kosealemo hoto keu vuvuneanu.