Lucas 4:9-32

⁹Geb degi nia-saila Jerusalénse Jesús-sesbalid, Bab-Dummadse-goled-neg-uas-birgi ogwisdapgu, Jesúsga sogded: —Ar be Bab-Dummad-Machi-sunnadile, be napase ichomakdo.

¹⁰Ar Bab-Dummad-Gardagi narmakar naid: Na e-angermar bega barmidagoye be-edarbegar.

¹¹Degine, angermar e-argangi be-gamaloye, adi melle be-nag akwagi yolegegar.

¹²Jesús, abin-imakdegu, sogded: —Nabir be sogendo, ar Bab-Dummad-Gardagi narmakar sognaibalid: Melle Dummad, be-Bab-Dummad, be wilubdakoye.

¹³Ar nia-saila bela Jesús-wilubdaked bergusgua, sikwas wis egi bangud gusad.

¹⁴Jesús gannar Galilease nonigu, nue Bab-Dummad-Burba-Nued-gangued-nikadba nonikid, degi, bela neggweburmar-dikarba-nanaid wisguarmalad Jesús ibmar imakdiid.

¹⁵Jesús Judiomar-onmaked-neggi dulemar-odurdakdii-gualid. Bela Jesús-nug odummogedbi-gusmalad.

¹⁶Jesús Nazaretse nonikid, bia na e-dungusadse. Obunnoged-ibagi, Jesús na gusgu e-daedba Judiomar-onmaked-negse dogdapid. Agi gwisguded, Bab-Dummad-Garda absogegar.

¹⁷Ar ade Jesúsga uksamalad Bab-Dummad-gaya-burba-berbeged, Isaías, a narmaksad. Jesús garda egasgu, egasad, narmakar naidgi:

¹⁸Bab Dummad Burba Nued anba gudiid, ar an-susad, adi dulemar-wileganaga gaya-burba-nued an sogegar. An barmilesad, dulemar-gwage-nunmak-itodimalad-nudakegar, dulemar-galebukmaladga binnasur sogegar, bemar ainimarye, dulemar-ibya-suli-gudimaladga ibya ukegar; dulemar-baiganse-wiledimalad onogegar,

¹⁹Bab-Dummad-e-birga-nuedgi sunmakegar.

²⁰A-sorba Jesús Bab-Dummad-Garda obipirmasgu, Judiomar-onmaked-neg-daked-dulega garda uksagu, sigisad. Agi-bukmalad bela Jesúsginbi atakbukwa-gusmalad.

²¹Geb degi Jesús sogded: —Emi-ibagi bemar-abargi we Bab-Dummad-Gardagi-narmakar-naid sanar-gunonikid.

²²Bela-dulemar-bukmaladi Jesúsgi nuedbi sunmakedbimalad. Geger nue dakmalad, ibiyobi Jesús sunmaked yeer nue sunmake. Degine, sogdemalad: —¿Ar wede José-e-machisursi?

²³Jesús amarga sogded: —An wisdo, wegi-sogleged sunna be anga sokarmalaled: ‘Ina-duled, na be dukin san nudake, adi anmarga oyogegar be nue ibmar wisid. Ar bukidar Capernaum-neggweburgi-ibmar-imaksad anmar be-itosmaladi, wegi be-neggweburgi be imakmoga.’

²⁴Degi Jesús sogdebalid: “Napira an bemarga soged, Bab-Dummad-gaya-burba-berbeged-wargwensaar na e-neggweburgi geg e-nug odummoleged.

²⁵Napira an bemarga soged, Elías maigusgu, Israel-yargi, bukidar mukwamar-ei-sui-burgwismalad gudigusad. Deun dii birgapaa-abala gwen wissurgu, agi we-napagi bela ukud-dummad nagunonikid.

²⁶Degite Elías a-mukwamarse gwen barmilessulid, bur barmiles-gusad, Sidónse, Sarepta-neggweburgi mukwa-wargwen-ei-sui-burgwisadse, a-mukwa ega mas ukegar.

²⁷“Deginbali, Bab-Dummad-gaya-burba-berbeged, Eliseo-nugad, maigusgu, Israel-yargi dulemar-naibe-buna-ya-maleged bukidar nika-gusmalad, degite, amar gwen nudaklessulid, bur nudaklesad, Sirio-dule, Naamán-nugad.”

²⁸Ar weyob Jesús-ibmar-soge itosmargu, Judiomar-onmaked-neggi-bukmalad bela sae-itodmalad.

²⁹Dulemar gwisgudmargu, Jesús-gasmalad, geb degi neggwebur-magaba ise-onoar, yar-mulluse Jesús-sesmalad, ar ade a-yar-mullugi neggwebur siid. Ase Jesús-sesmalad, adi gulluba egwanmalagar.

³⁰Ar Jesúsdi emar-abargi ganna-ganna noded, emar-abargi bangudsunnad.

³¹Jesús Galilease nonikid, neggwebur-Capernaum nugadse. Agi obunnoged-ibagi dulemar-odurdaksii-gualid.

³²Jesús dulemar-odurdaksigu, geger dakmalad igi dulemar-odurdaked, ar ade Jesúsde nue-igar-wisi sunmaked.